ദലിതന്‍ കുളിച്ചതിന്റെ പേരില്‍ ക്ഷേത്രക്കുളത്തില്‍ ശുദ്ധികര്‍മങ്ങള്‍ ചെയ്ത് പുണ്യാഹം തളിച്ചതായി ആരോപണം. ഇതിനെതിരെ വിവിധ ദലിത് സംഘടനാ നേതാക്കള്‍ രംഗത്തെത്തി. വര്‍ഷങ്ങളായി ജീര്‍ണാവസ്ഥയിലായിരുന്ന കൊണ്ടംവള്ളി അയ്യപ്പ ക്ഷേത്രത്തിലെ കുളം അടുത്തിടെയാണ് നവീകരിച്ചത്. ഇതിനു നേതൃത്വം നല്കിയ ദലിത് സമുദായക്കാരന്‍ കുളിച്ചതിനെചൊല്ലിയാണ് വിവാദം. ക്ഷേത്രക്കുളം നവീകരിക്കാന്‍ രൂപീകരിച്ച കമ്മിറ്റിയുടെ ആദ്യ പ്രസിഡന്റായിരുന്ന ഇദ്ദേഹം നവീകരിച്ച കുളം സമര്‍പ്പണം കഴിഞ്ഞപ്പോള്‍ ആദ്യമായി കുളിക്കാനിറങ്ങുകയായിരുന്നു.

ഒക്ടോബര്‍ 17-നായിരുന്നു സംഭവം. ഇതിനെതിരെ അപ്പോള്‍തന്നെ സവര്‍ണവിഭാഗക്കാര്‍ അതൃപ്തി പ്രകടിപ്പിച്ചിരുന്നതായി ദലിത് സംഘടനാ നേതാക്കള്‍ പറയുന്നു. ഇക്കൂട്ടത്തില്‍ ചിലര്‍ മുന്‍കൈയെടുത്ത് ഇക്കഴിഞ്ഞ ജനുവരി 26-ന് ശുദ്ധികര്‍മങ്ങള്‍ നടത്തി പുണ്യാഹം തളിച്ച് പുനര്‍സമര്‍പ്പണം നടത്തിയെന്നാണ് ആരോപണം. ക്ഷേത്രകമ്മിറ്റിയേയോ കുളം സമര്‍പ്പണം നിര്‍വഹിച്ച തന്ത്രിയെയോ ഇക്കാര്യങ്ങള്‍ അറിയിച്ചില്ല. ക്ഷേത്രത്തിലെ മുന്‍ശാന്തിക്കാരനെ വരുത്തിയാണ് പുനര്‍സമര്‍പ്പണം നടത്തിയതെന്നും സംഘടനാ നേതാക്കള്‍ പറഞ്ഞു.

കേരളത്തിന്റെ സാമൂഹിക അന്തരീക്ഷത്തെ വികൃതമാക്കുന്ന സംഭവമാണ് കൊണ്ടംവള്ളി അയ്യപ്പക്ഷേത്രത്തില്‍ നടന്നത്. ചാതുര്‍വര്‍ണ്യ വ്യവസ്ഥിതി തിരികെ കൊണ്ടുവരാനുള്ള നീക്കം നടക്കുന്നതിന്റെ ഭാഗമാണിതെന്നും ഇതിനെതിരെ പൊതുസമൂഹം രംഗത്തുവരണമെന്നും വിവിധ ദലിത് സംഘടനാ ഭാരവാഹികളായ എം.എം. ശ്രീധരന്‍, പി.എം.ബി നടേരി, ശശീന്ദ്രന്‍ ബപ്പന്‍കാട്, നിര്‍മലൂര്‍ ബാലന്‍ തുടങ്ങിയവര്‍ ആവശ്യപ്പെട്ടു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha