സീരിയലുകള്‍ നന്നായി സെന്‍സര്‍ ചെയ്യണമെന്ന് കോടതി റിപ്പോര്‍ട്ടിംഗിനെക്കുറിച്ച് എറണാകുളം പ്രസ്സ്‌ക്ലബില്‍ സംഘടിപ്പിച്ച സെമിനാറില്‍ സംസാരിക്കുകയായിരുന്ന ജസ്റ്റിസ് ബി. കെമാല്‍ പാഷ അഭിപ്രായപ്പെട്ടു. ചാനലുകള്‍ ഇക്കാര്യത്തില്‍ ശ്രദ്ധ പുലര്‍ത്തണമെന്നും കെമാല്‍ വ്യക്തമാക്കി. സീരിയലുകളിലെ ആശയങ്ങള്‍ വളരെ അപകടകരമാണ്. ഭാര്യ ഭര്‍ത്താവിനെ ചതിക്കുന്നു, ഭര്‍ത്താവ് ഭാര്യയെ ചതിക്കുന്നു, ഒളിച്ചോട്ടം, അബോര്‍ഷന്‍ എന്നിവയൊക്കെയാണ് ഇപ്പോള്‍ സീരിയലുകളിലെ പ്രധാന വിഷയങ്ങള്‍. പഴയ പൈങ്കിളി സാഹിത്യത്തിനെ കടത്തിവെട്ടുന്നവയാണ് നിലവിലുള്ള സീരിയലുകള്‍ എന്നും അദ്ദേഹം കൂട്ടി ചേര്‍ത്തു. ഒരു വലിയ കലാകാരന്‍ തന്നോട് പരാതി പറഞ്ഞതു കൊണ്ടാണ് താന്‍ ഇക്കാര്യം ചൂണ്ടിക്കാണിക്കുന്നതെന്നും ജസ്റ്റിസ് വ്യക്തമാക്കി. നാട്ടില്‍ നടക്കുന്ന കാര്യങ്ങളെക്കുറിച്ച് ജഡ്ജിമാര്‍ അറിഞ്ഞിരിക്കണം. നാട്ടില്‍ നടക്കുന്നതെല്ലാം വിളിച്ച് പറയാന്‍ ജഡ്ജിമാര്‍ക്ക് അധികാരമില്ലെന്നും ജഡ്ജിമാരുടെ വ്യക്തിപരമായ അഭിപ്രായങ്ങള്‍ക്ക് പ്രസക്തിയില്ലെന്നും അദ്ദേഹം കൂട്ടിച്ചേര്‍ത്തു.

ഇപ്പോള്‍ സീരിയലുകള്‍ ഒരുപാട് ക്രൂരതകളാണ് കാണിക്കുന്നത്. ഭീകരസംഘടനകളെക്കുറിച്ചും ഏതോ ഭീകരനെ രക്ഷപ്പെടുത്താന്‍ കഴുത്തില്‍ കത്തിവെച്ചുകൊണ്ടിരിക്കുന്നതുമാണ് കുട്ടികളേയും സ്ത്രീകളേയും കാണിക്കുന്നത്. മാസങ്ങളോളമാണ് ഇത് കാണിക്കുന്നത്. നിര്‍ബന്ധമായും ചാനലുകള്‍ ഇക്കാര്യത്തില്‍ ശ്രദ്ധിക്കണം. അദ്ദേഹം സൂചിപ്പിച്ചു. ആരേയും വിമര്‍ശിക്കാനല്ല, മാധ്യമങ്ങളുടെ സാമൂഹ്യ പ്രതിബദ്ധതയെക്കുറിച്ച് ഓര്‍മിപ്പിക്കാനാണ് താന്‍ ഇക്കാര്യങ്ങള്‍ പറയുന്നത്. 

കോടതി റിപ്പോര്‍ട്ടിംഗില്‍ മാധ്യമങ്ങള്‍ ശ്രദ്ധ പുലര്‍ത്തണമെന്നും അദ്ദേഹം പറഞ്ഞു. കോടതി രേഖയില്‍ വരുന്ന കാര്യങ്ങള്‍ മാത്രമെ റിപ്പോര്‍ട്ട് ചെയ്യാവു. ഓപ്പണ്‍ കോര്‍ട്ടിലെ കോടതി പരാമര്‍ശങ്ങള്‍ റിപ്പോര്‍ട്ട് ചെയ്യുന്നതില്‍ തെറ്റില്ല. കോടതിയില്‍ എന്ത് നടക്കുന്നുവെന്ന് ജനങ്ങള്‍ അറിയണം. എന്നാല്‍ ആരേയും അവഹേളിക്കാതിരിക്കാനും ആക്ഷേപിക്കാതിരിക്കാനും മാധ്യമങ്ങള്‍ ശ്രദ്ധിക്കണം. ലൈവ് റിപ്പോര്‍ട്ടിംഗില്‍ ചാനലുകള്‍ വളരെ ശ്രദ്ധിക്കണം. മുംബൈ താജ് അക്രമണവേളയില്‍ ലൈവ് റിപ്പോര്‍ട്ടിംഗിന്റെ ദൂഷ്യഫലം നാം മനസിലാക്കിയതാണെന്നും ജസ്റ്റിസ് ചൂണ്ടിക്കാട്ടി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha