നിര്ഭയ യാത്രയ്ക്ക് 16,000 ബസുകളില് ജി.പി.എസ് സംവിധാനം ഉടന് കേരളത്തില്
ഡല്ഹി പെണ്കുട്ടിയുടെ ദുരന്തം കേരളത്തില് ആവര്ത്തിക്കാതിരിക്കാന് മോട്ടോര് വാഹന വകുപ്പ് 16,000 സ്വകാര്യബസുകളില് ഗ്ലോബല് പൊസിഷനിംഗ് സിസ്റ്റം (ജി.പി.എസ് ) സ്ഥാപിക്കുന്നു. നിര്ഭയയ്ക്ക് ശേഷം പെണ്സുരക്ഷയും റോഡ് സുരക്ഷയും ലക്ഷ്യമിട്ട് രാജ്യത്താദ്യമായി നടപ്പാക്കുന്ന പദ്ധതി ഏപ്രിലോടെ യാഥാര്ത്ഥ്യമാവും.
വാഹനത്തിന്റെ യാത്രാവിവരങ്ങള് ജി.പി.എസ് വഴി മോട്ടോര് വാഹനവകുപ്പിനും പൊലീസിനും യഥാസമയം അറിയാം. അപകടസൂചന ലഭിക്കുന്ന യാത്രക്കാരന് ബസിനുള്ളില് സ്ഥാപിച്ച പ്രത്യേക സ്വിച്ചുകളില് അമര്ത്തിയാല് മതി ഉടനടി അധികൃതര്ക്ക് സന്ദേശമെത്തും. രാത്രികാലങ്ങളില് സ്ത്രീകള്ക്ക് സുരക്ഷിതയാത്രയൊരുക്കാന് ഈ സംവിധാനം സഹായകമാവും.
വാഹനങ്ങളിലെ കുറ്റകൃത്യങ്ങള് തടയുക, വേഗത നിയന്ത്രിക്കുക, വാഹനാപകടങ്ങള് കുറയ്ക്കുക, വാഹനങ്ങള് എങ്ങനെ ഉപയോഗിക്കുന്നു എന്നതിനെക്കുറിച്ച് പൂര്ണവിവരം ശേഖരിക്കുക എന്നിവയാണ് പദ്ധതിയിലൂടെ ലക്ഷ്യമിടുന്നത്. ഇതിനുള്ള സോഫ്റ്റ്വെയര് തയ്യാറാക്കാന് സിഡാക്കിനെ ചുമതലപ്പെടുത്തിയിട്ടുണ്ട്. ജി.പി.എസ് ഉപകരണ നിര്മ്മാണത്തിന് കമ്പനികളില് നിന്ന് ഉടന് ടെന്ഡര് വിളിക്കും.
ജി.പി.എസ് വഴി വാഹനത്തിന്റെ സ്ഥാനവും വേഗവും മാസ്റ്റര് കണ്ട്രോള് റൂം, വിവിധ ഇടങ്ങളിലെ 17 മിനി കണ്ട്രോള് റൂമുകള് എന്നിവയിലൂടെ നിരീക്ഷിക്കാനാവും. വേഗനിയന്ത്രണമുള്ള റോഡുകളിലെത്തിയാല് വാഹനം സ്വയം വേഗത നിയന്ത്രിക്കും. എന്ജിനോട് ചേര്ന്ന് ഘടിപ്പിക്കുന്ന പ്രത്യേക ഉപകരണമാണിത് സാദ്ധ്യമാക്കുന്നത്. സ്പീഡ് ഗവര്ണറിലെ തട്ടിപ്പുകള് ഇതിലൂടെ മറികടക്കാം.
അപകടമുണ്ടായാല്, തൊട്ടുമുമ്പ് വാഹനം ഏതു വേഗത്തിലായിരുന്നെന്ന് കണ്ടെത്താം. ഉടമകള്ക്ക് വാഹനത്തിന്റെ വേഗപ്പൂട്ട് പ്രവര്ത്തനം, ബ്രേക്ക് ചെയ്യല്, ഇന്ധനത്തിന്റെ അളവ് തുടങ്ങിയ മുഴുവന് വിവരങ്ങളും മൊബൈല് ഫോണ് വഴി മോട്ടോര് വാഹനവകുപ്പ് കൈമാറും. രണ്ടാംഘട്ടത്തില് ഓട്ടോറിക്ഷകള്, ടാക്സികള്, കാരിയേജ് വാഹനങ്ങള് എന്നിവയിലും സംവിധാനം സ്ഥാപിക്കും. യാത്രാക്കൂലി വിവരവും ജി.പി.എസ് ഡിസ്പ്ലേയില് തെളിയും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivarthahttps://www.facebook.com/Malayalivartha
