2013 ല്‍ വര്‍ക്കല വണ്ടിപ്പുര, കാകുളത്തു കാവ് മാടന്‍ നട ഉത്സവ ദിവസം നടന്ന അയിരൂര്‍ ഷിബു കുമാര്‍ കൊലക്കേസില്‍ 4 പ്രതികള്‍ക്കും ജീവപര്യന്തം തടവും 1.5 ലക്ഷം വീതം പിഴയും ശിക്ഷ വിധിച്ചു. പിഴ ഒടുക്കിയില്ലെങ്കില്‍ ഒന്നര വര്‍ഷം അധിക തടവനുഭവിക്കണം.

4 പ്രതികളും കുറ്റക്കാരെന്ന് തലസ്ഥാന വിചാരണ കോടതി കണ്ടെത്തിയിരുന്നു. തിരുവനന്തപുരം ആറാം അഡീ. ജില്ലാ ജഡ്ജ് കെ. വിഷ്ണുവാണ് പ്രതികള ശിക്ഷിച്ചത്. 1 മുതല്‍ 4 വരെ പ്രതികളായ ഷിജു @വലിയ തമ്പി, ഷിജി @കൊച്ചു തമ്പി, ബിജു @അപ്പിമോന്‍, മുനീര്‍ @തക്കുടു എന്നിവരെയാണ് ശിക്ഷിച്ചത്.

ശിക്ഷ അനുഭവിക്കാനായി പ്രതികളെ കോടതി കണ്‍വിക്ഷന്‍ വാറണ്ട് പ്രകാരം പൂജപ്പുര സെന്‍ട്രല്‍ ജയിലില്‍ അടച്ചു. ഉത്സവ ദിവസം വണ്ടിപ്പുര ഷമ്മി നിവാസില്‍ ടെറസില്‍ ഉറങ്ങിക്കിടന്ന ഷിബുകുമാറിനെയും, ചേട്ടന്‍ ഷമ്മിയെയും, ആക്രമിക്കുകയും, ടെറസില്‍ നിന്നും ചാടി ഓടി രക്ഷപ്പെടാന്‍ ശ്രമിച്ച ഷിബുകുമാറിനെ പ്രതികള്‍ പിന്തുടര്‍ന്ന് തൊട്ടടുത്തു താമസക്കാരനായ അയിരൂര്‍ മുന്‍ പഞ്ചായത്ത് പ്രസിഡന്റ് പപ്പുക്കുട്ടിയുടെ വീടിനു പുറകില്‍ പറമ്പില്‍ വച്ച്, കെട്ടിയിരുന്ന അയയില്‍ തട്ടിവീണ ഷിബുകുമാറിനെ 1 മുതല്‍ 4 വരെ പ്രതികളുടെ നേതൃത്വത്തില്‍ വെട്ടിയും, അടിച്ചും, വിളക്ക് കല്ലിനു ഇടിച്ചും കൊലപ്പെടുത്തിയെന്നാണ് കേസ്.

ഷിബുകുമാര്‍,1 ഉം 2ഉം പ്രതികളുടെ വല്ല്യമ്മയുടെ മകളെ, സ്‌നേഹിച്ചു കൂട്ടികൊണ്ട് വന്നു കൂടെ താമസിച്ചതിലുള്ള വൈരാഗ്യമാണ് കൊലപാതകത്തില്‍ കലാശിച്ചത്. ഷിബുകുമാര്‍ കൊല്ലപ്പെടുമ്പോള്‍ ഭാര്യ 8 മാസം ഗര്‍ഭിണി ആയിരുന്നു. പ്രോസിക്യൂഷന് വേണ്ടി അഡീ. പബ്ലിക് പ്രോസിക്യൂട്ടര്‍ എ.ആര്‍. ഷാജി ഹാജരായി.
(പ്രതികള്‍ 1, ഷിജു @വലിയ തമ്പി,2, ഷിജി @കൊച്ചു തമ്പി,3, ബിജു @അപ്പിമോന്‍,4, മുനീര്‍ @തക്കുടു