എല്ലാം മാറിമറിയുന്നു... കുസാറ്റ് വിസി നിയമനത്തില് സര്ക്കാര് ശുപാര്ശ അംഗീകരിച്ച് ഗവര്ണര്; കുസാറ്റ് വിസിയായി ഡോ. പി ജി ശങ്കരനെ നിയമിച്ചു; കുസാറ്റ് വിസിക്കായി ഒറ്റ പേര് മാത്രമാണ് സര്ക്കാര് ശുപാര്ശ ചെയ്തിരുന്നത്
ഗവര്ണറും സര്ക്കാരും തമ്മിലുള്ള പോരില് മഞ്ഞുരുകല് വീണ്ടും. കുസാറ്റ് വിസി നിയമനത്തില് സര്ക്കാര് ശുപാര്ശ അംഗീകരിച്ച് ഗവര്ണര് ആരിഫ് മുഹമ്മദ് ഖാന്. കുസാറ്റ് വിസിയായി ഡോ. പി ജി ശങ്കരനെ ഗവര്ണര് നിയമിച്ചു. ഡോ. കെ എന് മധുസൂദനന് വിസി സ്ഥാനത്ത് കാലാവധി പൂര്ത്തിയാക്കിയതോടെയാണ് നിയമനം.
കുസാറ്റ് പ്രൊ വിസിയായിരുന്നു ഡോ. പി ജി ശങ്കരന്. കുസാറ്റ് വിസിക്കായി ഒറ്റ പേര് മാത്രമാണ് സര്ക്കാര് ശുപാര്ശ ചെയ്തിരുന്നത്. നേരത്തെ ഗവര്ണര് രാജിവയ്ക്കാന് ആവശ്യപ്പെട്ടവരുടെ കൂട്ടത്തില് കുസാറ്റ് വിസിയും ഉള്പ്പെട്ടിരുന്നു. കോടതി വിധി അനുകൂലമായതോടെയാണ് ഡോ. കെ എന് മധുസൂദനന് വിസി സ്ഥാനത്ത് തുടര്ന്നത്.
ഇദ്ദേഹത്തിന്റെ കാലാവധി പൂര്ത്തിയായതിന് ശേഷം, സര്ക്കാര് ശുപാര്ശ ഗവര്ണര് അംഗീകരിക്കുമോ എന്ന് ചോദ്യമുയര്ന്നിരുന്നു. കെടിയു വിസി നിയമനത്തിന് സമാനമായി ഗവര്ണര് സ്വന്തം നിലക്ക് നിയമനം നടത്തുമോ എന്നും അഭ്യൂഹമുയര്ന്നിരുന്നു. എന്നാല് സര്ക്കാര് നല്കിയ ശുപാര്ശ ഗവര്ണര് അതേപടി അംഗീകരിക്കുകയായിരുന്നു.
കുസാറ്റില് താല്ക്കാലിക വിസിയെ നിയമിക്കാന് സര്ക്കാരിന്റെ ശുപാര്ശ ആവശ്യമില്ലെങ്കിലും ഗവര്ണര് സര്ക്കാരിനോട് അങ്ങോട്ട് ആവശ്യപ്പെടുകയായിരുന്നു. കുസാറ്റിലെ സ്റ്റാറ്റിസ്റ്റിക്സ് വിഭാഗം മേധാവിയും പ്രഫസറുമാണു ഡോ.ശങ്കരന്.
കുസാറ്റ് വിസി വിരമിച്ച സാഹചര്യത്തില് ചുമതല നല്കുന്നതിന് എല്ലാ സര്വകലാശാലകളിലെയും സീനിയര് പ്രഫസര്മാരുടെ പാനല് രാജ്ഭവന് ശേഖരിച്ചിരുന്നു. എന്നാല് സര്ക്കാര് നിര്ദേശം ഇല്ലാതെ ആര്ക്കെങ്കിലും ചുമതല നല്കുന്നതിനോടു ഗവര്ണര് യോജിച്ചില്ല. കാലാവധി അവസാനിക്കുന്നതിനു മുന്പു വിസിയും പിവിസിയും ഗവര്ണറെ സന്ദര്ശിക്കാന് അനുമതി തേടിയെങ്കിലും നല്കിയില്ല. സുപ്രീംകോടതി വിധിയെ തുടര്ന്നു ഗവര്ണര് പിരിച്ചുവിടല് നോട്ടിസ് നല്കിയവരില് കുസാറ്റ് വിസിയും ഉള്പ്പെട്ടിരുന്നു.
സാങ്കേതിക സര്വകലാശാലയില് സര്ക്കാരിനെ അവഗണിച്ചു ഗവര്ണര് ചുമതല നല്കിയ ഡോ. സിസ തോമസിനെതിരെ സര്ക്കാര് അച്ചടക്ക നടപടി സ്വീകരിച്ചതു ഗവര്ണര്ക്കു തിരിച്ചടിയായിരുന്നു. ഇക്കാര്യത്തില് അദ്ദേഹം നിസ്സഹായനായി. ഈ സാഹചര്യത്തിലാണു കുസാറ്റില് സര്ക്കാരിന്റെ താല്പര്യം ഗവര്ണര് ആരാഞ്ഞത്.
അതേസമയം എംജി വിസിയുടെ കാലാവധി അടുത്ത മാസം അവസാനിക്കും. മലയാളം വിസിയുടെ ചുമതലയും അദ്ദേഹം തന്നെയാണു വഹിക്കുന്നത്. രണ്ടു സര്വകലാശാലകളിലും പകരം ആര്ക്കു ചുമതല നല്കണമെന്നു സര്ക്കാരിനോട് ആരായാന് ഗവര്ണര് തീരുമാനിച്ചിട്ടുണ്ട്. ആരിഫ് മുഹമ്മദ് ഖാന്റെ കാലാവധി 2024 സെപ്റ്റംബറില് അവസാനിക്കുകയാണ്. അതുവരെ സര്ക്കാരിനു താല്പര്യമുള്ളവര്ക്കു വിസിയുടെ താല്ക്കാലിക ചുമതല നല്കി മുന്നോട്ടു പോകും.
സ്ഥിരം വിസിയായി സര്ക്കാരിനു വേണ്ടപ്പെട്ടവരെ നിയമിക്കുന്നതിനു സേര്ച് കമ്മിറ്റിയുടെ ഘടന ഭേദഗതി ചെയ്തു നിയമസഭ പാസാക്കിയ ബില്ലില് ഗവര്ണര് ഒപ്പു വച്ചിട്ടില്ല. ഇപ്പോഴത്തെ രീതിയിലുള്ള സേര്ച് കമ്മിറ്റി രൂപീകരിക്കുന്നതിനു സര്വകലാശാലയുടെ പ്രതിനിധിയെ നല്കുന്നതു സിപിഎം തടഞ്ഞിട്ടുണ്ട്. ഈ സാഹചര്യത്തില് ഗവര്ണര്ക്കു സേര്ച് കമ്മിറ്റി രൂപീകരിക്കാന് സാധിക്കില്ല.
സംസ്ഥാനത്തെ എല്ലാ ഗവ. കോളജുകളിലും സ്ഥിരം പ്രിന്സിപ്പല്മാരെ നിയമിക്കാതെ താല്ക്കാലിക ചുമതല നല്കിയിരിക്കുകയാണ്. സമാനമായി സര്വകലാശാലകളിലും താല്ക്കാലിക വിസിമാര് തുടരും. കേരള, സാങ്കേതിക, കാര്ഷിക, ഫിഷറീസ്, കലാമണ്ഡലം, നിയമം, കുസാറ്റ്, മലയാളം സര്വകലാശാലകളില് ഇപ്പോള് സ്ഥിരം വിസി ഇല്ല. എംജി വിസി അടുത്ത മാസം വിരമിക്കും.
നിയമസഭകള് പാസാക്കുന്ന ബില്ലുകളില് ഗവര്ണര്മാര് അതിവേഗം തീരുമാനമെടുക്കണമെന്ന് സുപ്രീം കോടതി പരാമര്ശവും തിരിച്ചടിയാണ്. നിയമസഭ പാസാക്കിയ ബില്ലുകളില് ഗവര്ണര് തമിഴിസൈ സൗന്ദരരാജന് തീരുമാനമെടുക്കുന്നില്ലെന്ന് ആരോപിച്ച് തെലങ്കാന സര്ക്കാര് ഫയല്ചെയ്ത ഹര്ജി പരിഗണിക്കവെയാണ് സുപ്രീംകോടതിയുടെ നിരീക്ഷണം. എന്തായാലും ആലോചിച്ച് നീങ്ങാനാണ് ഗവര്ണറുടെ തീരുമാനം.
https://www.facebook.com/Malayalivartha
