മലയാളത്തിന്റെ ഹാസ്യസാമ്രാട്ട് ജഗതി ശ്രീകുമാറിന് ഇന്ന് പിറന്നാള്‍. മലയാളികളുടെ പ്രിയപ്പെട്ട നടന്‍ ജഗതി ശ്രീകുമാര്‍ മലയാളസിനിമയില്‍ നിന്നു വിട്ടു നിന്നിട്ട് 4 വര്‍ഷങ്ങള്‍ ആകുന്നു. ആരോഗ്യം വീണ്ടെടുത്ത് അദ്ദേഹം വെള്ളിത്തിരയില്‍ തിരിച്ചെത്തട്ടെ എന്നാണ് അദ്ദേഹത്തെ സ്‌നേഹിക്കുന്നവര്‍ ആശംസിക്കുന്നത്. സ്വാഭാവിക അഭിനയം കൊണ്ട് അഭ്രപാളിയെ വിസ്മയിപ്പിച്ച നടന വിസ്മയമായ ജഗതിയുടെ കഥാപാത്രങ്ങള്‍ ഒരിക്കലും മലയാളി മറക്കാനിടയില്ല.

അമ്പിളിക്കല മറഞ്ഞ ആകാശം കണക്കെ അമ്പിളിച്ചേട്ടനില്ലാതെ മലയാള സിനിമ മുന്നോട്ട് നീങ്ങുന്നു. ചെറു നക്ഷത്രങ്ങള്‍ പലതും ഇടയ്ക്ക് മിന്നിത്തെളിയുന്നുണ്ട്. എന്നാലും അമ്പിളിയോളം ഒളി തൂകി എല്ലാവരെയും പൊട്ടിച്ചിരിയുടെ പ്രഭാപ്രളയത്തില്‍ ആറാടിക്കാന്‍ അവര്‍ക്കായില്ലെന്നതാണ് സത്യം. സിനിമയില്‍ മാറ്റങ്ങളുടെ കാലമായിരുന്നു. ഏറെയും ചെറുപ്പക്കാരുടെ പരീക്ഷണ ചിത്രങ്ങള്‍. അമ്പിളിച്ചേട്ടന്‍ ആരോഗ്യത്തോടെ ഉണ്ടായിരുന്നുവെങ്കില്‍ പോലും ഇത്തരം ചിത്രങ്ങളുടെ ഭാഗമാവുമായിരുന്നോ എന്ന കാര്യം സംശയമാണ്. അതുകൊണ്ടു തന്നെ അദ്ദേഹത്തിന്റെ അസാന്നിധ്യം എത്രത്തോളം അനുഭവപ്പെട്ടു എന്നു പറയുക പ്രയാസമായിരിക്കും.

ജഗതിക്ക് പകരം വെയ്ക്കാന്‍ ജഗതി മാത്രമേയുള്ളൂ എന്നത്്് സത്യമാണ് എന്ന് ഉറപ്പിക്കാന്‍ അദ്ദേഹത്തിന്റെ അസാന്നിദ്ധ്യം ഇടയാക്കി എന്നു പറഞ്ഞാല്‍ ഒട്ടും അതിശയോക്തിയാവില്ല. അദ്ദേഹത്തിനൊരു പകരക്കാരനെ സ്വപ്നം കാണാന്‍ പോലും പറ്റില്ല.. ചിലപ്പോഴൊക്കെ ജഗതിയുടെ കാലം കഴിഞ്ഞെന്ന മട്ടില്‍ വാര്‍ത്തകള്‍ വന്നു. പക്ഷേ, അങ്ങനെ കരുതിയവരെ പോലും വിസ്മയിപ്പിച്ച് സ്വന്തമൊരിടം മലയാള സിനിമയില്‍ സൃഷ്ടിക്കുകയും ഇപ്പോഴും അതേപടി കാത്തുസൂക്ഷിക്കുകയും ചെയ്യുന്നുണ്ട് അദ്ദേഹം.

അടൂര്‍ഭാസിയും ബഹദൂറുമൊക്കെ അരങ്ങുവാണിരുന്ന കാലത്താണ് ജഗതി സിനിമയില്‍ വരുന്നത്. പപ്പു, മാള അരവിന്ദന്‍, മാമുക്കോയ, ജഗദീഷ്, കലാഭവന്‍ മണി, സലിംകുമാര്‍, സുരാജ് വെഞ്ഞാറമൂട് തുടങ്ങി നിരവധി ആളുകള്‍ ഹാസ്യത്തിന്റെ വഴിയേ വന്നു. ഇവരെല്ലാം പ്രേക്ഷകരുടെ ഹൃദയം കീഴടക്കിയവര്‍ തന്നെയാണ്.

എന്നാല്‍ ജഗതിയെപ്പോലെ ജഗതി മാത്രം. മോഹന്‍ലാല്‍, ശ്രീനിവാസന്‍, ജയറാം, ദിലീപ് എന്നിവര്‍ നായകവേഷത്തോടൊപ്പം തന്നെ കോമഡിയും ചെയ്യുന്നവരായിരുന്നു. പക്ഷേ, ഇവരുടെ ശ്രദ്ധേയമായ കോമഡി വേഷങ്ങള്‍ പരിശോധിച്ചാല്‍ മറ്റൊരു സത്യം വെളിപ്പെടും. ആ സിനിമകളിലെല്ലാം കൂടെ അഭിനയിക്കാന്‍ ജഗതിയുമുണ്ടായിരുന്നു! പ്രതിഭകള്‍ ഒന്നിക്കുമ്പോള്‍ ഒരാള്‍ മറ്റൊരാള്‍ക്ക് പ്രചോദനമാകുന്നു എന്നര്‍ഥം. നമ്മളെ ഏറെ ചിരിപ്പിക്കുകയും ചിന്തിപ്പിക്കുകയും ചെയ്ത ജഗതി വീണ്ടും സിനിമയില്‍ തിരിച്ചെത്തണമെന്നാണ് മലയാളികളുടെ മുഴുവന്‍ പ്രാര്‍ത്ഥന.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha