ശ്രേഷ്ഠ മലയാളത്തിന്റെ മഹാകവിക്ക് പതിനായിരങ്ങളുടെ അന്ത്യാഞ്ജലി; ഇന്നു രാവിലെ പത്തിന് തൈക്കാട് ശാന്തികവാടത്തില് പൂര്ണ ഔദ്യോഗിക ബഹുമതികളോടെ സംസ്കാരം
ശ്രേഷ്ഠമലയാളത്തിന്റെ മഹാകവിക്കു പതിനായിരങ്ങളുടെ അന്ത്യാഞ്ജലി. ശനിയാഴ്ച അന്തരിച്ച ഒ.എന്.വി. കുറുപ്പിന് ആദരാഞ്ജലികളുമായി കേരളത്തിനകത്തും പുറത്തും നിന്നായി ആരാധകരും പ്രിയപ്പെട്ടവരും ഒഴുകിയെത്തി. ഇന്നു രാവിലെ പത്തിനു തൈക്കാട് ശാന്തികവാടത്തില് പൂര്ണ ഔദ്യോഗിക ബഹുമതികളോടെ സംസ്കാരം. മുഖ്യമന്ത്രി ഉമ്മന് ചാണ്ടി ഉള്പ്പെടെയുള്ളവര് സംസ്കാരച്ചടങ്ങുകളില് പങ്കെടുക്കും.
ഒ.എന്.വിയുടെ വസതിയായ വഴുതക്കാട് ഇന്ദീവരത്തിലേക്ക് ഇന്നലെ അതിരാവിലെ മുതല് ജനപ്രവാഹമായിരുന്നു. പ്രതിപക്ഷ നേതാവ് വി.എസ്. അച്യുതാനന്ദന്, ഉപനേതാവ് കോടിയേരി ബാലകൃഷ്ണന്, മന്ത്രി വി.എസ്. ശിവകുമാര്, കാവാലം നാരായണപ്പണിക്കര് തുടങ്ങിയവര് രാവിലെയെത്തി അന്ത്യാഞ്ജലിയര്പ്പിച്ചു. കവി വിഷ്ണു നാരായണന് നമ്പൂതിരി പ്രിയസുഹൃത്തിന്റെ നിശ്ചേതന ശരീരം കണ്ടു പൊട്ടിക്കരഞ്ഞു.
11 മണിയോടെ വിജെടി ഹാളിലെത്തിച്ച മൃതദേഹത്തില് ആദരാഞ്ജലികളര്പ്പിക്കാന് സ്കൂള് വിദ്യാര്ഥികള് മുതല് ഒ.എന്.വിയുടെ സതീര്ഥ്യര് വരെയുണ്ടായിരുന്നു. പലപ്പോഴും കാത്തുനിന്നവരുടെ നിര വിജെടി ഹാളിന്റെ കവാടം കടന്നു റോഡിലേക്കു നീണ്ടു. വിജെടി ഹാളില് പൊലീസ് ഗാര്ഡ് ഓഫ് ഓണര് നല്കി. സ്പീക്കര് എന്. ശക്തന്, സംവിധായകന് അടൂര് ഗോപാലകൃഷ്ണന്, നടി മഞ്ജു വാരിയര് ഉള്പ്പെടെയുള്ളവര് പ്രിയ കവിയെ അവസാനമായി കാണാനെത്തി.
ഒ.എന്.വിയുടെ പത്നി സരോജിനി, മക്കളായ രാജീവ്, ഡോ. മായാദേവി ഉള്പ്പെടെയുള്ളവരെ ആശ്വസിപ്പിച്ചാണു പ്രമുഖര് മടങ്ങിയത്. സുഗതകുമാരി, മധുസൂദനന് നായര്, പ്രഭാവര്മ ഉള്പ്പെടെയുള്ളവര് മുഴുവന് സമയവും കുടുംബത്തിനു ഉള്പ്പെടെയുള്ളവര് മുഴുവന് സമയവും താങ്ങായുണ്ടായിരുന്നു. മൂന്നു മണി വരെയാണു പൊതുദര്ശനത്തിനു സമയം നിശ്ചയിച്ചിരുന്നതെങ്കിലും തിരക്കുമൂലം ഇത് അഞ്ചു മണിവരെ നീട്ടി.
വൈകിട്ട് വീണ്ടും ഇന്ദീവരത്തിലെത്തിച്ചപ്പോഴും ഒട്ടേറെ പേര് അന്ത്യോപചാരമര്പ്പിക്കാനെത്തി. ഒ.എന്.വിയുടെ പേരക്കുട്ടികളായ അപര്ണയും അമൃതയും വിദേശത്തു നിന്ന് ഇന്നലെയെത്തി. പ്രധാനമന്ത്രി നരേന്ദ്ര മോദി, കോണ്ഗ്രസ് ഉപാധ്യക്ഷന് രാഹുല് ഗാന്ധി, റഷ്യന് അംബാസഡര് അലക്സാണ്ടര് കദാകിന് തുടങ്ങിയവര് ഒ.എന്.വിയുടെ നിര്യാണത്തില് അനുശോചിച്ചു. മുഖ്യമന്ത്രി ഉമ്മന് ചാണ്ടി, ഗായകന് യേശുദാസ് ഉള്പ്പെടെയുള്ളവര് ഇന്നു രാവിലെ അന്ത്യാഞ്ജലിയര്പ്പിക്കും. 9.30നു വീട്ടില് നിന്നു തുടങ്ങുന്ന വിലാപയാത്ര പത്തു മണിയോടെ ശാന്തികവാടത്തിലെത്തും.
കവി ഒ.എന്.വി. കുറുപ്പിന് നിയമസഭ ഇന്ന് അന്ത്യോപചാരമര്പ്പിക്കും. എട്ടരയ്ക്കു പകരം ഒ.എന്.വിയുടെ സംസ്കാരച്ചടങ്ങുകള്ക്കു ശേഷം 11.30നായിരിക്കും ഇന്നു നിയമസഭ ചേരുക. കഴിഞ്ഞ ജൂണില് നിയമസഭ ഒ.എന്.വിയെ ആദരിച്ചിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
https://www.facebook.com/Malayalivartha
