അരിക്കൊമ്പന്‍ വനംവകുപ്പിനേയും കൊതിപ്പിച്ച് കടന്നുകളഞ്ഞു. വനംവകുപ്പ് വെടിവെക്കാന്‍ ചെന്നപ്പോള്‍ അരിക്കൊമ്പന്‍ മുങ്ങി കണ്ടത് ചക്ക കൊമ്പനെ. അരിക്കൊമ്പന്‍ മിഷന്‍ പ്രതിസന്ധിയില്‍, ആന എവിടെയെന്ന് അവ്യക്തം, ഉറങ്ങുകയാണെന്ന സംശയത്തില്‍ വനംവകുപ്പ്. വനംവകുപ്പിനെ ചക്രശ്വാസം വലിപ്പിക്കുകയാണ് ഈ കൊമ്പന്‍. അരിക്കൊമ്പനും വനംവകുപ്പുമാണിപ്പോള്‍ സോഷ്യല്‍മീഡിയയില്‍ നിറയുന്നത്. വലിയാ ട്രോളാണ് സോഷ്യല്‍മീഡിയയില്‍ നിറയുന്നത്. ഡബിളാ ഡബിള്‍. ആള്‍മാറാട്ടത്തിന് അരിക്കൊമ്പനെതിരെ കേസെടുക്കണം പിള്ളേച്ചാ തുടങ്ങി കമന്റുകള്‍.

ഇതിപ്പോള്‍ വനംവകുപ്പിന്റെ മനസ്സിലിരുപ്പ് അരിക്കൊമ്പന്‍ മാനത്ത് കണ്ടു. ഇതോടെ മറ്റ് കൊമ്പന്മാരേം കൊണ്ടുവന്ന് ഒരുമിച്ചാണ് നടപ്പ്. വനംവകുപ് പൊക്കാന്‍ ചെന്നപ്പോള്‍ നിന്ന നില്‍പ്പില്‍ ആള് മുങ്ങി. പകരം ദേ നിക്കണു ചക്ക കൊമ്പന്‍. എന്നെ പിടിക്കണില്ലേ സാറമ്മാരേന്ന മട്ടില്‍ ചക്കക്കൊമ്പന്റെ ഒരു ആക്കലും. രാവിലെ ദൗത്യസംഘം കണ്ടതും ചാനലുകളില്‍ ഉള്‍പ്പെടെ ദൃശ്യങ്ങള്‍ പ്രചരിക്കുന്നതും മറ്റൊരു കാട്ടാനയായ ചക്കക്കൊമ്പന്റെയാണെന്നാണ് വനംവകുപ്പ് അറിയിച്ചത്. ഈ മേഖലയിലുള്ള മറ്റ് പ്രധാന ആനകളെയെല്ലാം കണ്ടെത്താന്‍ വനംവകുപ്പിന് സാധിച്ചെങ്കിലും, അരിക്കൊമ്പനെ ഇതുവരെ കണ്ടെത്താനായില്ല. 301 കോളനിക്കു സമീപമുള്ള വനപ്രദേശത്ത് ഇന്നലെ വരെ അരിക്കൊമ്പനെ കണ്ടിരുന്നു. എന്നാല്‍, ദൗത്യസംഘം കാടുകയറിയതിനു പിന്നാലെ അരിക്കൊമ്പന്‍ അപ്രത്യക്ഷനാകുകയായിരുന്നു. ഇതോടെ അരിക്കൊമ്പന്‍ ദൗത്യം തുടരുന്ന കാര്യം സംശയത്തിലായി. അരിക്കൊമ്പന്‍ ദൗത്യവുമായി ബന്ധപ്പെട്ട് ചിന്നക്കനാല്‍ പഞ്ചായത്തിലും ശാന്തന്‍പാറ പഞ്ചായത്തിലെ 1,2,3 വാര്‍ഡുകളിലും നിരോധനാജ്ഞ പ്രഖ്യാപിച്ചിരിക്കുകയാണ്. ദൗത്യം പൂര്‍ത്തിയാകും വരെയാണ് നിയന്ത്രണം.

സോഷ്യല്‍മീഡിയയില്‍ കൊമ്പന്‍ വിലസുകയാണ്. ആ അത് പണ അരിക്കൊമ്പന്റെ കണ്ണിന് താഴെ ഒരു കറുത്ത മറുകുണ്ട്. അത് നോക്കണം സാര്‍. ആരോ അരിക്കൊമ്പന് ന്യൂസ് ചോര്‍ത്തി കൊടുത്തിട്ടുണ്ട്. കിണറ്റില്‍ വീണ കരടിക്കുണ്ടായ അനുഭവം അരിക്കൊമ്പന്‍ അറിഞ്ഞു മൂപ്പര് മുങ്ങി. സാറെ ചക്ക കൊമ്പനെ ഉന്നംവെക്ക് അപ്പോള്‍ അരിക്കൊമ്പന് കൊള്ളും. ചക്ക കൊമ്പനെ അറസ്റ്റ് ചെയ്യു ജാമ്യം എടുക്കാന്‍ അരിക്കൊമ്പന്‍ വരും. വനം വകുപ്പില്‍ ഒറ്റുകാരുണ്ടോ വിവരം ചോര്‍ത്തിയേക്കുന്നു. അരിക്കൊമ്പന്റെ ആരോ ഡിപ്പാര്‍ട്ട്‌മെന്റില്‍ ഉണ്ട്. മുഖ്യമന്ത്രി ഇടപെടണം. അങ്ങനെ ട്രോളോട് ട്രോള്‍.

വനം വകുപ്പ് ജീവനക്കാര്‍, മയക്കുവെടി വിദഗ്ധന്‍ ഡോ.അരുണ്‍ സക്കറിയയുടെ നേതൃത്വത്തില്‍ വെറ്ററിനറി സര്‍ജന്‍മാര്‍, കുങ്കിയാനകളുടെ പാപ്പാന്മാര്‍ ഉള്‍പ്പെടെ 150 പേരാണ് ദൗത്യത്തില്‍ പങ്കെടുക്കുന്നത്. ആന നില്‍ക്കുന്ന സ്ഥലം നിര്‍ണയിക്കാന്‍ ചുമതലപ്പെടുത്തിയ ആദ്യസംഘം പുലര്‍ച്ചെ നാലേമുക്കാലോടെ കാട്ടിലേക്ക് തിരിച്ചു. ഈ സംഘം 6.20ഓടെ ആന നില്‍ക്കുന്ന സ്ഥലം നിര്‍ണയിച്ച് മയക്കുവെടി വയ്ക്കാനുള്ള രണ്ടാം സംഘം ദൗത്യത്തിനായി രംഗത്തിറങ്ങി. ആറരയോടെ കുങ്കിയാനകളും രംഗത്തിറങ്ങി. ഇതിനിടെ ഇന്നു പുലര്‍ച്ചെ മുത്തമ്മ കോളനിക്കു സമീപം അരിക്കൊമ്പനെ കണ്ടതായി വാര്‍ത്തകള്‍ പ്രചരിച്ചു. പിന്നീട് സിമന്റ് പാലം പ്രദേശത്ത് അരിക്കൊമ്പന്‍ നില്‍ക്കുന്നുവെന്നായി പ്രചാരണം. ഇതോടെ മയക്കുവെടി വയ്ക്കാന്‍ ഡോ.അരുണ്‍ സക്കറിയയുടെ നേതൃത്വത്തില്‍ വെറ്ററിനറി സര്‍ജന്മാര്‍ അടങ്ങുന്ന സംഘം ബേസ് ക്യാംപില്‍ നിന്ന് പുറപ്പെടുകയും ചെയ്തു. മയക്കുവെടി വയ്ക്കാനുള്ള സംഘം സജ്ജമായെങ്കിലും അരിക്കൊമ്പന്‍ മറ്റ് ആനകള്‍ക്കൊപ്പം എത്തിയത് പ്രതിസന്ധി സൃഷ്ടിക്കുന്നതായി റിപ്പോര്‍ട്ടുകള്‍ വന്നു. ഇതിനിടെയാണ്, ഇതുവരെ കണ്ടത് ചക്കക്കൊമ്പനെയാണെന്ന് വനംവകുപ്പ് അറിയിച്ചത്.