തിരുവനന്തപുരത്ത് ചികിത്സ തേടി ആശുപത്രിയില്‍ എത്തിയവര്‍ വനിതാ ഡോക്ടറെയും ആശുപത്രി ജീവനക്കാരെയും ആക്രമിച്ചു. ആക്രമണത്തിന് പിന്നാലെ ആശുപത്രി തകര്‍ക്കുകയും ചെയ്ത സംഭവത്തില്‍ പ്രതികള്‍ പിടിയില്‍. തിരുവനന്തപുരം കല്ലറ തറട്ടയിലെ സാമൂഹ്യാരോഗ്യ കേന്ദ്രത്തില്‍ തിങ്കളാഴ്ച രാത്രി 11.35നാണ് സംഭവം. കല്ലറ കാട്ടുപുറം സ്വദേശി അരുണ്‍ (35),മുണ്ടോണിക്കര സ്വദേശി ശ്യാം നായര്‍ (43)എന്നിവരാണ് പാങ്ങോട് പൊലീസിന്റെ പിടിയിലായത്. ഇവരെ അറസ്റ്റ് ചെയ്തു.

മദ്യപാനത്തിനിടെ ബാറില്‍ വച്ചുണ്ടായ അടിപിടിയില്‍ തലയ്ക്ക് പരിക്കേറ്റാണ് ഇവര്‍ ചികിത്സ തേടി സാമൂഹ്യാരോഗ്യ കേന്ദ്രത്തിലെത്തിയത്. ഡ്യൂട്ടിയിലുണ്ടായിരുന്ന വനിതാ ഡോക്ടര്‍, അരുണിനോട് ഒപി ടിക്കറ്റെടുക്കണം എന്ന് പറഞ്ഞസമയം ഇവര്‍ ബഹളം വച്ചു. പരിക്കേറ്റയാള്‍ക്ക് ഡോക്ടറും നഴ്സുമാരും ചേര്‍ന്ന് മരുന്നുവയ്ക്കവെ രണ്ടാം പ്രതി മുറിയില്‍ അതിക്രമിച്ച് കയറി വീഡിയോ പകര്‍ത്തി. പിന്നാലെ ഡോക്ടറെ ഇവര്‍ അസഭ്യം പറയുകയും ഭീഷണിപ്പെടുത്തുകയും ചെയ്തു. ആശുപത്രി ജീവനക്കാര്‍ക്ക് നേരെ കത്തിവീശിയ ഇവര്‍ ഡോക്ടറെ കത്രിക കൊണ്ട് കുത്താന്‍ ശ്രമിച്ചു. വനിതാ ഡോക്ടര്‍ ശുചിമുറിയിലൊളിച്ചു. ഇതിനിടെ ഇവര്‍ ആശുപത്രി തകര്‍ത്തു.

മരുന്നടക്കമുള്ള സാധനങ്ങള്‍ പ്രതികള്‍ തകര്‍ത്തു. വിവരമറിഞ്ഞെത്തിയ പാങ്ങോട് പൊലീസിനോടും ഇവര്‍ അക്രമത്തിന് മുതിര്‍ന്നു. ഇവരെ പൊലീസ് പിന്നാലെ പിടികൂടി. ഡോക്ടറുടെ പരാതിയില്‍ പൊലീസ് കേസെടുത്തു. പാങ്ങോട് എസ്എച്ച്ഒ ജിനേഷിന്റെ തേതൃത്വത്തില്‍ പൊലീസ് സംഘമാണ് ഇവരെ അറസ്റ്റ് ചെയ്തത്.