ലോകകപ്പിന്റെ രണ്ടാം സെമിയിൽ നിലവിലെ ചാംപ്യന്മാരായ അർജന്റീന മുൻ ചാംപ്യന്മാരായ ഇംഗ്ലണ്ടിനെ നേരിടും. അറ്റ്‌ലാന്റയിൽ ഇന്നു രാത്രി 12.30 നാണ് ( വ്യാഴം പുലർച്ചെ) മത്സരം നടക്കുക.

ഫോക്ലൻഡ് യുദ്ധവും ദൈവത്തിന്റെ കൈ ഗോളും ചരിത്ര പശ്ചാത്തലമൊരുക്കുന്ന, ഈ ലോകകപ്പിലെ ഏറ്റവും ആവേശകരമായ മത്സരത്തിനാകും കിക്കോഫ്. ലാറ്റിനമേരിക്കയും യൂറോപ്പും തമ്മിലുള്ള പോരാട്ടം കൂടിയാണിന്ന് നടക്കുന്നത്.

നിലവിലെ ചാമ്പ്യൻമാരായ അർജന്റീന തുടർച്ചയായ രണ്ടാം ഫൈനലാണ് ലക്ഷ്യമിടുന്നത്. അർജന്റീന ക്യാപ്റ്റൻ ലയണൽ മെസിയുടെ ഇംഗ്ലണ്ടിനെതിരായ ആദ്യ മത്സരം കൂടിയാണിത്.

കിടിലൻ ഫോമിൽ നിൽക്കുന്ന മെസിയിലാണ് അർജന്റീനൻ ആരാധകരുടെ മുഴുവൻ പ്രതീക്ഷയും. ഒറ്റ നിമിഷം കൊണ്ട് കളിയുടെ ഗതി മാറ്റാനായി ശേഷിയുള്ള പ്രതിഭയാണ് മെസി. അഞ്ചുകളിൽ തുടർച്ചയായി ഗോൾ നേടി മെസി ടീമിനെ മുന്നിൽ നിന്ന് നയിക്കുന്നു. മനക്കരുത്തും വ്യക്തിഗത മികവും അർജന്റീനയ്ക്ക് മുൻതൂക്കം നൽകുകയും ചെയ്യും.