സംസ്ഥാനത്തെ കിഴക്കേ അതിര്‍ത്തി അമരവിള ചെക്ക് പോസ്റ്റിലൂടെ വോള്‍വോ ബസില്‍ 75 ഗ്രാം മാരക എം.ഡി.എം.എ ലഹരി കടത്ത് നടത്തിയ അന്തര്‍ സംസ്ഥാന മയക്കുമരുന്ന് കടത്ത് കേസില്‍ ആലംകോട് സ്വദേശി 23 കാരനായ എം.എസ്. ഷാനടക്കം 5 പേര്‍ക്ക് കോടതിയുടെ പ്രൊഡക്ഷന്‍ വാറണ്ട്.

2022 നവംബര്‍ 11 മുതല്‍ ജുഡീഷ്യല്‍ കസ്റ്റഡിയില്‍ പാര്‍പ്പിച്ച പ്രതികളെ ജയില്‍ സൂപ്രണ്ട് ജൂണ്‍ 27 ന് ഹാജരാക്കാനാണുത്തരവ്. വിചാരണ കോടതിയായ തിരുവനന്തപുരം രണ്ടാം അഡീ. ജില്ലാ സെഷന്‍സ് കോടതിയുടേതാണുത്തരവ്. വിചാരണക്ക് മുന്നോടിയായി കുറ്റപത്രം വായിച്ചു കേള്‍പ്പിച്ച് കുറ്റം ചുമത്തുന്നതിനായാണ് പ്രതികളെ കോടതി ഹാജരാക്കാനാവശ്യപ്പെട്ടത്. ജാമ്യം നിരസിക്കപ്പെട്ട് ജയിലില്‍ കഴിയുകയാണ് പ്രതികള്‍.



ബാംഗ്ലൂര്‍ നിന്നും കൊല്ലത്തേക്ക് പോവുകയായിരുന്ന മുരഹര ട്രാവല്‍സിന്റെ എ.സി. വോള്‍വോ ബസില്‍
യാത്രക്കാരനായ ആലംകോട് വഞ്ചിയൂര്‍ കടവിള പുല്ല്ത്തോട്ടം ദേശ സേവിനി ഗ്രന്ഥശാലക്ക് സമീപം യവനിക വീട്ടില്‍ മുരളീധരന്‍ മകന്‍ അച്ചുവെന്ന എം. എസ്. ഷാന്‍ (23) , വര്‍ക്കല മേല്‍ വെട്ടൂര്‍ പോസ്റ്റാഫീസ് പരിധിയില്‍ വെട്ടൂര്‍ ഗ്രാമപഞ്ചായത്ത് ഓഫീസിന്റെ പുറകിലായി ശ്രീശിവം വീട്ടില്‍ ആദര്‍ശ് (22) , എസ്. മുഹമ്മദ് സഫല്‍ , സൂരജ്.എസ്.നായര്‍ , മുഹമ്മദ് സീജ എന്നിവരാണ് 1 മുതല്‍ 5 വരെയുള്ള പ്രതികള്‍.

2022 നവംബര്‍ 11 രാവിലെയാണ് ഷാനെ എക്‌സൈസ് ചെക് പോസ്റ്റിന് മുന്നില്‍ വച്ച് ബസ്സില്‍ നിന്നും തൊണ്ടി സഹിതം സ്പോട്ട് അറസ്റ്റ് ചെയ്തത്. തുടര്‍ന്ന് കൃത്യത്തിലെ പങ്കാളിയും മയക്കുമരുന്ന് വാങ്ങുന്നതിന് സാമ്പത്തിക ഇടപാട് നടത്തിയതുമായ രണ്ടാം പ്രതിയെ കൃത്യ ദിവസം തന്നെ പിടികൂടുകയായിരുന്നു. തുടര്‍ന്ന് ഉള്ള ചോദ്യം ചെയ്യലില്‍ കൃത്യത്തില്‍ ഉള്‍പ്പെട്ട മറ്റുപ്രതികളുടെ പേരും വിലാസവും കുറ്റസമ്മത മൊഴിയില്‍ ആദ്യ രണ്ടു പ്രതികള്‍ നല്‍കിയെന്നാണ് എക്‌സൈസ് കുറ്റപത്രത്തില്‍ പറയുന്നത്.


നെയ്യാറ്റിന്‍കര എക്സൈസ് സര്‍ക്കിള്‍ ഇന്‍സ്പെക്ടര്‍ എ.പി. ഷാജഹാന്റെ നേതൃത്വത്തില്‍ എക്സൈസ് ഇന്‍സ്പെക്ടര്‍ ആര്‍.വി. മോനി രാജേഷ്, പ്രിവന്റീവ് ആഫീസര്‍ സുനില്‍ രാജ് .ജി, സി ഇ ഒ മാരായ വിജേഷ്. വി , സുബാഷ് കുമാര്‍. എന്‍, എസ്.പി. അനീഷ് കുമാര്‍ , യു.കെ. ലാല്‍ കൃഷ്ണ, വി. .ജെ. അനീഷ്, എച്ച് ജി.. അര്‍ജുന്‍, വനിതാ ഓഫീസര്‍ ഇന്ദുലേഖ പി.എസ്, ഡ്രൈവര്‍. സി സൈമണ്‍ എന്നിവരടങ്ങിയ സംഘമാണ് പ്രതികളെ പിടികൂടിയത്.


1985 ലെ നര്‍ക്കോട്ടിക് ഡ്രഗ്‌സ് ആന്റ് സൈക്കോട്രോപ്പിക് സബ്സ്റ്റന്‍സ് നിയമപ്രകാരം എംഡിഎംഎ 0. 5 ഗ്രാം ചെറിയ അളവും 10 ഗ്രാം മുതല്‍ വാണിജ്യ അളവുമാണ്.അളവിനനുസരിച്ചാണ് ശിക്ഷയുടെ തോത് നിയമത്തില്‍ പറയുന്നത്.

0.5 ഗ്രാം അളവ് കൈവശം വച്ചാല്‍ ചെറിയ അളവെന്ന നിലയ്ക്ക് 22 (എ) പ്രകാരം 6 മാസം കഠിന തടവും പതിനായിരം രൂപ പിഴയും ശിക്ഷ
0.5 ഗ്രാമിനും 10 ഗ്രാമിനും ഇടക്കുള്ള ഇന്റര്‍മീഡിയറി ക്വാണ്ടിറ്റി അളവ് കൈവശം വച്ചാല്‍ 22 (ബി) പ്രകാരം10 വര്‍ഷം കഠിന തടവും ഒരു ലക്ഷം രൂപ പിഴയും ശിക്ഷ
10 ഗ്രാമിന് മേല്‍ കൈവശം വച്ചാല്‍ വാണിജ്യ അളവെന്ന നിലക്ക് 22 (സി) പ്രകാരം 20 വര്‍ഷം കഠിന തടവും 2 ലക്ഷം രൂപ പിഴയുമാണ് ശിക്ഷ.