ധ്യാനു ഉറക്കെ പാടുകയാണ്....

chubby cheeks...
rosy lips..
curly hair
very fair
eyes are blue
lovely too
teachers pet. is that you..
സ്‌കൂളില്‍ ഈയിടെപഠിപ്പിച്ച പാട്ടാണ്. പുത്രന്റെ ആംഗലേയ പരിജ്ഞാനത്തില്‍ കോരിത്തരിച്ച് ഞാനുമിരിക്കുന്നു. തുടുത്ത കവിള്‍ത്തടങ്ങള്‍, ചുവന്ന ചുണ്ടുകള്‍, വെളുത്ത നിറം, നീലക്കണ്ണുകള്‍, ചുരുളന്‍ തലമുടി....... ഇങ്ങനെയൊക്കെയായാല്‍ കുട്ടി \'ടീച്ചേഴ്‌സ് പെറ്റ്\' ആവുത്രേ! അപ്പോ ഇതൊന്നുമില്ലാത്തവരോ? ടീച്ചര്‍മാര്‍ക്ക് പ്രിയപ്പെട്ടവരാകില്ലേ? ടീച്ചര്‍മാരവരെ ആട്ടിയോടിക്ക്യോ?
\'നീയീ പാട്ടിനി പാടണ്ട! \'
ഞാന്‍ ഉള്ളിലെ പുരോഗമനവാദം പൊടി തട്ടി പുറത്തെടുത്തു.
\'പിന്നേ....അമ്മല്ലേ പറേണേ.... ഞാന്‍ പാടും! \'അവനെന്റെ പുരോഗമന വാദത്തെ വേരോടെ പുച്ഛിച്ച് പിഴുതെറിഞ്ഞു.
കുട്ടികളെക്കുറിച്ച് വര്‍ണ്ണിച്ചെഴുതിയ പാട്ടുകള്‍ ഞാനോര്‍ത്തെടുക്കാന്‍ ശ്രമിച്ചു. എല്ലാത്തിലും നിറം പറയുമ്പോള്‍ വെളുപ്പിനു തന്നെ പ്രാധാന്യം... ഗര്‍ഭകാല സ്വപ്നങ്ങളില്‍ എന്റെയുള്ളിലും കടന്നു വന്നത് വെളുത്ത \'ജോണ്‍സണ്‍ & ജോണ്‍സണ്‍ ബേബി\' തന്നെയാണെന്ന് ഞാന്‍ കുറ്റബോധത്തോടെ ഓര്‍ത്തു. വെളുത്ത കുഞ്ഞിനെ പിന്നെയും പിന്നെയും വെളുപ്പിക്കാന്‍ തേച്ചുപിടിപ്പിച്ച മഞ്ഞളും ബേബിക്രീമും എന്നെ നോക്കി പരിഹസിച്ചു. \'വെളുത്തൂലോ\' എന്ന് കേള്‍ക്കുമ്പോള്‍ തോന്നാറുള്ള ആഹ്ലാദവും \' എന്തേ കറുത്തത്? \' എന്ന് കേള്‍ക്കുമ്പോഴുണ്ടാകാറുള്ള നിരാശയും എന്റെ ഉള്ളില്‍ കുറ്റബോധമുണര്‍ത്തി.
ഒരു വെള്ളക്കാരന്റെ പ്രേതം നമ്മുടെയെല്ലാം ഉള്ളില്‍ ഇപ്പോഴും അലഞ്ഞു തിരിഞ്ഞു നടപ്പുണ്ട്. അല്ലേ? എത്രയൊക്കെ ആട്ടിയോടിക്കാന്‍ ശ്രമിച്ചാലും ആ പ്രേതം ഇറങ്ങിപ്പോകാന്‍ കൂട്ടാക്കാതെ അവിടെ ചുറ്റിപ്പറ്റി നില്‍ക്കും. ഇറക്കിവിട്ടെന്നു നമ്മള്‍ കരുതും. പക്ഷേ ചില സമയത്ത് ആ പ്രേതം സര്‍വശക്തിയുമെടുത്ത് നമ്മെ ആവേശിച്ചു കളയും. കറുത്തവരെല്ലാം കള്ളന്മാരാണെന്നും അവരീ ഭൂമിയില്‍ നിന്നും തുടച്ചു മാറ്റപ്പെടേണ്ടവരാണെന്നുമുള്ള വര്‍ണ്ണവെറി ആ വെള്ളക്കാരന്‍ പ്രേതം നമ്മുടെ ചിന്തയില്‍ കുത്തിവെക്കും...
കറുത്തൊരു പെണ്ണിന്റെ കയ്യില്‍ വെളുത്തൊരു കുഞ്ഞിനെ കണ്ടപ്പോള്‍ ആ പ്രേതം പുറത്തുചാടിയതാണ്.
കുഞ്ഞേ പൊറുക്കുക!
നിന്റമ്മയുടെ കണ്ണില്‍ നിന്നു വീണ ഓരോ കണ്ണീര്‍ത്തുള്ളിയും നെഞ്ചിനെ പൊള്ളിക്കുന്നുണ്ട്.
വെളുത്ത നിന്നെ പൊതിഞ്ഞു പിടിക്കേണ്ട ഒരമ്മയുടെ ഗതികേട് മനസ്സിലാകുന്നുണ്ട്.
ആ അമ്മയിപ്പോള്‍ പ്രാര്‍ത്ഥിക്കുന്നുണ്ടാകും;
നീയൊന്നു കറുത്തിരുന്നെങ്കില്‍ എന്ന്.....
കുഞ്ഞേ പൊറുക്കുക;
കുഞ്ഞേ കറുക്കുക!
ഒന്നും അവസാനിക്കാന്‍ പോകുന്നില്ല. ഞങ്ങളിനിയും ഇതെല്ലാം തുടര്‍ന്നു കൊണ്ടേയിരിക്കും. കറുത്ത അമ്മമാരുടെ കയ്യിലുള്ള വെളുത്ത കുഞ്ഞിനെ സംശയദൃഷ്ടിയോടെ നോക്കിക്കൊണ്ടേയിരിക്കും.... കറുത്ത കുഞ്ഞുങ്ങള്‍ വിശന്നു കരഞ്ഞാല്‍ ഞങ്ങള്‍ തിരിഞ്ഞു നോക്കില്ല..... കറുത്ത കുഞ്ഞുങ്ങള്‍ വെളുത്ത അമ്മമാരുടെ കയ്യിലുണ്ടായാല്‍ ഞങ്ങള്‍ പൊറുക്കും. നേരെ മറിച്ചായാല്‍ ഞങ്ങള്‍ക്കത് സഹിക്കില്ല. ദയാബായിമാരെ ഞങ്ങള്‍ ഇറക്കി വിട്ടുകൊണ്ടേയിരിക്കും.....മുഗാബെമാര്‍ എത്ര പ്രസംഗിച്ചാലും ഞങ്ങള്‍ പഠിക്കില്ല.
\'\'വെളുത്ത നിറമുള്ള കാറിന് കറുത്ത നിറമുള്ള ടയര്‍ ഉപയോഗിക്കുന്ന കാലമത്രയും വംശീയത തുടര്‍ന്നു കൊണ്ടേയിരിക്കും.
വെളുപ്പ് സമാധാനത്തിന്റേയും, കറുപ്പ് അശാന്തിയുടേയും പ്രതീകമായി ജനങ്ങള്‍ ഉപയോഗിക്കുന്ന കാലത്തോളം വംശീയത അവസാനിക്കുകയില്ല.
മംഗല്യത്തിന് വെളുത്ത വസ്ത്രങ്ങളും ദുഃഖസൂചകമായി കറുപ്പു തൂവാലയും ഉപയോഗിക്കുന്നിടത്തോളം വംശീയത അതിന്റെ പാരമ്യതയില്‍ നില്‍ക്കുക തന്നെ ചെയ്യും.
\'ബ്ലാക്ക് മണി\'യും \'ബ്ലാക്ക് ലിസ്റ്റും \'ബ്ലാക്ക്മാര്‍ക്കും\' നെഗറ്റീവ് അര്‍ത്ഥം കൈയാളുന്ന കാലത്തോളം വംശീയത അവസാനിക്കുമെന്ന് പ്രത്യാശിക്കാന്‍ ആവുകയില്ല!\'
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha