ആവേശം പെട്ടന്ന് ആകാംക്ഷയായി... ദേഹാസ്വാസ്ഥ്യം അനുഭവപ്പെട്ട മാമുക്കോയയുടെ ആരോഗ്യനിലയില് പുരോഗതി; കോഴിക്കോട്ടെ ആശുപത്രിയിലേക്ക് മാറ്റി; കാളികാവില് ഫുട്ബോള് ടൂര്ണമെന്റിന്റെ ഉദ്ഘാടനത്തിനിടെയാണ് ബുദ്ധിമുട്ട് അനുഭവപ്പെട്ടത്
നടന് മാമുക്കോയയെ ദേഹാസ്വാസ്ഥ്യത്തെ തുടര്ന്ന് ആശുപത്രിയില് പ്രവേശിപ്പിച്ചു. ആരോഗ്യനിലയില് ആശങ്കപ്പെടേണ്ട സാഹചര്യമില്ലെന്നാണ് ആശുപത്രിയില് നിന്നു ലഭിക്കുന്ന വിവരം. മലപ്പുറം കാളികാവില് ഫുട്ബോള് ടൂര്ണമെന്റിന്റെ ഉദ്ഘാടനച്ചടങ്ങു നടക്കുന്നതിനിടെ ദേഹാസ്വാസ്ഥ്യം അനുഭവപ്പെടുകയായിരുന്നു. ഉടന് തന്നെ വണ്ടൂരിലെ സ്വകാര്യ ആശുപത്രിയിലെത്തിച്ചു. പിന്നിട് മാമുക്കോയയെ കോഴിക്കോട്ടെ സ്വകാര്യ ആശുപത്രിയിലെ തീവ്രപരിചരണ വിഭാഗത്തിലേക്ക് മാറ്റി. ആരോഗ്യനില അല്പം ഭേദപ്പെട്ടതിന് ശേഷമാണ് വണ്ടൂരിലെ സ്വകാര്യ ആശുപത്രിയില് നിന്നും അദ്ദേഹത്തെ മെഡിക്കല് ഐസിയു ആംബുലന്സില് പുലര്ച്ചെ രണ്ടരയോടെ കോഴിക്കോട്ടേക്ക് കൊണ്ടുവന്നത്.
ഇന്നലെ രാത്രി വണ്ടൂരിലെ ആശുപത്രിയില് വെച്ച് ബിപിയും ഹൃദയമിടിപ്പും സാധാരണ നിലയിലായ ശേഷമാണ് മാമുകോയയെ കോഴിക്കോട്ടേക്ക് മാറ്റിയത്. ആരോഗ്യ നിലയില് പുരോഗതിയുണ്ടെങ്കിലും അദ്ദേഹം 72 മണിക്കൂര് നിരീക്ഷണത്തില് തുടരേണ്ടി വരുമെന്നും അദ്ദേഹത്തെ ചികില്സിച്ച ഡോക്ടര് അജ്മല് നാസിര് പറഞ്ഞു.ബന്ധുക്കള് ഇന്നലെ രാത്രി തന്നെ വണ്ടൂരില് എത്തിയിരുന്നു. കളികാവ് പൂങ്ങോട് ഒരു ഫുട്ബോള് ടൂര്ണമെന്റ് ഉദ്ഘാടന ചടങ്ങിനെത്തിയതായിരുന്നു മാമുക്കോയ. പരിപാടി തുടങ്ങുന്നതിനു മുമ്പ് കുഴയുകയായിരുന്നു. ഉടന് തന്നെ അദ്ദേഹത്തെ സമീപ പ്രദേശമായ വണ്ടൂരിലെ സ്വകാര്യ ആശുപത്രിയില് എത്തിക്കുകയായിരുന്നു.
ട്രോമ കെയര് പ്രവര്ത്തകര് ഉണ്ടായിരുന്നതിനാല് മാമുക്കോയക്ക് ദേഹാസ്വാസ്ഥ്യം വന്നപ്പോള് തന്നെ നിര്ണായക പ്രാഥമിക ചികിത്സ നല്കാന് കഴിഞ്ഞെന്ന് ഫുട്ബോള് ടൂര്ണമെന്റ് സംഘടക സമിതി. 10 കിലോമീറ്റര് അകലെയുള്ള ആശുപത്രിയിലേക്ക് അതിവേഗം അദ്ദേഹത്തെ എത്തിക്കാന് സാധിച്ചെന്നും സംഘാടക സമിതി വ്യക്തമാക്കി. പൂങ്ങോട് ജനകീയ സെവന്സ് ഫുട്ബോള് ടൂര്ണമെന്റ് ഉദ്ഘാടനം ചെയ്യാനെത്തിയപ്പോഴാണ് മാമുക്കോയയ്ക്ക് ദേഹാസ്വാസ്ഥ്യം ഉണ്ടായത്. തുടര്ന്ന് വണ്ടൂരിലെ സ്വകാര്യ ആശുപത്രിയില് പ്രവേശിപ്പിച്ചു. തിങ്കളാഴ്ച രാത്രി 8.30ന് ആണ് സംഭവം.
മത്സരത്തിനു മുന്നോടിയായി മാമുക്കോയ മൈതാനത്ത് എത്തിയിരുന്നു. ആരാധകര് ചുറ്റും കൂടി ഫോട്ടോയെടുത്തു. അതിനിടയില് ശരീരം വിയര്ത്ത് തളര്ച്ചയുണ്ടായതിനെത്തുടര്ന്ന് ആംബുലന്സില് ആശുപത്രിയില് എത്തിക്കുകയായിരുന്നു. അത്യാഹിത വിഭാഗത്തില് നിരീക്ഷണത്തിലാണെന്നു ഡോക്ടര്മാര് അറിയിച്ചു. കാര്ഡിയാക് അറസ്റ്റ് ആയാണ് അദ്ദേഹത്തെ ഇവിടെ എത്തിച്ചതെന്ന് ഡോക്ടര് പറഞ്ഞു. ആറോ ഏഴോ സിപിആര് നല്കിയ ശേഷം നില മെച്ചപ്പെട്ടു. നിലവില് ഐസിയുവില് വെന്റിലേറ്റര് സപ്പോര്ട്ടിലാണ് ഉള്ളത്. ഇപ്പോള് ബിപിയെല്ലാം സാധാരണ നിലയിലാണ്. ഡോക്ടര് പറഞ്ഞു. കുടുംബാംഗങ്ങള് കോഴിക്കോട്ടുനിന്ന് എത്തിയശേഷം അവരുമായി ആലോചിച്ച് നിലവില് ചികിത്സിക്കുന്ന ആശുപത്രിയിലേക്ക് മാമുക്കോയയെ മാറ്റുകയായിരുന്നു.
മലയാള ചലച്ചിത്ര രംഗത്തെ പ്രമുഖ ഹാസ്യനടനാണ് മാമുക്കോയ. കോഴിക്കോട് സ്വദേശിയായ അദ്ദേഹം നാടകരംഗത്തു നിന്നുമാണ് സിനിമയില് എത്തിയത്. മുഹമ്മദ് എന്നാണ് യഥാര്ത്ഥ നാമം. കോഴിക്കോടന് സംഭാഷണ ശൈലിയുടെ സമര്ത്ഥമായ പ്രയോഗത്തിലൂടെയാണ് ശ്രദ്ധിക്കപ്പെട്ടത്. കുതിരവട്ടം പപ്പു ഇതിനു മുമ്പ് അവതരിപ്പിച്ചതില് നിന്നും വ്യത്യസ്തമായി മുസ്ലിം സംഭാഷണ ശൈലിയാണ് മാമുക്കോയയുടെ സവിശേഷതയായിത്തീര്ന്നത്.
വിദ്യാര്ത്ഥി ആയിരിക്കുമ്പോള് തന്നെ നാടക പ്രവര്ത്തകനായ മാമുക്കോയ വളരെ സ്വാഭാവികമായി കഥാപാത്രങ്ങളെ അവതരിപ്പിക്കുന്നു. നാടോടിക്കാറ്റ് എന്ന ചിത്രത്തിലെ ഗഫൂര്ക്കാ, പെരുമഴക്കാലത്തിലെ അബ്ദു, ബ്യാരി എന്ന ചിത്രത്തിലെ കഥാപാത്രം, കീലേരി അച്ചു, സന്ദേശം എന്ന ചിത്രത്തിലെ കെ. ജി. പൊതുവാള്, ചന്ദ്രലേഖയിലെ പലിശക്കാരന്, കളിക്കളത്തിലെ പോലീസുകാരന്, ഹിസ് ഹൈനസ് അബ്ദുള്ളയില് ജമാല്, ഒപ്പത്തിലെ സെക്യൂരിറ്റിക്കാരന് എന്നിവ ശ്രദ്ധേയമായി.
https://www.facebook.com/Malayalivartha
