കഴിഞ്ഞദിവസം മുതല്‍ സോഷ്യല്‍മീഡിയ തിരയുന്ന ആ രക്ഷകനെ കണ്ടുകിട്ടി. നിര്‍ത്തിയിട്ടിരുന്ന കാര്‍ പെട്ടെന്ന് ചലിക്കാന്‍ തുടങ്ങി. റോഡിലൂടെ വാഹനങ്ങള്‍ തേരാപ്പാര പോകുന്നു. പെണ്‍കുട്ടിയെ രക്ഷപ്പെടുത്താന്‍ യുവാവിന്റെ സാഹസികത. പിന്നെ നടന്നത് നാടകീയ രംഗങ്ങള്‍. ഇതിന്റെ വീഡിയോ സോഷ്യല്‍മീഡിയയില്‍ വൈറലായിരുന്നു. ഇതോടെ ആ ധീരനെ തിരയുകയായിരുന്നു എല്ലാവരും. കാരണം അദ്ദേഹത്തിന്റെ കൃത്യമായ ഇടപെടലാണ് വലിയ അപകടം ഒഴിവാക്കിയത് പെണ്‍കുട്ടിയുടെ ജീവന്‍ രക്ഷിക്കാനായത്. സംഭവം ഇങ്ങനെ.

കോട്ടക്കല്‍ നഗരമധ്യത്തില്‍ പ്രധാന റോഡിന്റെ അരികിലായി നിര്‍ത്തിയിട്ടിരിക്കുന്ന കാര്‍. ഒരു പെണ്‍കുട്ടി അതിന്റെ മുന്നിലെ ഡോര്‍ തുറന്ന് എന്തോ എടുക്കാന്‍ ശ്രമിക്കുന്നതിനിടെ കാര്‍ അപ്രതീക്ഷിതമായി പിന്നിലേക്ക് ഉരുളുന്നു. വാഹനങ്ങള്‍ ചീറിപ്പായുന്ന റോഡിലേക്കു നീങ്ങുന്ന വാഹനം, ഒരു കാറിലും ഓട്ടോറിക്ഷയിലും ഇടിച്ചു ഇടിച്ചില്ല എന്ന മട്ടില്‍ വീണ്ടും മുന്നോട്ട്. വാഹനങ്ങള്‍ക്കു ട്രാക്ക് മാറാനുള്ള മീഡിയനിടയിലെ സ്ഥലത്തുകൂടി എതിര്‍ ദിശയില്‍ വാഹനങ്ങള്‍ വരുന്ന റോഡിലേക്ക് കടക്കുന്ന കാര്‍ പിന്നോട്ടോടി മീഡിയനില്‍ ചെന്ന് ഇടിക്കുന്നു. ഇതിനിടെ വാഹനത്തിലുള്ള സ്ത്രീകളുടെയും വഴിയാത്രക്കാരുടെയും അലറിക്കരച്ചില്‍. ഏതു നിമിഷവും അപകടം സംഭവിക്കുമെന്ന് ഉറപ്പിച്ച് ആളുകള്‍ നടുങ്ങി നില്‍ക്കെ, അതുവഴി ബൈക്കില്‍ വന്ന ഒരാള്‍ ഒരു നിമിഷം പോലും പാഴാക്കാതെ ബൈക്ക് റോഡില്‍ നിര്‍ത്തി ഹെല്‍മറ്റും ഊരിവച്ച് കാറിലേക്ക് ചാടിക്കയറുന്നു. മീഡിയനില്‍ ഇടിച്ച് മുന്നോട്ടു നീങ്ങാനൊരുങ്ങിയ വാഹനം ബ്രേക്ക് ചവിട്ടി നിര്‍ത്തി അപകടം ഒഴിവാക്കുന്നു.

ഇന്നലെ മുതല്‍ സമൂഹമാധ്യമങ്ങള്‍ കേന്ദ്രീകരിച്ച് വലിയ ചര്‍ച്ചയായ ഒരു വിഡിയോയിലെ രംഗമാണിത്. കോട്ടയ്ക്കല്‍ നഗര മധ്യത്തില്‍ നിര്‍ത്തിയിട്ട കാര്‍ പിന്നോട്ടുരുണ്ട് അപകടത്തിലേക്കു നീങ്ങുമ്പോള്‍, രക്ഷകനായെത്തിയ ആ ബൈക്ക് യാത്രികന്‍. ആരാണയാള്‍? കേരളം ചോദിച്ച ആ ചോദ്യത്തിന് ഇതാ ഉത്തരമായിരിക്കുന്നു. കോഴിച്ചെന സ്വദേശിയും കെഎസ്എഫ്ഇയുടെ കോട്ടയ്ക്കല്‍ ശാഖയിലെ ജീവനക്കാരനുമായ സുധീഷ്! എന്ന വ്യക്തിയാണ്, അവസരോചിതമായ പ്രവര്‍ത്തനത്തിലൂടെ അപകടം ഒഴിവാക്കി കയ്യടി നേടിയത്. ഇക്കഴിഞ്ഞ തിങ്കളാഴ്ച ഉച്ചയ്ക്കാണു സംഭവം നടന്നതെന്നു സുധീഷ് പറയുന്നു. അദ്ദേഹത്തിന്റെ വാക്കുകളിലൂടെ:

''തിങ്കളാഴ്ച ഉച്ചയ്ക്ക് രണ്ടരയോടെയാണു സംഭവം നടക്കുന്നത്. ഉച്ചഭക്ഷണം കഴിഞ്ഞ് ഓഫിസിലേക്കു മടങ്ങി വരികയായിരുന്നു. ചങ്കുവെട്ടി ഭാഗത്തുനിന്ന് കോട്ടയ്ക്കലിലേക്കാണ് ഞാന്‍ വന്നത്. ഓഫിസിന്റെ മുന്നിലാണ് ഈ സംഭവം നടക്കുന്നത്. ഞങ്ങളുടെ ഓഫിസിനു താഴെ ഫെഡറല്‍ ബാങ്കാണ്. അവിടേക്കു വന്നതാണു കാറിലുണ്ടായിരുന്ന ആളുകള്‍. വണ്ടി ഓഫാക്കാതെ ഓടിച്ചിരുന്നയാള്‍ എടിഎമ്മിലേക്കു പോയതായിരുന്നു. ഇതിനിടെ കുട്ടികള്‍ വാഹനത്തില്‍നിന്നു പുറത്തിറങ്ങിയിരുന്നു. ഉള്ളിലുള്ള ആരോ എന്തോ ചെയ്തതാണെന്നു തോന്നുന്നു. ഓട്ടമാറ്റിക് വാഹനമാണ്. എന്താണു സംഭവിച്ചതെന്ന് വ്യക്തമായി അറിയില്ല. വണ്ടി പെട്ടെന്ന് പിന്നിലേക്ക് നീങ്ങുന്നതാണ് ഞാന്‍ കാണുന്നത്.

വാഹനം നിര്‍ത്തിയ സമയത്ത് സ്റ്റിയറിങ് വളച്ചാണു വച്ചിരുന്നത്. അതുകൊണ്ട് പിന്നിലേക്ക് ഉരുണ്ട വാഹനം വളഞ്ഞാണ് നീങ്ങിയത്. അങ്ങോട്ട് ചെറിയൊരു ഇറക്കമാണ്. എന്റെ മുന്നിലൂടെയാണ് കാര്‍ അപ്പുറത്തേക്കു പോയത്. ഈ സമയം ഒരു ഡോര്‍ തുറന്നു കിടക്കുകയായിരുന്നു. അതുകൊണ്ട് ലോക്കല്ലെന്ന് മനസിലായി. ബൈക്ക് നിര്‍ത്തി ഓടിച്ചെന്ന് ഡോറില്‍ പിടിച്ച് വലിച്ചുനോക്കി. അതു തുറന്നുകിട്ടി. ഉടനെ അതില്‍ കയറിയിരുന്നു. അപ്പോഴേക്കും കാര്‍ പിന്നിലെ മീഡിയനില്‍ ഇടിച്ചുനിന്ന് മുന്നോട്ട് നീങ്ങാന്‍ തുടങ്ങുകയായിരുന്നു. ബ്രേക്ക് ചവിട്ടി വണ്ടി നിര്‍ത്തിയ ശേഷം എന്‍ജിന്‍ ഓഫാക്കി.' സംഭവത്തിന്റെ വിഡിയോ കണ്ട് ആര്‍ടിഒ വിളിച്ചിരുന്നുവെന്ന് സുധീഷ് വ്യക്തമാക്കി. എന്താണ് സംഭവിച്ചതെന്ന് അദ്ദേഹം അന്വേഷിച്ചു. വ്യാഴാഴ്ച വൈകിട്ട് പരപ്പനങ്ങാടി ഓഫിസിലേക്ക് ചെല്ലാന്‍ അദ്ദേഹം ആവശ്യപ്പെട്ടിട്ടുണ്ടെന്നും സുധീഷ് പറഞ്ഞു.