ക്ഷേത്രങ്ങള്‍ വിപ്ലവഗാനങ്ങള്‍ പാടാനുള്ള സ്ഥലമല്ല: ക്ഷേത്രത്തിലെ ഉത്സവത്തില്‍ വിപ്ലവ ഗാനം പാടിയതില്‍ ഹൈക്കോടതിയുടെ രൂക്ഷവിമര്‍ശനം
ക്ഷേത്രത്തിലെ ഉത്സവത്തില്‍ കമ്മ്യൂണിസ്റ്റ് പാര്‍ട്ടിയുടെ വിപ്ലവ ഗാനം പാടിയതില്‍ രൂക്ഷവിമര്‍ശനവുമായി ഹൈക്കോടതി. ക്ഷേത്രങ്ങള്‍ വിപ്ലവഗാനങ്ങള്‍ പാടാനുള്ള സ്ഥലമല്ലെന്നും കോടതി പറഞ്ഞു. മാര്‍ച്ച് 10-നാണ് കൊല്ലം കടയ്ക്കല്‍ ക്ഷേത്രത്തില്‍ ഗായകന്‍ അലോഷി വിപ്ലവഗാനം പാടിയത്. ഇത് പിന്നീട് വന്‍വിവാദമായിരുന്നു.
ഒരു ക്ഷേത്രത്തില്‍ ഇത്തരം പരിപാടി നടത്താന്‍ പാടില്ലെന്ന് ഹൈക്കോടതി പറഞ്ഞു. ഇത് ക്ഷേത്ര ഉത്സവമാണെന്നും അല്ലാതെ കോളേജ് ആന്വല്‍ ഡേയോ രാഷ്ട്രീയ പാര്‍ട്ടിയുടെ പരിപാടിയോ അല്ലെന്നും കോടതി പറഞ്ഞു.
ക്ഷേത്രവുമായി ബന്ധപ്പെട്ട പരിപാടികള്‍ക്ക് ക്ഷേത്ര ചടങ്ങുകളും അതോടൊപ്പം ക്ഷേത്രത്തില്‍ നടത്താന്‍ കഴിയുന്ന മറ്റു പരിപാടികളും മാത്രമേ ക്ഷേത്രത്തില്‍ നടക്കാന്‍ പാടുള്ളൂ. അല്ലാതെ ഏതെങ്കിലും ഒരു രാഷ്ട്രീയ പാര്‍ട്ടിയുടെ വിപ്ലവഗാനം ആലപിക്കാനുള്ള ഇടമല്ല ക്ഷേത്രങ്ങള്‍ എന്ന് കോടതി വ്യക്തമാക്കി. ഡിവൈഎഫ്‌ഐ സിന്ദാബാദ് എന്ന് വിളിച്ചതിനേയും കോടതി വിമര്‍ശിച്ചു. കേസില്‍ ദേവസ്വം സെക്രട്ടറിയെ കോടതി കക്ഷി ചേര്‍ത്തു. അടുത്ത ദിവസം കേസ് പരിഗണിക്കുമ്പോള്‍ ദേവസ്വം സെക്രട്ടറി സര്‍ക്കാരിന്റെ നിലപാട് കോടതിയില്‍ അറിയിക്കും.
https://www.facebook.com/Malayalivartha
