യുവാക്കള് സഞ്ചരിച്ച ബൈക്കില് ലോറിയിടിച്ച് ഒരു മരണം...ഒരാള് പരുക്കേറ്റ് ആശുപത്രിയില്

അങ്കമാലിയില് യുവാക്കള് സഞ്ചരിച്ച ബൈക്കില് ലോറിയിടിച്ച് ഒരാള് മരിച്ചു. ഒപ്പം സഞ്ചരിച്ചയാള്ക്ക് സാരമായ പരിക്കേറ്റു. കെ.ടി.എം ബജാജ് ഷോറൂം ജീവനക്കാരാണ്.
അങ്കമാലി എളവൂര്കവലയിലെ കെ.ടി.എം ബജാജ് ഷോറൂമിലെ ട്രെയിനിയായ കാലടി കാഞ്ഞൂര് കാവലങ്ങാട്ടുതറ വീട്ടില് സുനില് കുമാറിന്റെ മകന് കിഷോറാണ് (20) മരിച്ചത്. മേജര് ടെക്നീഷ്യനായ ഇടുക്കി സ്വദേശി അരുണിനാണ് (28) പരിക്കേറ്റത്. വ്യാഴാഴ്ച രാവിലെ 10.15 ഓടെ എളവൂര്-പുളിയനം റോഡില് റെയില്വേ ഓവര്ബ്രിഡ്ജിന് താഴെയായിരുന്നു സംഭവം.
പുളിയനം ഭാഗത്ത് നിന്ന് ഇരുവരും ബൈക്കില് വരുമ്പോള് എതിര് ദിശയില് നിന്ന് വരുകയായിരുന്ന ലോറിയിടിച്ചായിരുന്നു അപകടം നടന്നത്. ഇടിയുടെ ആഘാതത്തില് റോഡില് തെറിച്ച് വീണ് തലക്ക് സാരമായി പരുക്കേറ്റ് അവശനിലയിലായ കിഷോറിനെ കറുകുറ്റിയിലെ സ്വകാര്യ ആശുപത്രിയില് പ്രവേശിപ്പിച്ചെങ്കിലും ജീവന് രക്ഷിക്കാന് കഴിഞ്ഞില്ല.
ശരീരമാസകലം പരിക്കേറ്റ അരുണിനെ കറുകുറ്റിയിലെ തന്നെ സ്വകാര്യ ആശുപത്രിയില് തീവ്രപരിചരണ വിഭാഗത്തില് പ്രവേശിപ്പിച്ചു. കിഷോര് അടുത്തിടെ ട്രെയിനിയായാണ് ഷോറൂമിലെത്തിയത്. മാതാവ്: അമ്പലത്തറ കുടുംബാംഗം സിന്ധു. സഹോദരങ്ങള്: കിരണ്, കിച്ചുമോന്, അഖില്. മൃതദേഹം ആശുപത്രി മോര്ച്ചറിയിലാണ്. സംസ്കാരം വെള്ളിയാഴ്ച ഉച്ചക്ക് രണ്ടിന് ചൊവ്വര തെറ്റാലി എസ്.എന്.ഡി.പി ശ്മശാനത്തില് നടക്കും.
https://www.facebook.com/Malayalivartha
























