കെ.എസ്.ആര്.ടി.സി. സ്വിഫ്റ്റില് ഡ്രൈവര്മാരായി വനിതകളെയും നിയമിക്കുന്നു....തിരുവനന്തപുരം നഗരത്തിലോടുന്ന വൈദ്യുതബസുകളിലേക്കാകും നിയോഗിക്കുക
കെ.എസ്.ആര്.ടി.സി. സ്വിഫ്റ്റില് ഡ്രൈവര്മാരായി വനിതകളെയും നിയമിക്കുന്നു. തിരുവനന്തപുരം നഗരത്തിലോടുന്ന വൈദ്യുതബസുകളിലേക്കാകും നിയോഗിക്കുക.
400 ഡ്രൈവര്മാരുടെ ഒഴിവുകളാണുള്ളത്. വനിതകള്ക്കുശേഷമുള്ള ഒഴിവുകളാകും പുരുഷന്മാര്ക്ക് നല്കുക. കേന്ദ്രാവിഷ്കൃത പദ്ധതിയില് എത്തുന്ന വൈദ്യുതബസുകളിലേക്കാണ് പുതിയ ഡ്രൈവര്മാരെ വേണ്ടത്. ഒമ്പതുമീറ്റര് നീളമുള്ള ചെറിയ ബസുകളാണ് നഗരത്തില് ഉപയോഗിക്കുന്നത്. മാതൃസ്ഥാപനമായ കെ.എസ്.ആര്.ടി.സി.യില് വനിതാ കണ്ടക്ടര്മാര് ഏറെയുണ്ടെങ്കിലും ഡ്രൈവര്മാര് വളരെ വിരളമാണ്. കര്ശനവ്യവസ്ഥകളോടെയാണ് നിയമനം നടത്തുക.
രാവിലെ അഞ്ചുമുതല് രാത്രി പത്തുവരെ വിവിധ ഡ്യൂട്ടികളില് ജോലിചെയ്യേണ്ടിവരും. ഹെവി ഡ്രൈവിങ് ലൈസന്സുള്ളവര്ക്കും ഹെവി ലൈസന്സിനായി അപേക്ഷിച്ചിട്ടുള്ളവര്ക്കും നിയമനസാധ്യതയുണ്ട്.
ഹെവി ലൈസന്സില്ലാത്തവര്ക്ക് കെ.എസ്.ആര്.ടി.സി. ഒരുമാസം പരിശീലനം നല്കും. ഇത്തരത്തില് നിയമനം നേടുന്നവര് 12 മാസം തുടര്ച്ചയായി ജോലിചെയ്യേണ്ടതാണ്. മാസം കുറഞ്ഞത് 16 ഡ്യൂട്ടി നിര്ബന്ധമാണ്. ജോലിയില് പ്രവേശിക്കുമ്പോള് 30,000 രൂപ സുരക്ഷാനിക്ഷേപം നല്കണം. മാസം മിനിമം ഡ്യൂട്ടി ചെയ്യാത്തവരില്നിന്ന് ഈ തുക നഷ്ടപരിഹാരമായി ഈടാക്കും.
ഒരുമാസത്തെ പരിശീലനത്തിനുശേഷം ഹെവി ലൈസന്സ് നേടാന് കഴിയാത്തവര്ക്കും സുരക്ഷാനിക്ഷേപം നഷ്ടമാകും. എട്ടുമണിക്കൂര് ഡ്യൂട്ടിക്ക് 715 രൂപയും അലവന്സുകളും ലഭിക്കും. അധികം ജോലിചെയ്യുന്ന ഓരോ മണിക്കൂറിനും 130 രൂപ വീതം ലഭിക്കും. ബസ് വൃത്തിയായി സൂക്ഷിക്കുക, യാത്രക്കാരോട് മാന്യമായി പെരുമാറുക, ടയര് പഞ്ചറായാല് മാറ്റിയിടാന് കണ്ടക്ടറെ സഹായിക്കുക തുടങ്ങി കര്ശനവ്യവസ്ഥകളോയാണ് നിയമനം. യാത്രക്കാരോട് മോശമായി പെരുമാറിയെന്ന് കണ്ടെത്തിയാല് നോട്ടീസ് നല്കാതെ പിരിച്ചുവിടുന്നതാണ്.
https://www.facebook.com/Malayalivartha
