ലഹരിക്കടിമയായ ഭര്‍ത്താവ് ലഹരി ഉപയോഗിച്ച് വീട്ടിലെത്തി ഭാര്യയെ വെട്ടിക്കൊലപ്പെടുത്തി. തടയാന്‍ ശ്രമിച്ച ഭാര്യാ പിതാവിനെയും മാതാവിനെയും വെട്ടി പരിക്കേല്‍പ്പിച്ചു. കോഴിക്കോട് ഈങ്ങാപ്പുഴയിലാണ് സംഭവം. യാസര്‍ എന്ന യുവാവാണ് ഭാര്യ ഷിബിലയെ വെട്ടിക്കൊലപ്പെടുത്തിയത്. ഷിബിലയുടെ പിതാവായ അബ്ദുറഹ്‌മാനെയും മാതാവ് ഹസീനയെയുമാണ് ഇയാള്‍ വെട്ടി പരിക്കേല്‍പ്പിച്ചത്. ഇതില്‍ അബ്ദുറഹ്‌മാന്റെ നില ഗുരുതരമാണ്. കോഴിക്കോട് മെഡിക്കല്‍ കോളേജിലാണ് ഇദ്ദേഹത്തെ പ്രവേശിപ്പിച്ചത്. ഹസീനയെ താമരശ്ശേരി താലൂക്ക് ആശുപത്രിയില്‍ പ്രവേശിപ്പിച്ചു.

മകളെ ആക്രമിക്കുന്നത് തടഞ്ഞ സമയത്താണ് മാതാപിതാക്കള്‍ക്ക് നേരെ ആക്രമണം ഉണ്ടായത്. ഇന്ന് വൈകുന്നേരം ലഹരി ഉപയോഗിച്ചശേഷം എത്തിയാണ് യാസര്‍ ആക്രമണം നടത്തിയതെന്ന് അയല്‍വാസികള്‍ പറഞ്ഞു. യാസര്‍ മുന്‍പും കുടുംബപ്രശ്നങ്ങളെ തുടര്‍ന്ന് ഷിബിലയെ മര്‍ദ്ദിച്ചിരുന്നു എന്ന് ഷിബിലയുടെ ബന്ധുക്കള്‍ ആരോപിച്ചു.

ഉപദ്രവം സഹിക്കാനാകാതെ ഷിബില സ്വന്തംവീട്ടിലേക്ക് താമസം മാറിയിരുന്നു. യാസറിന്റെ ഭീഷണിയുണ്ടെന്ന് കാട്ടി താമരശ്ശേരി പൊലീസില്‍ പരാതി നല്‍കിയിരുന്നു എങ്കിലും അന്വേഷണം കാര്യക്ഷമമായിരുന്നില്ല എന്നാണ് കുടുംബത്തിന്റെ പരാതി. ആക്രമണ ശേഷം പ്രതി ഒളിവില്‍ പോയി. ഇയാള്‍ക്കായുള്ള അന്വേഷണം നടക്കുകയാണ്.