കഴിഞ്ഞ ദിവസം നമ്മള്‍ കേട്ട ഒരു വാര്‍ത്തയാണ് സിഐടിയു കൊടികുത്തി ഒരു ബസ്സ് സര്‍വ്വീസ് പൂട്ടിച്ചത്. ബസ്സുടമ നേരെ ഹൈക്കോടതിക്ക് വിട്ടു സര്‍വ്വീസ് പുനരാരംഭിക്കാന്‍ കോടതി നിര്‍ദ്ദേശിച്ചു. എന്നാല്‍ കോടതി ഉത്തരവിനും പുല്ലുവില. ബസ്സുടമയ്ക്ക് നേരെ സിപിഎം പഞ്ചായത്തംഗത്തിന്റെ കയ്യേറ്റം. ഹൈക്കോടതി നിര്‍ദേശപ്രകാരം സര്‍വീസ് പുനരാരംഭിക്കാന്‍ ശ്രമിക്കുന്നതിനിടെയാണ് ഉടമയ്ക്കുനേരെ സിപിഎം ഗുണ്ടകളുടെ ഗുണ്ടായിസം അരങ്ങേറിയത്. വട്ടിക്കുളങ്ങര ബസ് ഉടമ രാജ്‌മോഹനു നേരെയാണ് രാവിലെ കയ്യേറ്റം ഉണ്ടായത്. തിരുവാര്‍പ്പ് പഞ്ചായത്തംഗം കെ.ആര്‍. അജയ് ആണ് കയ്യേറ്റം നടത്തിയത്. ഇതിന്റെ വിഡിയോയും പുറത്തു വന്നിട്ടുണ്ട്. ഇത് കേരളം തന്നെയാണോ ഇക്കൂട്ടര്‍ കാണിച്ച് കൂട്ടുന്ന തോന്നിവാസങ്ങള്‍ ചോദ്യം ചെയ്യാനും ആരുമില്ല കോടതിയേയും ഭയമില്ല. സിപിഎം എന്ന ലേബല്‍ ഉള്ളത് കൊണ്ട് ആരുടേയും നെഞ്ചത്തേക്ക് കയറാമെന്ന ധാര്‍ഷ്ട്യമാണ്.

സര്‍വീസ് പുനരാരംഭിക്കാന്‍ ബസിനു മുന്നില്‍ കെട്ടിയ കൊടിതോരണങ്ങള്‍ അഴിക്കുമ്പോഴായിരുന്നു സംഭവം. ഉടന്‍ പൊലീസ് പിടിച്ചു മാറ്റിയെങ്കിലും രാജ് മോഹന്‍ നിലത്തു വീണു. രാജ്‌മോഹനെ ആശുപത്രിയില്‍ പ്രവേശിപ്പിച്ചു. ബസ് സര്‍വീസിന് തടസ്സമില്ലെന്നും കൊടിതോരണം നശിപ്പിക്കാന്‍ ശ്രമിച്ചത് ചോദ്യം ചെയ്യുക മാത്രമാണ് ചെയ്തതെന്നുമാണ് സിഐടിയുവിന്റെ വിശദീകരണം. അതേസമയം, കയ്യേറ്റം നടത്തിയ പഞ്ചായത്തംഗം അജയനെ അറസ്റ്റ് ചെയ്തു. ഇതിന്റെ രേഖ കാണിച്ചതോടെ കുമരകം പൊലീസ് സ്റ്റേഷനു മുന്നില്‍ ബിജെപി നടത്തിയ പ്രതിഷേധം അവസാനിപ്പിച്ചു. ബസ് സര്‍വീസ് പൊലീസ് സംരക്ഷണയില്‍ പുനരാരംഭിക്കാന്‍ കഴിഞ്ഞദിവസം ഹൈക്കോടതി നിര്‍ദ്ദേശം നല്‍കിയിരുന്നു. എന്നാല്‍ ബസിനു മുന്നിലെ കൊടി തോരണങ്ങള്‍ മാറ്റാത്തതിനാല്‍ ഇന്നലെ സര്‍വീസ് ആരംഭിക്കാനായില്ല. ഈ തോരണങ്ങള്‍ മാറ്റാന്‍ ശ്രമിക്കുന്നതിനിടയിലാണ് സംഭവം. തൊഴില്‍ തര്‍ക്കത്തെ തുടര്‍ന്നാണ് സിഐടിയു ബസിനു മുന്നില്‍ കൊടികുത്തിയത്. കഴിഞ്ഞ ദിവസം രാജ്‌മോഹന്‍ ബസിനു മുന്നില്‍ പ്രതീകാത്മകമായി ലോട്ടറിക്കച്ചവടം നടത്തിയിരുന്നു.

സിഐടിയു വന്ന് കൊടികുത്തി സര്‍വ്വീസ് തടസ്സപ്പെടുത്തിയപ്പോള്‍ ബസ്സിന് മുന്നില്‍ ഇരുമ്പ് കസേരയിട്ട് കോട്ടും സ്യൂട്ടും ധരിച്ചാണ് രാജ്‌മോഹന്‍ പ്രതിഷേധമെന്ന രീതിയില്‍ ലോട്ടറി കച്ചവടം നടത്തിയത്. ടൈം സ്‌ക്വയര്‍ ലക്കി സെന്റര്‍ എന്നാണ് ലോട്ടറി കച്ചവടത്തിന് പേരിട്ടത്. അത് മുഖ്യമന്ത്രിയെ പരിഹസിക്കുന്ന രീതിയില്‍ ആയിരുന്നു. മുഖ്യമന്ത്രി അമേരിക്കയിലെ ടൈം സ്‌ക്വയറില്‍ ലോട്ടറി പോയി സമ്മേളനം നടത്തിയതിനെ പരിഹസിച്ചായിരുന്നു ഇത്. ഇത് പ്രദേശത്തെ സിപിഎമ്മുകാരെ ചൊടിപ്പിച്ചിരുന്നു. ഇതിന്റെ പേരില്‍ കശപിശ ഉണ്ടാകുകയും ചെയ്തിരുന്നു. ഗള്‍ഫില്‍ നിന്നു മടങ്ങിയെത്തി ബസ് സര്‍വീസ് തുടങ്ങിയ രാജ്‌മോഹന് നാലു ബസുകളുണ്ട്. ബസിലെ ഒരു തൊഴിലാളി മാത്രമാണ് സമരത്തിലുള്ളത്. മറ്റു മൂന്നു ബസുകള്‍ സര്‍വീസ് നടത്തുന്നുണ്ട്. ഏറ്റവും കലക്ഷനുള്ള ബസിന്റെ സര്‍വീസാണ് സിഐടിയു മുടക്കിയത്. മറ്റു രണ്ടു ബസുകള്‍ പൂര്‍ണനഷ്ടത്തിലും ഒരു ബസ് ലാഭവും നഷ്ടവുമില്ലാത്ത സ്ഥിതിയിലുമാണു സര്‍വീസ് നടത്തുന്നതെന്നും ഉടമ പറയുന്നു. ഇതോടെയാണ് രാജ്‌മോഹന്‍ കോടതിയില്‍ പോയത്.

സിഐടിയുക്കാരെക്കൊണ്ട് പൊറുതിമുട്ടിയിട്ടുണ്ട് മലയാളി. ഈയടുത്ത കാലത്താണ് തിരുവനന്തപുരത്ത് ഒരു സംഭവം നടന്നത്. വീട് പണിക്കായ് കൊണ്ടുവന്ന ടൈല്‍ ഇറക്കുന്നതില്‍ തര്‍ക്കവുമായ് സിഐടിയും രംഗത്ത് വന്നത്. സിഐടിയും ലോഡിറക്കാന്‍ വന്‍ തുക ചോദിച്ചു അത് കൊടുക്കാനില്ലെന്ന് വീട്ടമ്മ പറഞ്ഞു. പിന്നെ തര്‍ക്കം ഭീഷണി. വേറെ ആരേക്കൊണ്ടേലും ലോഡിറക്കുന്നത് കാണണമെന്ന വെല്ലുവിളി. ഒടുവില്‍ വീട്ടമ്മ തനിയെ ആണ് ആ ടൈലിറക്കിയത്. സഹായിക്കാന്‍ ബന്ധുക്കള്‍ വന്നിട്ടും സിഐടിയുക്കാര്‍ തടയുകയായിരുന്നു. വലിയ വാര്‍ത്ത ആയിരുന്നു ആ സംഭവം. ഇത്തരത്തില്‍ ഒരു പണിയും എടുക്കാതെ കാശടിക്കാന്‍ നടക്കുന്ന ഈ ടീമിനെ ഇനിയും നിലയ്ക്ക് നിര്‍ത്താന്‍ സിപിഎം തയ്യാറാകണം. ഇല്ലെങ്കില്‍ പൊറുതിമുട്ടി ജനം കൈവെക്കും.