ഇടുക്കി പൂപ്പാറ മൂലത്തറയില്‍ തോട്ടം തൊഴിലാളിയെ കാട്ടാന ചവിട്ടിക്കൊന്നു. കാട്ടാനയുടെ ആക്രമണത്തില്‍ നെന്മാറ സ്വദേശി ഹനീഫ യൂസഫാണ് മരിച്ചത്. തിങ്കളാഴ്ച രാവിലെയാണ് സംഭവം.ജോലിക്ക് പോകുംവഴി വഴിയരികില്‍ നിന്നിരുന്ന കാട്ടാന ആക്രമിക്കുകയായിരുന്നു.തലയ്ക്ക് ഗുരുതരമായി പരിക്കേറ്റ ഹനീഫ തത്ക്ഷണം മരിച്ചു. രാവിലെ തോട്ടത്തില്‍ ജോലിക്കെത്തിയവരാണ് മൃതദ്ദേഹം കണ്ടെത്തിയത്. പോലീസും വനംവകുപ്പ് ഉദ്യോഗസ്ഥരും സ്ഥലത്തെത്തി മൃതദ്ദേഹം നീക്കാന്‍ ശ്രമിച്ചെങ്കിലും തൊഴിലാളികള്‍ തടഞ്ഞു. വന്യമൃഗങ്ങളുടെ ആക്രമണം തടയാന്‍ അധികൃതര്‍ നടപടി സ്വീകരിക്കുന്നില്ലെന്ന് ആരോപിച്ച് നാട്ടുകാര്‍ കൊച്ചിധനുഷ്‌കോടി ദേശീയപാത ഉപരോധിച്ചു. മാസങ്ങളായി തുടരുന്ന വന്യമൃഗശല്യത്തില്‍ വനംനവകുപ്പുള്‍പ്പെടെയുള്ള സംവിധാനങ്ങള്‍ നിസംഗത തുടരുകയാണെന്നും നാട്ടുകാര്‍ പറയുന്നു.ജില്ലാ പഞ്ചായത്ത് പ്രസിഡന്റ് കൊച്ചുത്രേസ്യാ പൗലോസ്, കെകെ ജയചന്ദ്രന്‍ എംഎല്‍എ തുടങ്ങിയവര്‍ സ്ഥലത്തെത്തിയെങ്കിലും നാട്ടുകാരെ അനുനയിപ്പിക്കാനായില്ല. ഈ മാസം 30ന് കളക്ടറുടെ നേതൃത്വത്തില്‍ ചര്‍ച്ച നടത്താമെന്ന ദേവികുളം സബ്കളക്ടറുടെ ഉറപ്പിലാണ് സമരം അവസാനിപ്പിച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha