സംസ്ഥാനത്ത് ഹെവി വാഹനങ്ങള്ക്കും സീറ്റ് ബെല്റ്റ് നിര്ബന്ധമാക്കുന്നു... കെ എസ് ആര് ടി സിക്കും ബാധകമെന്ന് ഗതാഗതമന്ത്രി
കെ എസ് ആര് ടി സി ബസുകളടക്കമുള്ള ഹെവി വാഹനങ്ങള്ക്കും സീറ്റ് ബെല്റ്റ് നിര്ബന്ധമാക്കുന്നു. സെപ്തംബര് ഒന്നുമുതലാണ് ഇത് പ്രാവര്ത്തികമാക്കുക. ഗതാഗതമന്ത്രി ആന്റണി രാജുവാണ് ഇക്കാര്യം അറിയിച്ചത്. ഡ്രൈവറും ഡ്രൈവറുടെ ക്യാബിനില് ഉള്ള സീറ്റില് ഇരിക്കുന്നവരും സീറ്റ് ബെല്റ്റ് ധരിക്കണമെന്നും ഇല്ലെങ്കില് എ ഐ ക്യാമറ കണ്ടെത്തി ഇവര്ക്ക് നോട്ടീസ് നല്കുമെന്നും മന്ത്രി പറഞ്ഞു.സംസ്ഥാനത്ത് എ ഐ ക്യാമറകള് വഴി കണ്ടെത്തുന്ന നിയമലംഘനങ്ങള്ക്ക് പിഴ ഈടാക്കിത്തുടങ്ങിയതോടെയാണ് ഹെവി വാഹനങ്ങള്ക്കും സീറ്റ്ബെല്റ്റ് നിര്ബന്ധമാക്കുന്നത്.
അതേസമയം,ക്യാമറകള് കണ്ടെത്തുന്ന നിയമ ലംഘനങ്ങള്ക്ക് ചെലാന് അയയ്ക്കുന്ന പ്രക്രിയ അവതാളത്തിലായി. പ്രതിദിനം 25,000 ചെലാനുകള് തപാല് വഴി അയയ്ക്കാനാണ് എം.വി.ഡി തീരുമാനിച്ചിരുന്നതെങ്കിലും നാലു ദിവസമായിട്ടും പകുതി നിയമലംഘനങ്ങള്ക്കു പോലും ചെലാന് അയച്ചിട്ടില്ല.
'വാഹന്' സോഫ്റ്റ്വേറിന്റെ സാങ്കേതിക പ്രശ്നങ്ങള് എ.ഐ ക്യാമറ സംവിധാനത്തെയും ബാധിച്ചിട്ടുണ്ട്. 'വാഹന്' ഇടയ്ക്കിടെ പണിമുടക്കുന്നതുകാരണം പിഴചുമത്തുന്ന ഇ ചെല്ലാന് തയ്യാറാക്കുന്നത് വൈകുന്നുണ്ട്.ക്യാമറകളില് പതിയുന്ന നിയമലംഘനങ്ങള് കെല്ട്രോണ് ജീവനക്കാര് മോട്ടോര്വാഹനവകുപ്പിന്റെ വിവിധ ജില്ലകളിലെ കണ്ട്രോള് റൂമുകള്ക്ക് കൈമാറുകയാണ് പതിവ്. വെഹിക്കിള് ഇന്സ്പെക്ടര്മാര് ഒരോ ദൃശ്യവും പരിശോധിച്ചശേഷമാണ് 'വാഹന്' സോഫ്റ്റ്വെയറിന്റെ ഭാഗമായ 'ഇ ചെല്ലാന്' വെബ്സൈറ്റുവഴി പിഴ ചുമത്തുന്നത്.
വാഹനത്തിന്റെ നമ്പര് വെബ്സൈറ്റില് നല്കുമ്പോള് രജിസ്ട്രേഷന് വിവരങ്ങളെല്ലാം കിട്ടും. ക്യാമറയില് നിന്നുള്ള ചിത്രം അപ്ലോഡ് ചെയ്തശേഷം നിയമലംഘനം ഏതാണെന്ന് രേഖപ്പെടുത്തി പിഴ ചുമത്തും. 'വാഹനി'ല് സാങ്കേതിക പ്രശ്നമുണ്ടെങ്കില് ഇ ചെല്ലാനില് വാഹനങ്ങളുടെ വിശദാംശങ്ങള് ലഭിക്കില്ല.
https://www.facebook.com/Malayalivartha
