ഗോഡ്‌സെയെ വീരനാക്കിയവരാണ് മറ്റുള്ളവരെ ദേശദ്രോഹികളെന്ന് വിളിക്കുന്നതെന്ന് സിപിഎം ജനറല്‍ സെക്രട്ടറി സീതാറാം യച്ചൂരി. വിയോജിക്കുന്നവരെ മോഡി സര്‍ക്കാര്‍ കായികമായി നേരിടുകയാണ്. എകെജി ഭവനു നേരെയുണ്ടായ ആക്രമണം ഇതിനുദാഹരണമാണ്. ഭീഷണിപ്പെടുത്തുന്നവരെ രാഷ്ട്രീയമായി നേരിടുകയും തോല്‍പ്പിക്കുകയും ചെയ്യും. കോണ്‍ഗ്രസും ബിജെപിയും പരസ്പര പൂരകങ്ങളാണ്. കോണ്‍ഗ്രസിന്റെ അഴിമതിയാണ് ബിജെപിയെ അധികാരത്തിലെത്തിച്ചതെന്നും യച്ചൂരി പറഞ്ഞു. സിപിഎം പൊളിറ്റ് ബ്യൂറോ അംഗം പിണറായി വിജയന്‍ നയിക്കുന്ന നവകേരള മാര്‍ച്ചിന്റെ സമാപന സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

പാട്യാല ഹൗസ് കോടതിയില്‍ ആക്രമണം നടത്തിയത് അഭിഭാഷക വേഷത്തിലെത്തിയ ആര്‍എസ്എസുകാരാണ്. ഫാസിസ്റ്റ് പ്രവണതയുടെ ഉദാഹരണമാണിത്. ജെഎന്‍യുവിനെ ദേശവിരുദ്ധമായി മുദ്ര കുത്താനാണ് ആര്‍എസ്എസിന്റെ ശ്രമം. വരുന്ന നിയമസഭാ തിരഞ്ഞെടുപ്പില്‍ ഇടതുപക്ഷം അധികാരത്തില്‍ വരും. ഇടതുപക്ഷത്തിനു മാത്രമേ വര്‍ഗീയതയ്ക്കും സാമ്പത്തിക നയത്തിനും ബദലാകാന്‍ കഴിയൂ. ഇടതുപക്ഷമാണ് യഥാര്‍ഥ ബദലെന്നും യച്ചൂരി പറഞ്ഞു. അഴിമതിയുടെ കാര്യത്തില്‍ മന്‍മോഹന്‍ സിങ്ങും ഉമ്മന്‍ ചാണ്ടിയും തമ്മില്‍ മല്‍സരമാണെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍ പറഞ്ഞു.

ഉമ്മന്‍ചാണ്ടി സര്‍ക്കാരിനെ അറബിക്കടലിലെറിയാന്‍ ജനം തയാറെടുത്തു കഴിഞ്ഞു. ടാഡയും യുപിഎയും കാപ്പയും കാട്ടി വിരട്ടാന്‍ നോക്കേണ്ട. ഇവയൊക്കെ നേരിടാന്‍ കേരളത്തിലെ ജനങ്ങള്‍ക്കറിയാം. വില്ലേജ് ഓഫീസ് മുതല്‍ മുഖ്യമന്ത്രിയുടെ ഓഫീസ് വരെ കൈക്കൂലി കേന്ദ്രങ്ങളായി. ഈ അഴിമതിപ്പണ്ടാരങ്ങള്‍ നാടിന് ശാപമാണ്. ഉമ്മന്‍ചാണ്ടി സര്‍ക്കാരിന്റെ ഭരണത്തില്‍ ജനങ്ങള്‍ പൊറുതിമുട്ടിയിരിക്കുകയാണ്. അഞ്ചു വര്‍ഷക്കാലം വികസന മുരടിപ്പ് മാത്രമാണുണ്ടായതെന്നും കോടിയേരി പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha