സംസ്ഥാനത്ത് വ്യവസായ വകുപ്പിനു കീഴിലുള്ള 40 പ്രദേശങ്ങളെ വ്യവസായ പദവി നല്‍കി എസ്‌റ്റേറ്റുകളായി പ്രഖ്യാപിച്ച് വ്യവസായ മന്ത്രി പി രാജീവ്. വ്യവസായ സംരംഭങ്ങള്‍ കേന്ദ്രീകരിച്ച 40 പ്രദേശങ്ങള്‍ക്കാണ് വ്യവസായ എസ്‌റ്റേറ്റ് പദവി നല്‍കി വിജ്ഞാപനം പുറത്തിറക്കിയത്. ഈ എസ്‌റ്റേറ്റുകളില്‍ സംരംഭങ്ങള്‍ ആരംഭിക്കുന്ന പ്രക്രിയ സുഗമമാക്കാന്‍ ഏകജാലക ക്ലിയറന്‍സ് ബോര്‍ഡുകളും രൂപീകരിച്ചതായി വ്യവസായ മന്ത്രി പറഞ്ഞു.

എറണാകുളം ജില്ലയിലെ എടയാര്‍, തൃശൂര്‍ പുഴയ്ക്കല്‍ പാടം, പാലക്കാട് കഞ്ചിക്കോട്, ആലപ്പുഴയിലെ അരൂര്‍, തിരുവനന്തപുരത്തെ വേളി തുടങ്ങിയ പ്രദേശങ്ങള്‍ വ്യവസായ എസ്‌റ്റേറ്റുകളില്‍ ഉള്‍പ്പെടുന്നു. നേരത്തെ നിലവിലുള്ളതാണെങ്കിലും വ്യവസായ എസ്‌റ്റേറ്റുകളായി പ്രഖ്യാപിച്ചതോടെ ഇവിടങ്ങളില്‍ പ്രവര്‍ത്തിക്കുന്ന സംരംഭങ്ങള്‍ക്ക് നിയമപരമായ ആനുകൂല്യങ്ങള്‍ ലഭിക്കും. സംരംഭങ്ങള്‍ ആരംഭിക്കാനുള്ള വിവിധ തരം ലൈസന്‍സുകള്‍, ക്ലിയറന്‍സുകള്‍, സര്‍ട്ടിഫിക്കറ്റുകള്‍ എന്നിവ അതിവേഗം ലഭ്യമാക്കാന്‍ വ്യവസ്ഥ ചെയ്തിട്ടുണ്ട്.

എസ്‌റ്റേറ്റ് തലത്തിലാണ് ക്ലിയറന്‍സ് ബോര്‍ഡുകള്‍ക്ക് രൂപം നല്‍കിയത്. കലക്ടര്‍, ജില്ലാ വ്യവസായ കേന്ദ്രം ജനറല്‍ മാനേജര്‍, മലിനീകരണ നിയന്ത്രണ ബോര്‍ഡ്, നഗര ഗ്രാമാസൂത്രണം, ഫാക്ടറീസ് ആന്‍ഡ് ബോയിലേഴ്‌സ്, തൊഴില്‍ തുടങ്ങിയ വകുപ്പുകളുടെ ജില്ലാ തല ഓഫീസര്‍മാര്‍ എന്നിവരടങ്ങുന്നതാണ് ക്ലിയറന്‍സ് ബോര്‍ഡ്.

ഇടുക്കി ജില്ലയിലെ അഞ്ച് ഏക്കറുള്ള മുട്ടം ആണ് ഏറ്റവും ചെറിയ വ്യവസായ എസ്‌റ്റേറ്റ്. പാലക്കാട് ജില്ലയിലെ കഞ്ചിക്കോട് ഏറ്റവും വലുതും (532.8 ഏക്കര്‍). എറണാകുളം എടയാര്‍ വലിപ്പത്തില്‍ രണ്ടാമതാണ് (435.29 ഏക്കര്‍). നിലവില്‍ 2500 ഓളം സംരംഭങ്ങള്‍ ഇവിടങ്ങളില്‍ പ്രവര്‍ത്തിക്കുന്നുണ്ട്.