പൂരത്തിനു വിളംബരം അറിയിച്ച് ഇന്നു വടക്കുന്നാഥ ക്ഷേത്രത്തിന്റെ തെക്കേ ഗോപുരനട തുറക്കും. നാളെ തൃശൂര്‍ പൂരം. പൂരത്തിനു കാത്തുവച്ചിരിക്കുന്ന വര്‍ണ വിസ്മയങ്ങളുടെ രഹസ്യങ്ങള്‍ വെളിപ്പെടുത്താതെ ഇരു ദേശങ്ങളുടെയും സാംപിള്‍ വെടിക്കെട്ട് ഇന്നലെ വൈകുന്നേരം നടന്നു. തിരുവമ്പാടിയുടെ സാംപിള്‍ മൂന്നു മിനിറ്റും പാറമേക്കാവിന്റേത് 6 മിനിറ്റും ആയിരുന്നു.

മാനത്തു വിരിഞ്ഞ മാരിവില്ലുകള്‍ ജനം മനസ്സില്‍ നിറച്ചു. നെയ്തലക്കാവിലമ്മയുടെ തിടമ്പേന്തി വടക്കുന്നാഥ ക്ഷേത്രത്തിലേക്ക് എഴുന്നള്ളുന്ന എറണാകുളം ശിവകുമാറാണ് ഇന്നു രാവിലെ 11.30ന് തെക്കേ ഗോപുരനട തുറക്കുക. ഇന്നലെ കൗസ്തുഭം ഓഡിറ്റോറിയത്തില്‍ ആരംഭിച്ച തിരുവമ്പാടി വിഭാഗത്തിന്റെയും അഗ്രശാലയില്‍ ആരംഭിച്ച പാറമേക്കാവ് വിഭാഗത്തിന്റെയും ആനച്ചമയ പ്രദര്‍ശനങ്ങള്‍ ഇന്നും തുടരും.

ആനകളുടെ ഫിറ്റ്‌നസ് പരിശോധനയും ആനകളുടെ പ്രദര്‍ശനവും ഇന്നു തേക്കിന്‍കാട് മൈതാനിയില്‍ നടക്കും. നാളെ രാവിലെ 7.30 മുതല്‍ ഘടകപൂരങ്ങള്‍ വടക്കുന്നാഥനിലേക്ക് എഴുന്നള്ളിയെത്തും.

11ന് നടുവില്‍ മഠത്തിനു മുന്‍പില്‍ മഠത്തില്‍ വരവു പഞ്ചവാദ്യവും ഉച്ചയ്ക്ക് 12.30ന് പാറമേക്കാവ് ക്ഷേത്രത്തിനു മുന്‍പില്‍ ചെമ്പട മേളവും അരങ്ങേറും. ഉച്ചയ്ക്ക് 2.10ന് വടക്കുന്നാഥ ക്ഷേത്രത്തില്‍ ഇലഞ്ഞിത്തറ മേളം.

തുടര്‍ന്നു തെക്കേനടയില്‍ കുടമാറ്റം. തിങ്കള്‍ പുലര്‍ച്ചെ 3ന് വെടിക്കെട്ട്. തിങ്കളാഴ്ച പകല്‍പ്പൂരത്തിനു ശേഷം ദേവിമാര്‍ ഉപചാരം ചൊല്ലി പിരിഞ്ഞു കഴിഞ്ഞും വെടിക്കെട്ട് ഉണ്ടാകും.

അതേസമയം തൃശൂര്‍ പൂരത്തോടനുബന്ധിച്ച് ഏപ്രില്‍ 30, മെയ് 1 തീയതികളില്‍ ഏതാനും തീവണ്ടികള്‍ക്ക് പൂങ്കുന്നത്ത് പ്രത്യേക സ്റ്റോപ്പ് അനുവദിച്ചുകൊണ്ട് റെയില്‍വേ. എറണാകുളം - കണ്ണൂര്‍ ഇന്റര്‍ സിറ്റി (16305) രാവിലെ 7.19നും, നാഗര്‍കോവില്‍ - മംഗലാപുരം പരശുറാം എക്സ്പ്രസ് (16649) ഉച്ചയ്ക്ക് 12.31നും, മംഗലാപുരം - നാഗര്‍കോവില്‍ പരശുറാം എക്സ്പ്രസ് (16649) ഉച്ചയ്ക്ക് 11.54നും, കണ്ണൂര്‍ - എറണാകുളം ഇന്റര്‍ സിറ്റി (16306)വൈകുന്നേരം 18.28നും പൂങ്കുന്നത്ത് നിര്‍ത്തും.