ബിബിസി ഡോക്യുമെന്ററിയ്‌ക്കെതിരെ രംഗത്തെത്തിയ അനില്‍ ആന്റണിയെ കോണ്‍ഗ്രസുകള്‍ എടുത്തുടുക്കുന്ന കാഴ്ചയാണ് നമ്മള്‍ കണ്ടത്. ആ വേദനയില്‍ അനില്‍ കോണ്‍ഗ്രസ് വിട്ട് ബിജെപിയില്‍ ചേര്‍ന്നു. ഇപ്പോഴിതാ മധുര പ്രതികാരത്തിനുള്ള അവസരമാണ് വന്നെത്തിയിരിക്കുന്നത്.

സുപ്രീംകോടതി നിഗമനങ്ങളെ അട്ടിമറിക്കാനുള്ള ശ്രമമായിട്ടു പോലും ബി.ബി.സി ഡോക്യുമെന്ററിക്കു വേണ്ടി വാദിച്ചവരാണ് ഇപ്പോള്‍ കേരള സ്റ്റോറി എന്ന സിനിമ നിരോധിക്കണമെന്ന് ആവശ്യപ്പെടുന്നതെന്ന് അനില്‍ കെ. ആന്റണി പറഞ്ഞു.

ഫേസ്ബുക്ക് കുറിപ്പിലാണ് അനില്‍ ആന്റണി നിലപാട് വ്യക്തമാക്കിയത്. കേരള സ്റ്റോറി പറയുന്നത് കേരളത്തിലെ ചില പെണ്‍കുട്ടികള്‍ നേരിട്ട പരീക്ഷണങ്ങളും കഷ്ടപ്പാടുകളും ചൂണ്ടിക്കാട്ടുന്ന ചില സാമൂഹിക പ്രശ്‌നങ്ങളാണ് അവര്‍ ഉയര്‍ത്തിക്കാട്ടുന്നത്. സി.പി.എമ്മിന്റെയും കോണ്‍ഗ്രസിന്റെയും സ്വാതന്ത്ര്യത്തിന് വേണ്ടിയുള്ള ഏതുപോരാട്ടവും കപട രാഷ്ട്രീയ നേട്ടങ്ങള്‍ക്ക് വേണ്ടി മാത്രമുള്ളതാണെന്ന് അനില്‍ ആന്റണി ഫേസ്ബുക്ക് പോസ്റ്റില്‍ കുറിച്ചു.

ഇതിനിടെ കക്കുകളി വിവാദവും ചര്‍ച്ചയായി. കക്കുകളി നാടക വിവാദത്തില്‍ പ്രതികരണവുമായി സംവിധായകന്‍ ജോബ് മഠത്തില്‍ രംഗത്തെത്തി. നാടകം കാണാതെയാണ് വിമര്‍ശിക്കുന്നത്. വിശ്വാസികളാണ് നാടകത്തെ ചേര്‍ത്തു പിടിക്കുന്നതെന്നും ജോബ് മഠത്തില്‍ പറഞ്ഞു. കക്കുകളി അടങ്ങിയ കഥാസമാഹാരത്തിന് കെസിബിസിയുടെ അവാര്‍ഡ് ലഭിച്ചിരുന്നു എന്നും ജോബ് വെളിപ്പെടുത്തി. ഈ വാദങ്ങളുന്നയിക്കുന്ന ആരും തന്നെ നാടകം കണ്ടിട്ടില്ലെന്നും ജോബ് പറഞ്ഞു.

കക്കുകളി നാടകത്തിനെതിരെ വന്‍ പ്രതിഷേധമാണ് ഉയരുന്നത്. കക്കുകളി നാടകത്തിന് പ്രദര്‍ശനാനുമതി നിഷേധിക്കണമെന്ന് സര്‍ക്കാരിനോട് ആവശ്യപ്പെട്ടിരിക്കുകയാണ് കെസിബിസി. സഭയെ പിന്തുണച്ച കോണ്‍ഗ്രസ് നാടകം ആശങ്കാജനകമാണെന്ന് പ്രതികരിച്ചു. ക്രൈസ്തവ സന്യാസത്തെ അപകീര്‍ത്തിപ്പെടുത്തുകയും ഇതര മതവിഭാഗങ്ങളില്‍ തെറ്റിദ്ധാരണ ജനിപ്പിക്കുകയും ചെയ്യുന്ന 'കക്കുകളി' നാടകത്തിന്റെ പ്രദര്‍ശനാനുമതി നിഷേധിക്കണമെന്ന് കെ.സി.ബി.സി പ്രസിഡന്റ് കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ സര്‍ക്കാരിനോട് ആവശ്യപ്പെട്ടു.

ക്രിസ്തീയ വിശ്വാസത്തെ സംബന്ധിച്ച് അതിന്റെ ഏറ്റവും സൗന്ദര്യമുള്ള ഭാവമാണ് സന്യാസം. ലോകം മുഴുവനും ക്രിസ്തീയ സന്യാസ സമൂഹങ്ങള്‍ നല്‍കിയിട്ടുള്ള സംഭാവനകള്‍ എത്രയോ വലുതാണ്. വിദ്യാഭ്യാസം, ആതുരസേവനം, സാമൂഹിക സേവനം, രോഗീ ശുശ്രൂഷ തുടങ്ങിയ മേഖലകളില്‍ നൂറ്റാണ്ടുകളായി അവര്‍ നല്‍കിക്കൊണ്ടിരിക്കുന്ന കാരുണ്യത്തിന്റെ പ്രവര്‍ത്തികളെ തമസ്‌കരിക്കുകയും തെറ്റിദ്ധാരണ പരത്തുന്ന തരത്തില്‍ കഥകള്‍ ഉണ്ടാക്കി പ്രസിദ്ധീകരിക്കുകയും ചെയ്യുക എന്നുള്ളത് ആരുടെയോ രഹസ്യ അജണ്ടയാണെന്നും അദ്ദേഹം വ്യക്തമാക്കി.

സര്‍ക്കാരും പ്രതിപക്ഷ കക്ഷികളും ഈ അജണ്ടയുടെ അര്‍ഥം ഇനിയും മനസിലാക്കിയിട്ടുണ്ടോ എന്നു സംശയമാണ്. ഈ നാടകം കളിക്കണമെന്ന് ആവശ്യപ്പെടുന്നവര്‍ ക്രൈസ്തവര്‍ക്കെതിരെയുള്ള വെറുപ്പിന്റെ വക്താക്കളാണ്. നാഴികയ്ക്ക് നാല്‍പ്പത് പ്രാവശ്യം മതേരതരത്വത്തെക്കുറിച്ചും ന്യൂനപക്ഷ പ്രേമത്തെക്കുറിച്ചും വാതോരാതെ സംസാരിക്കുന്നവര്‍ ഈ കാര്യത്തില്‍ എടുത്തിരിക്കുന്ന നിലപാട് അങ്ങേയറ്റം വേദനാജനകമാണ്. ശാരീരികമായി ആക്രമിക്കുന്നതിന് തുല്യമായി സഭ ഇത്തരം നടപടികളെ കാണുന്നു. കക്ഷിരാഷ്ട്രീയ ഭേദമന്യേ കേരളത്തിലെ എല്ലാ രാഷ്ട്രീയ പാര്‍ട്ടികളുടെയും നിലപാട് ഈ കാര്യത്തില്‍ അറിയുവാന്‍ സഭയ്ക്ക് താല്‍പര്യമുണ്ടെന്നും അദ്ദേഹം പറഞ്ഞു.

അതേസമയം 'ദ് കേരള സ്റ്റോറി'ക്ക് 'എ' സര്‍ട്ടിഫിക്കറ്റോടെ പ്രദര്‍ശനാനുമതി നല്‍കി സെന്‍സര്‍ ബോര്‍ഡ്. 10 മാറ്റങ്ങളും നിര്‍ദേശിച്ചിട്ടുണ്ട്. വിപുല്‍ അമൃത്ലാല്‍ ഷാ പ്രൊഡക്ഷന്റെ ബാനറില്‍ സുദീപ്‌തോ സെന്‍ സംവിധാനം ചെയ്ത സിനിമ കേരളത്തെ അധിക്ഷേപിക്കുന്നതാണ് എന്നാണു വിമര്‍ശനം. കേരളത്തിലും പുറത്തും വലിയ പ്രതിഷേധമുണ്ട്. സിനിമ നിരോധിക്കണമെന്നും ആവശ്യമുയര്‍ന്നു.