ഏപ്രിൽ മാസത്തെ ജിഎസ്ടി വരുമാനത്തിൽ റെക്കോർഡ് നേട്ടമെന്ന് ധനമന്ത്രാലയം. 2023 ഏപ്രിലിൽ 1.87 ലക്ഷം കോടി രൂപയാണ് ജിഎസ്ടി ഇനത്തിൽ ലഭിച്ചതെന്നും കേന്ദ്രസർക്കാർ വ്യക്തമാക്കി. കഴിഞ്ഞ സാമ്പത്തിക വർഷത്തേക്കാൾ 12 ശതമാനം വർധനവാണ് ഇത്തവണ നേടിയതെന്നും റിപ്പോർട്ടുകൾ സൂചിപ്പിക്കുന്നു. 2022 ഏപ്രിലിൽ നേടിയ ജിഎസ്ടി വരുമാനത്തേക്കാൾ 19,495 കോടി രൂപ അധികമാണ് ഇത്തവണ ലഭിച്ചത്.

ഈ സാഹചര്യത്തിൽ 2023 ഏപ്രിലിലെ ജിഎസ്ടി വരുമാനം എക്കാലത്തെയും ഉയർന്ന വരുമാനമെന്ന് പ്രധാനമന്ത്രി നരേന്ദ്രമോദിയും ട്വീറ്റ് ചെയ്തിരിക്കുകയാണ്. 1.87 ലക്ഷം കോടി രൂപയാണ് ഇത്തവണ ലഭിച്ചത്. ഇത് ഇന്ത്യൻ സമ്പദ് വ്യവസ്ഥയ്‌ക്ക് വലിയ വാർത്തയാണെന്നും അദ്ദേഹം പറഞ്ഞു. ‘ഇന്ത്യൻ സമ്പദ് വ്യവസ്ഥയ്‌ക്ക് ശുഭകരമായ വാർത്ത! കുറഞ്ഞ നികുതി നിരക്കുകൾക്കിടയിലും വർദ്ധിച്ചുവരുന്ന നികുതി പിരിവ്, ജിഎസ്ടി എങ്ങനെ സംയോജനവും സാമ്പത്തിക അച്ചടക്കവും വർദ്ധിപ്പിച്ചു എന്നതിന്റെ വിജയമാണ് ഇത് കാണിക്കുന്നത്,’ പ്രധാനമന്ത്രി ട്വീറ്റ് ചെയ്തു.

2023 ഏപ്രിലിലെ മൊത്തം ജിഎസ്ടി കളക്ഷൻ 1,87,035 കോടി രൂപയാണ്. ഇതുവരെയുള്ളതിൽ റെക്കോർഡ് തുകയാണിത്. 2022 ഏപ്രിലിൽ ലഭിച്ചത് 1,67,540 കോടി രൂപയായിരുന്നു. ഇതിനേക്കാൾ 19,495 കോടി രൂപ അധികമാണ് ഇത്തവണ ലഭിച്ചിരിക്കുന്നത്. ഈ വർഷം ഏപ്രിലിലെ ജിഎസ്ടി വരുമാനം മുൻവർഷങ്ങളിലേക്കാൾ 12 ശതമാനം കൂടുതലാണ്.

കഴിഞ്ഞ മാസം ഏപ്രിൽ 20-ന് മാത്രം 9.8 ലക്ഷം ഇടപാടുകൾ നടന്നിരുന്നു. ഇതിലൂടെ ഒരു ദിവസം കൊണ്ട് മാത്രം ലഭിച്ച ഏറ്റവും ഉയർന്ന നികുതി 68,228 കോടി രൂപയാണ്. ഏപ്രിലിൽ ലഭിച്ച ജിഎസ്ടി വരുമാനത്തിൽ, സിജിഎസ്ടി 38,440 കോടിയും, എസ്ജിഎസ്ടി 47,412 കോടിയും, ഐജിഎസ്ടി 89,158 കോടിയും ( ചരക്കുകളുടെ ഇറക്കുമതിയിൽ നിന്ന് പിരിച്ചെടുത്തത് 34,972 കോടിയുൾപ്പെടെ) സെസ് 12,025 കോടി രൂപയുമാണ്.

2023 ഏപ്രിൽ 20നാണ് ഏറ്റവുമധികം ജിഎസ്ടി വരുമാനം ലഭിച്ചത്. അന്നേദിവസം മാത്രം 68,228 കോടി രൂപ ജിഎസ്ടി ഇനത്തിൽ ധനമന്ത്രാലയത്തിന് ലഭിച്ചു. ജിഎസ്ടി ശേഖരിക്കുന്നതിൽ ഏറ്റവുമധികം വളർച്ച രേഖപ്പെടുത്തിയ സംസ്ഥാനം സിക്കിമാണ്. ഏപ്രിൽ മാസത്തിൽ 426 കോടി രൂപ സിക്കിമിൽ നിന്ന് ലഭിച്ചിട്ടുണ്ട്. കഴിഞ്ഞ സാമ്പത്തിക വർഷമിത് 264 കോടി രൂപയായിരുന്നു.

ഗുജറാത്തിൽ നിന്നും 11,721 കോടി രൂപ (2022ൽ ഇത് 11,264 കോടി) ജിഎസ്ടി ഇനത്തിൽ ലഭിച്ചു. നാല് ശതമാനമാണ് വർധനവ് രേഖപ്പെടുത്തിയത്. അതേസമയം 10,035 കോടി രൂപ ഹരിയാന നൽകി. കഴിഞ്ഞ വർഷമിത് 8,197 കോടി രൂപയായിരുന്നു. 22 ശതമാനം വർധനവാണ് ഹരിയാന രേഖപ്പെടുത്തിയത്.