നൂലുകെട്ട് മുതൽ പാലുകാച്ചിൽ വരെ.. വിവാഹ നിശ്ചയം മുതൽ വളക്കാപ്പ് വരെ.. അങ്ങനെയങ്ങനെ ഇന്നത്തെ കാലത്ത് എല്ലാം ആഘോഷമാണ്. ഫോട്ടോ ഷൂട്ടിന് വരെ പുതിയ പുതിയ തീം കണ്ടു പിടിക്കുന്ന തിരക്കിലാണ് ഇന്നത്തെ ജനറേഷൻ...ജീവിതത്തിലെ ഏത് പ്രധാന ചുവടുവയ്പ്പും ഫോട്ടോഷൂട്ടുമായാണ് നാമിന്ന് കൊണ്ടാടുന്നത്. ഇതിന്റെയെല്ലാം ചിത്രങ്ങൾ പകർത്തി സോഷ്യൽ മീഡിയ പ്രൊഫൈലുകളിൽ ചറപറാ പോസ്റ്റ് ചെയ്യാനും ഇഷ്ടപ്പെടുന്നവരുണ്ട്. ഇത്തരത്തിൽ സമൂഹമാദ്ധ്യമങ്ങളിൽ പോസ്റ്റ് ചെയ്ത ഒരു ഫോട്ടോഷൂട്ടാണ് ഏവരുടെയും ശ്രദ്ധപിടിച്ചുപറ്റുന്നത്. ജസ്റ്റ് മാരീഡ് എന്നൊക്കെ പറയുന്നത് പോലെ ജസ്റ്റ് ഡിവോഴ്‌സ്ഡ് ഫോട്ടോഷൂട്ട് നടത്തിയ യുവതിയാണ് സമൂഹമാദ്ധ്യമങ്ങളിലെ താരം..ഇന്ത്യയിൽ തന്നെ ആദ്യമായാണ് ഇത്തരത്തിൽ ഡിവോഴ്‌സ് സെലിബ്രേഷൻ ഫോട്ടോഷൂട്ട് നടത്തുന്നതെന്നാണ് റിപ്പോർട്ടുകൾ സൂചിപ്പിക്കുന്നത്. ചെന്നൈ സ്വദേശിയും ടെലിവിഷൻ താരവുമായ ശാലിനിയാണ് കക്ഷി. ഒരു പെൺകുട്ടിയുടെ അമ്മ കൂടിയാണ് ശാലിനി. ഇവരുടെ രണ്ടാം വിവാഹ ബന്ധം തകർന്നതിന് പിന്നാലെയാണ് ഡിവോഴ്‌സ് ഫോട്ടോ ഷൂട്ട് നടത്തിയതെന്നാണ് വിവരം.നിങ്ങളുടെ ജീവിതത്തെ നിയന്ത്രിക്കുന്ന വ്യക്തി അത് നിങ്ങൾ തന്നെയാകണമെന്ന് ശാലിനി പറയുന്നു. മോശം ദാമ്പത്യബന്ധമാണെങ്കിൽ അത് വിട്ട് പോകുക എന്നുള്ളത് സാധാരണമായ കാര്യമാണ്. നിങ്ങൾ സന്തോഷവതിയായിരിക്കാൻ അർഹിക്കുന്നുവെന്ന് ഉറച്ചുവിശ്വസിക്കുക.

ഡിവോഴ്‌സ് ഒരിക്കലും പരാജയത്തിന്റെ പ്രതീകമല്ല. നിങ്ങളുടെ ജീവിതത്തിലെ നല്ലതായ ഒരുപാട് മാറ്റങ്ങൾ കൊണ്ടുവരുന്നതിനുള്ള ടർണിങ് പോയിന്റാണെന്നും ശാലിനി പറഞ്ഞു. ഇൻസ്ര്‌റഗ്രാം പോസ്റ്റിലൂടെയായിരുന്നു യുവതിയുടെ പ്രതികരണം.വിവാഹ മോചനമെന്നത് ഏതൊരു വ്യക്തിയെ സംബന്ധിച്ചിടത്തോളവും വേദനാജനകമാണ്. പലർക്കും വിവാഹ മോചനമെന്ന തീരുമാനം എടുക്കാൻ പോലും ധൈര്യമുണ്ടാകാറില്ല. എന്നാൽ അവയിൽ നിന്നൊക്കെ വ്യത്യസ്തമായി വിവാഹ മോചനം ആഘോഷമാക്കുന്ന യുവതിയുടെ ചിത്രങ്ങൾ സമൂഹമാധ്യമങ്ങളിൽ അടക്കം വൈറലാണ്..കഴിഞ്ഞ കുറച്ചു ദിവസങ്ങൾക്ക് മുൻപും ഇത്തരത്തിൽ ഡിവോഴ്സ് ആഘോഷമാക്കിയ യുവതിയുടെ ചിത്രങ്ങളും സമൂഹമാധ്യമങ്ങളിൽ വൈറലായിരുന്നു..യുഎസിലാണ് കൗതുകകരമായ സംഭവം നടന്നത്. 31 കാരിയായ ലോറൻ ബ്രൂക്കാണ് നീണ്ട പത്തുവർഷത്തെ ദാമ്പത്യ ബന്ധത്തിൽ നിന്നുള്ള വേർപിരിയൽ ആഘോഷമാക്കിയത്. വിവാഹ വസ്ത്രം കത്തിച്ചും,ഒന്നിച്ചുള്ള ചിത്രങ്ങൾ നശിപ്പിച്ചും അതിന്റെ ഫോട്ടോഷൂട്ട് നടത്തിയുമാണ് യുവതിയുടെ ആഘോഷം. 2012-ൽ വിവാഹിതയായ ലോറൻ 2021 സെപ്റ്റംബറിൽ ഭർത്താവുമായി വേർപിരിഞ്ഞു. ശേഷം നടന്ന നിയമ പോരാട്ടങ്ങൾക്കൊടുവിൽ 2023 ജനുവരിയിൽ നിയമപരമായി പിരിഞ്ഞതാണ് യുവതി ആഘോഷമാകുന്നത്.

“വിവാഹമോചനം എന്നത് വേദനാജനകമായ വസ്തുതയാണ്, എന്നാൽ ഏത് കഠിനമായ സാഹചര്യവും തരണം ചെയ്യുക എന്ന സന്ദേശമാണ് ഞാൻ ഇതിലൂടെ ഉദ്ദേശിക്കുന്നത്. വിവാഹ ബന്ധത്തിലെ പരാജയത്തിൽ മാനനൊന്ത്‌ എന്നും രാവിലെ എഴുന്നേറ്റു കരയുന്ന ദിവസങ്ങളുണ്ടായിരുന്നു. എന്റെ ജീവിതം ഇനി മെച്ചപ്പെടില്ലെന്ന് കരുതിയ സമയങ്ങളുണ്ട്, അതിൽ നിന്നെല്ലാം മോചനം നേടണം, ഇന്ന് ഞങ്ങൾ വിവാഹമോചനം നേടി, കുട്ടികളെ വളർത്താൻ ജീവിതകാലം മുഴുവൻ പരസ്പരം പ്രവർത്തിക്കണം. ഞാൻ അതിനെയും അതിജീവിച്ചു, എല്ലാ പ്രതിസന്ധികളെയും തരണം ചെയ്യാനുള്ള ധൈര്യം എനിക്ക് ഇന്നുണ്ട്. ഇനി രാവിലെ എഴുന്നേറ്റാൽ കരയില്ല. ”ലോറൻ മിറർ യുകെയോട് പറഞ്ഞു.ലോറന്റെ "ശാക്തീകരണ" ഫോട്ടോഷൂട്ടിൽ നിന്നുള്ള ചിത്രങ്ങൾ പബ്ലിറ്റി എന്ന പേജ് ഇൻസ്റ്റാഗ്രാമിൽ പങ്കിട്ടു. ലോറൻ ചുവന്ന വസ്ത്രം ധരിച്ച് അവളുടെ വിവാഹ ഫോട്ടോ കീറുന്നതും, വിവാഹ വസ്ത്രം കത്തിക്കുന്നതുമായ ചിത്രങ്ങൾ അതിലൂടെ പങ്കുവെച്ചിട്ടുണ്ട്. ഈ ചിത്രങ്ങളും സമൂഹ മാധ്യമങ്ങളിൽ വൈറലാണ്..