മണ്ണാര്‍ക്കാട് കുഴല്‍ കിണര്‍ അറ്റകുറ്റപ്പണി നടത്തുന്നതിനിടെ ചെയിന്‍ ബ്ലോക്ക് പൊട്ടിവീണ് യുവാവിന് ദാരുണാന്ത്യം. ഒരാള്‍ക്ക് പരുക്കേറ്റു. ചിറക്കല്‍പ്പടി കുഴിയില്‍പ്പീടിക അമാനുല്ലയുടെയും നബീസുവിന്റെയും മകന്‍ മൊയ്തീന്‍ (24) ആണ് മരിച്ചത്.

തെങ്കര മണലടി ആട്ടം പള്ളി രവിയുടെ മകന്‍ ശ്രീജിത്തിനെ പരുക്കുകളോടെ വട്ടമ്പലം സ്വകാര്യ ആശുപത്രിയില്‍ പ്രവേശിപ്പിച്ചു.

റിപ്പയര്‍ ചെയ്യുന്നതിനിടെ ചെയിന്‍ ബ്ലോക്ക് പൊട്ടി ഇരുവരുടെയും തലയില്‍ വീഴുകയായിരുന്നു. ഇന്നലെ രാത്രി 8 മണിയോടെ കോടതിപടി ഹാര്‍മണി അപ്പാര്‍ട്ട്‌മെന്റിലെ കുഴല്‍ കിണര്‍ തകരാറിലായത്.

അതേസമയം വര്‍ക്കലയില്‍ ട്രാക്ക് മുറിച്ചു കടക്കുന്നതിനിടെ തീവണ്ടിയുടെ എന്‍ജിനില്‍ കുടുങ്ങി വയോധികന് ദാരുണാന്ത്യം. വര്‍ക്കല മുട്ടപ്പലം തച്ചോട് കുന്നുവിള വീട്ടില്‍ ഭാനു(65)വാണ് മരിച്ചത്.

ഇന്നലെ രാവിലെ 9.20-ഓടെ പുന്നമൂട് റെയില്‍വേ ഗേറ്റിനും സ്റ്റാര്‍ തിേയറ്റര്‍ ഗേറ്റിനും മധ്യേയായിരുന്നു അപകടം. ഭാനു ട്രാക്ക് മുറിച്ചുകടക്കുമ്പോള്‍ ഗുരുവായൂര്‍-തിരുവനന്തപുരം ഇന്റര്‍സിറ്റി എക്സ്പ്രസിനു മുന്നില്‍ അകപ്പെടുകയായിരുന്നു. തീവണ്ടി തട്ടി തെറിച്ച ഭാനു, എന്‍ജിന്റെ മുന്‍ഭാഗത്തെ കൂര്‍ത്ത കമ്പിയിലാണ് കുടുങ്ങിയത്.

വയറ്റിലൂടെ കമ്പി തുളച്ചുകയറി തല്‍ക്ഷണം മരിച്ചു. വര്‍ക്കല റെയില്‍വേ സ്റ്റേഷനിലെ രണ്ടാം പ്ലാറ്റ്‌ഫോം തുടങ്ങുന്ന ഭാഗത്താണ് തീവണ്ടി നിര്‍ത്തിയത്. വര്‍ക്കല പോലീസും അഗ്നിരക്ഷാസേനയുമെത്തി ഏറെ പരിശ്രമിച്ചാണ് മൃതദേഹം എന്‍ജിനില്‍ നിന്നു വേര്‍പെടുത്തിയത്. അപകടത്തെ തുടര്‍ന്ന് തീവണ്ടി അരമണിക്കൂറിലധികം വര്‍ക്കലയില്‍ പിടിച്ചിടുകയായിരുന്നു