പല വിവാഹത്തോടനുബന്ധിച്ചും കഴിഞ്ഞും പല തര്‍ക്കങ്ങളും വഴക്കുകളും അടിപിടിയും കേട്ടിട്ടുണ്ട്. എന്നാല്‍ ഇതല്‍പം കടന്നു പോയി. മധുവിധു തീരും മുമ്പ് വരന് ജയിലില്‍ കിടക്കാനാണ് യോഗം. പേരൂര്‍ക്കടയിലായിരുന്നു സംഭവം. ആഘോഷമായി നടത്തിയ വിവാഹവും വിവാഹ സത്ക്കാരവും അവസാനം എന്നെന്നും ഓര്‍ക്കുന്ന സംഭവമായി മാറി.

വിവാഹ സല്‍ക്കാരത്തിനിടെ ഉണ്ടായ കയ്യാങ്കളിക്കൊടുവില്‍ വധുവിന്റെ ആള്‍ക്കാര്‍ക്കു നേരെ പടക്കം എറിഞ്ഞ കേസില്‍ വരനെയും 3 സുഹൃത്തുക്കളെയും പൊലീസ് അറസ്റ്റ് ചെയ്തു. വരന്‍ പോത്തന്‍കോട് കലൂര്‍ മഞ്ഞമല വിപിന്‍ ഭവനില്‍ വിജിന്‍ (24), പോത്തന്‍കോട് പെരുതല അവനീഷ് ഭവനില്‍ ആകാശ് (22),ആറ്റിങ്ങല്‍ ഊരുപൊയ്ക പുളിയില്‍കണി വീട്ടില്‍ വിനീത് (28), ആറ്റിങ്ങല്‍ ഇളമ്പ വിജിത ഭനില്‍ വിജിത് (23) എന്നിവരെയാണ് അറസ്റ്റ് ചെയ്തത്. ഇവരുടെ സുഹൃത്തുക്കളായ രണ്ടു പേര്‍ ഒളിവിലാണ്.

പ്രണയത്തിലായിരുന്ന ക്രൈസ്റ്റ് നഗര്‍ സ്വദേശിനിയും വിജിനും ഞായറാഴ്ചയാണ് വിവാഹിതരായത്. വൈകിട്ട് വധുവിന്റെ വീട്ടുകാര്‍ നടത്തിയ വിവാഹ സല്‍ക്കാരത്തിനിടെ വിജിന്റെ സുഹൃത്തും വധുവിന്റെ ബന്ധുക്കളായ യുവാക്കളും തമ്മില്‍ കയ്യാങ്കളി നടന്നു. ഇതില്‍ പ്രകോപിതനായി ഇറങ്ങിപ്പോയ വിജിന്‍ പോത്തന്‍കോട് നിന്നു സുഹൃത്തുക്കളെ വിളിച്ചുവരുത്തിയ ശേഷം ആള്‍ക്കൂട്ടത്തിന് നേരെ പടക്കം എറിയുകയായിരുന്നുവെന്ന് പൊലീസ് പറഞ്ഞു.

ഞായറാഴ്ച പകല്‍ പോത്തന്‍കോട്ട് വച്ചായിരുന്നു വിവാഹ ചടങ്ങ്. രാത്രി സത്കാരച്ചടങ്ങിനിടെ വധൂവരന്മാരുടെ ബന്ധുക്കള്‍ തമ്മിലാണ് തര്‍ക്കമുണ്ടായത്. തുടര്‍ന്ന് വരന്റെ സുഹൃത്തുക്കള്‍ തര്‍ക്കത്തില്‍ ഇടപെടുകയായിരുന്നു. തിരികെപ്പോയ വരന്റെ സുഹൃത്തുക്കള്‍ രാത്രി ഒന്‍പതരയോടെ ഓട്ടോറിക്ഷയില്‍ സ്ഥലത്തെത്തി വിവാഹസത്കാരം നടന്നിരുന്ന കമ്യൂണിറ്റി ഹാളിലേക്ക് പടക്കമെറിഞ്ഞു.

ഇവരെ വധുവിന്റെ ബന്ധുക്കളും നാട്ടുകാരും ചേര്‍ന്ന് തടഞ്ഞുവെച്ചു. ആക്രമിക്കാന്‍ എത്തിയവര്‍ അമിതലഹരിയില്‍ ആയിരുന്നുവെന്ന് നാട്ടുകാര്‍ പറഞ്ഞു. ഇവര്‍ വിവരം അറിയിച്ചതിനെത്തുടര്‍ന്ന് സ്ഥലത്തെത്തിയ പോലീസ് നാലുപേരെ കസ്റ്റഡിയില്‍ എടുത്തു. ക്രൈസ്റ്റ് നഗര്‍ സ്വദേശി ഷെറിന്‍ (24), വഴയില സ്വദേശി സംഗീതാ ലാല്‍ (24) എന്നിവര്‍ക്ക് പടക്കമേറില്‍ സാരമായി പരിക്കേറ്റിട്ടുണ്ട്.

ഇവരെ ആദ്യം പേരൂര്‍ക്കട ജില്ലാ ആശുപത്രിയിലും തുടര്‍ന്ന് മെഡിക്കല്‍ കോളേജ് ആശുപത്രിയിലും പ്രവേശിപ്പിച്ചു. സംഭവത്തില്‍ മറ്റ് മൂന്നുപേര്‍ക്കുകൂടി പരിക്കേറ്റതായാണ് വിവരം. കല്യാണവീട്ടിലെ തര്‍ക്കമായതിനാല്‍ സംഭവത്തില്‍ കേസ് എടുത്തിട്ടില്ലെന്ന് പേരൂര്‍ക്കട പോലീസ് അറിയിച്ചു.

വിവാഹ സത്കാരത്തിനിടയില്‍ നടന്ന തര്‍ക്കത്തെത്തുടര്‍ന്ന് നാട്ടുകാര്‍ക്കു നേരേ പടക്കമെറിഞ്ഞ് ഭീകരാന്തരീക്ഷം സൃഷ്ടിച്ച സംഭവത്തില്‍ വരനും സുഹൃത്തുക്കളുമടക്കം നാലുപേരെ പേരൂര്‍ക്കട പോലീസ് അറസ്റ്റു ചെയ്തു.

വാള്‍, വെട്ടുകത്തി, നാടന്‍ബോംബ് എന്നിവയുമായാണ് വരന്റെ സുഹൃത്തുക്കള്‍ സ്ഥലത്തെത്തിയതെന്ന് പോലീസ് പറഞ്ഞു. തുടര്‍ന്ന്, പള്ളിയുടെ മുന്‍പില്‍ നിന്ന ആളുകളുടെ നേരേ പടക്കമെറിഞ്ഞ് ഭീകരാന്തരീക്ഷം സൃഷ്ടിച്ചു.

നാട്ടുകാര്‍ സംഘടിച്ചതോടെ, വന്ന ഓട്ടോറിക്ഷയില്‍ കയറി പ്രതികള്‍ വഴയിലവഴി പേരൂര്‍ക്കട ഭാഗത്തേക്ക് പോകുകയും പിന്തുടര്‍ന്ന നാട്ടുകാരെ വീണ്ടും നാടന്‍ ബോംബുകള്‍ എറിയുകയും വെട്ടുകത്തി കാണിച്ച് ഭീഷണിപ്പെടുത്തുകയും ചെയ്തു.

ആറ്റിങ്ങല്‍, വെഞ്ഞാറമൂട്, പോത്തന്‍കോട്, ചിറയിന്‍കീഴ് എന്നീ സ്റ്റേഷനുകളില്‍ കൊലപാതകശ്രമം ഉള്‍പ്പെടെയുള്ള കേസുകളില്‍ പ്രതികളാണ് അറസ്റ്റിലായതെന്ന് പോലീസ് പറഞ്ഞു.