സ്പീക്കര്‍ എന്‍ ശക്തന്റെ രാജിഭീഷണിക്ക് മുന്നില്‍ രമേശ് ചെന്നിത്തല വഴങ്ങി. നിയമസഭയില്‍ ഇന്നലെ രമേശ് ചെന്നിത്തല നടത്തിയ പരാമര്‍ശത്തെ തുടര്‍ന്ന് ഇന്ന് സ്പീക്കര്‍ സഭയില്‍ കയറാതെ പ്രതിഷേധിക്കുകയും രാജിഭീഷണി മുഴക്കുകയും ചെയ്തിരുന്നു. ഇതിനെ തുടര്‍ന്നാണ് മുഖ്യമന്ത്രി ഉമ്മന്‍ചാണ്ടി സ്പീക്കര്‍ എന്‍ ശക്തനുമായി അനുനയ ചര്‍ച്ച നടത്തിയിരുന്നു. എന്നാല്‍ ശക്തന്‍ വഴങ്ങിയില്ല. രമേശ് ചെന്നിത്തല സഭയ്ക്കുള്ളില്‍ തന്നോട് മാപ്പ് പറയണമെന്നായിരുന്നു സ്പീക്കറുടെ ആവശ്യം. എന്നാല്‍ ചെന്നിത്തല സഭയ്ക്കുള്ളില്‍ മാപ്പ് പറയാതെ സ്പീക്കറെ കാണുകയായിരുന്നു. ഇതിനെ തുടര്‍ന്നാണ് സ്പീക്കര്‍ വീണ്ടും സഭയിലെത്തിയത്. സ്പീക്കറെ അനുനയിപ്പിക്കാന്‍ മുഖ്യമന്ത്രിക്ക് പുറമേ മന്ത്രിമാരായ ആര്യാടന്‍ മുഹമ്മദ്, കെസി ജോസഫ്, അടൂര്‍ പ്രകാശ് എന്നിവര്‍ ചര്‍ച്ച നടത്തിയിരുന്നു.
ഇന്നലെ നിയമസഭയില്‍ ബില്‍ ചര്‍ച്ച ചെയ്യുന്നതിനിടെയായിരുന്നു ചെന്നിത്തല സ്പീക്കര്‍ക്കെതിരെ തിരിഞ്ഞത്.അതേസമയം, സ്പീക്കറെ മനഃപൂര്‍വം അവഹേളിച്ചില്ലെന്ന് ആഭ്യന്തരമന്ത്രി രമേശ് ചെന്നിത്തല. സഭ നേരത്തെ പിരിയാനുള്ള തീരുമാനം അറിയില്ലായിരുന്നു. മുഖ്യമന്ത്രിയുടെ നിര്‍ദേശം അനുസരിച്ചായിരുന്നു സ്പീക്കറുടെ നടപടി. ഇന്നലെത്തന്നെ അദ്ദേഹത്തോട് ഖേദം പ്രകടിപ്പിച്ചിരുന്നുവെന്നും ചെന്നിത്തല പറഞ്ഞു. അടിയന്തരപ്രമേയത്തിന് അനുമതി നിഷേധിച്ചതിനെ തുടര്‍ന്ന് പ്രതിപഷം സഭയില്‍നിന്ന് ഇറങ്ങിപ്പോയി. സര്‍ക്കാര്‍ ആശുപത്രിയിലെ ദുരവസ്ഥ ചര്‍ച്ച ചെയ്യണമെന്നാവശ്യപ്പെട്ടാണ് നോട്ടീസ് നല്‍കിയിരുന്നത്.ഇന്നലെ ആദ്യബില്ലിന്റെ ദീര്‍ഘമായ ചര്‍ച്ചയ്ക്കു ശേഷം മന്ത്രി കെ.സി. ജോസഫ് രണ്ടാമത്തെ ബില്‍ അവതരിപ്പിച്ചു. എന്‍.എ. നെല്ലിക്കുന്ന് ചര്‍ച്ചയില്‍ ദീര്‍ഘമായി സംസാരിച്ചപ്പോള്‍, ചുരുക്കാനായി സ്പീക്കര്‍ ഇടയ്ക്കിടെ നിര്‍ദേശം നല്‍കി. അപ്പോഴാണു രമേശ് ഇടപെട്ടത്. ദോശ ചുടുന്നതുപോലെ ബില്‍ പാസാക്കാനാകില്ലെന്നായിരുന്നു രമേശിന്റെ വാക്കുകള്‍. സഭയില്‍ ബില്ലുകള്‍ വിശദമായി ചര്‍ച്ച ചെയ്യേണ്ടതുണ്ടെന്നും സമയമില്ലെങ്കില്‍ മറ്റൊരു ദിവസത്തേക്കു മാറ്റുകയാണു വേണ്ടതെന്നും അദ്ദേഹം അഭിപ്രായപ്പെട്ടു. തനിക്കു വേണ്ടിയല്ല വേഗത്തിലാക്കുന്നതെന്നും നിങ്ങള്‍ക്കു പ്രധാനമന്ത്രിയെ കാണുന്നതിനു വേണ്ടിയാണെന്നും സ്പീക്കര്‍ തിരിച്ചടിച്ചു. എങ്കില്‍ ബില്‍ മാറ്റിവയ്ക്കണമെന്നാവശ്യപ്പെട്ട ചെന്നിത്തല, അങ്ങ് സഭയുടെ സംരക്ഷകനല്ലേയെന്നും ഇങ്ങനെ പെരുമാറരുതെന്നും പറഞ്ഞു. അങ്ങനെയെങ്കില്‍ നെല്ലിക്കുന്ന് ഇഷ്ടം പോലെ സമയമെടുത്തു സംസാരിച്ചോളൂ എന്നു നിര്‍ദേശിച്ച സ്പീക്കര്‍ പിന്നീടു ചര്‍ച്ചയില്‍ ഇടപെടാതെ നിശ്ശബ്ദനായി. തുടര്‍ന്ന് ബില്‍ പാസാക്കി സഭ പിരിഞ്ഞപ്പോള്‍ അഞ്ച് മണി കഴിഞ്ഞു. തുടര്‍ന്ന് മോദിക്കായി ഒഴിച്ചിട്ട പാതയിലൂടെ പാഞ്ഞു ചെന്നാണ് മന്ത്രിമാര്‍ പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തിയത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha