കോണ്‍ഗ്രസ് അനവസരത്തില്‍ നടത്തിയ പ്രകടന പത്രികയിലെ പ്രസ്താവന തിരിച്ച് കുത്തുകയാണ്. ബജ്റംഗ്ദള്‍, പിഎഫ്ഐ തുടങ്ങിയ സംഘടനകളെ നിരോധിക്കും. ജാതിയുടെയും മതത്തിന്റെയും പേരില്‍ സാമുദായികവിദ്വേഷം പരത്തുന്നത് തടയുന്നതിന് കര്‍ശന നടപടിയെടുക്കും എന്നാണ് കോണ്‍ഗ്രസിന്റെ വാഗ്ദാനം. ബജ്റങ്ദള്‍ നിരോധിക്കുമെന്ന കോണ്‍ഗ്രസ് വാഗ്ദാനത്തിനെതിരെ പ്രതിഷേധം ശക്തമായി. ഇതിനെത്തുടര്‍ന്ന് സോണിയയുടെ വസതിക്കും കോണ്‍ഗ്രസ് ആസ്ഥാനത്തിനും കനത്ത സുരക്ഷയൊരുക്കി. മാത്രമല്ല അവസരം മുതലെടുത്ത് വോട്ടാക്കാനും ബിജെപി ശ്രമിക്കുന്നു.

അതേസമയം കര്‍ണാടക നിയമസഭാ തിരഞ്ഞെടുപ്പിനുള്ള കോണ്‍ഗ്രസ് പ്രകടന പത്രികയിലെ ബജ്റങ്ദള്‍ നിരോധനമെന്ന വാഗ്ദാനത്തിനെതിരെ പ്രധാനമന്ത്രി നരേന്ദ്ര മോദി. ഹനുമാന്റെ നാട്ടില്‍ ആദരവ് അര്‍പ്പിക്കാനായി താന്‍ എത്തിയപ്പോള്‍ 'ജയ് ബജ്റംഗ്ബലി' എന്ന് വിളിക്കുന്നവരെ തടയുന്നതിനുള്ള പ്രകടനപത്രികയുമായി കോണ്‍ഗ്രസ് രംഗത്ത് വന്നിരിക്കുന്നത്.

നേരത്തെ തന്നെ ശ്രീരാമനെതിരെ നിലപാട് സ്വീകരിച്ച കോണ്‍ഗ്രസ് ഇപ്പോള്‍ 'ജയ് ബജ്റംഗ്ബലി' എന്ന് വിളിക്കുന്നവരെയും എതിര്‍ക്കുകയാണെന്ന് മോദി പറഞ്ഞു. ഈ രാജ്യത്തിന്റെ പൈതൃകത്തില്‍ കോണ്‍ഗ്രസിന് ഒരിക്കിലും അഭിമാനമുണ്ടായിരുന്നില്ല. 'കോണ്‍ഗ്രസ് ഇവിടെ ജയിച്ചാല്‍ പിഎഫ്‌ഐയുടെ നിരോധനം നീക്കും.

സിദ്ധരാമയ്യ ഭരിച്ച കാലത്ത് അഴിമതി മാത്രമാണ് സംസ്ഥാനത്ത് നടന്നിരുന്നത്. സാധാരണക്കാരുടെ വിശ്വാസം കോണ്‍ഗ്രസിന് നഷ്ടമായിരിക്കുന്നു. ഇപ്പോള്‍ വാഗ്ദാനങ്ങള്‍ നല്‍കാന്‍ മാത്രമാണ് കോണ്‍ഗ്രസിന്റെ ശ്രമം. പട്ടിണി മാറ്റുമെന്ന് കോണ്‍ഗ്രസ് വാഗ്ദാനം നല്‍കിയെങ്കിലും ഇതു വരെ നടപ്പാക്കുന്നതിന് സാധിച്ചിട്ടില്ല. അതേസമയം പട്ടിണി മാറ്റാന്‍ ഇറങ്ങിത്തിരിച്ച കോണ്‍ഗ്രസ് നേതാക്കള്‍ സമ്പന്നരായി. കര്‍ണാടകയിലെ ഡബിള്‍ എന്‍ജിന്‍ സര്‍ക്കാരിന്റെ പ്രാഥമിക ലക്ഷ്യം സാമൂഹിക നീതിയും സാമൂഹിക പുരോഗിതിയുമാണ്.

പാവപ്പെട്ടവരുടെ ഉന്നമനം, കര്‍ഷകരെ ശക്തിപ്പെടുത്തുക എന്നീ കാര്യങ്ങളില്‍ സര്‍ക്കാര്‍ അതീവശ്രദ്ധ പുലര്‍ത്തുന്നു. ഭീകരവാദത്തെ പ്രോത്സാഹിപ്പിക്കുന്ന നിലപാടാണ് കോണ്‍ഗ്രസ് കാലങ്ങളായി സ്വീകരിക്കുന്നത്. സര്‍ജിക്കല്‍ സ്‌ട്രൈക്കും എയര്‍ സ്‌ട്രൈക്കും നടത്തിയതിന് കോണ്‍ഗ്രസ് രാജ്യത്തെ പ്രതിരോധസേനകളെ പരിഹസിച്ചു. രാജ്യത്തെ ഒന്നാം നമ്പര്‍ സംസ്ഥാനമായി കര്‍ണാടകയെ മാറ്റുന്നതിനുള്ള പദ്ധതിയാണ് ബിജെപി പ്രകടനപത്രികയിലൂടെ ജനങ്ങള്‍ക്ക് മുന്നില്‍വച്ചിരിക്കുന്നതെന്നും മോദി പറഞ്ഞു.

ഏകീകൃത സിവില്‍ കോഡ്, ഉത്പദാന മേഖലയില്‍ പത്ത് ലക്ഷം തൊഴില്‍ തുടങ്ങിയ വാഗ്ദാനങ്ങളുമായിട്ടാണ് ഇത്തവണ ബിജെപി കര്‍ണാടക തിരഞ്ഞെടുപ്പിനെ നേരിടുന്നത്. ശക്തമായ മത്സരമാണ് സംസ്ഥാനത്ത് ഇത്തവണ ബിജെപി നേരിടുന്നത്.

നിരോധിത സംഘടയായ പോപ്പുലര്‍ ഫ്രണ്ടുമായി താരതമ്യം ചെയ്ത്, ബജ്റങ്ദളിനെ നിരോധിക്കുമെന്ന കര്‍ണാടകയിലെ കോണ്‍ഗ്രസ് പ്രകടനപത്രികയിലെ വാഗ്ദാനം വിവാദമായിരിക്കെ, കോണ്‍ഗ്രസ് ആസ്ഥാനത്തും പാര്‍ട്ടിയുടെ മുന്‍ അധ്യക്ഷ സോണിയ ഗാന്ധിയുടെ ഔദ്യോഗിക വസതിയിലും കനത്ത സുരക്ഷ ഏര്‍പ്പെടുത്തി. ബജ്റങ്ദളിന്റെ ഭാഗത്തുനിന്ന് പ്രതിഷേധം ഉണ്ടാകാനുള്ള സാധ്യത കണക്കിലെടുത്താണ് നീക്കം. ഇവിടെ നിരോധനാജ്ഞയും പ്രഖ്യാപിച്ചിട്ടുണ്ട്.

മതവിദ്വേഷം വളര്‍ത്തുന്ന ഇത്തരം സംഘടനകളെ നിരോധിക്കുമെന്നാണ് കോണ്‍ഗ്രസ് പ്രകടന പത്രികയിലെ വാഗ്ദാനം. ബെംഗളൂരുവില്‍ കോണ്‍ഗ്രസ് ദേശീയ അധ്യക്ഷന്‍ മല്ലികാര്‍ജുന്‍ ഖര്‍ഗെയാണ് ബജ്‌റംഗ് ദളിനെ നിരോധിക്കുമെന്ന പരാമര്‍ശം ഉള്‍പ്പെടുന്ന പ്രകടനപത്രിക പുറത്തിറക്കിയത്. കര്‍ണാടക കോണ്‍ഗ്രസ് അധ്യക്ഷന്‍ ഡി.കെ.ശിവകുമാര്‍, മുതിര്‍ന്ന നേതാവ് സിദ്ധരാമയ്യ എന്നിവരും ചടങ്ങില്‍ സംബന്ധിച്ചു.