ശ്രീപദ്മനാഭസ്വാമി ക്ഷേത്രത്തിലെ ഗോശാലയില്‍ നിന്ന് ദിവസവും പാല്‍ മോഷണം പോകുന്നതായി കണ്ടെത്തി. ക്ഷേത്ര വിജിലന്‍സ് നടത്തിയ പരിശോധനയിലാണ് 20 ലിറ്റര്‍ പാല്‍ ദിവസവും കടത്തുന്നുണ്ടെന്ന് കണ്ടെത്തിയത്. ദിവസവും 40 മുതല്‍ 50 ലിറ്ററോളം പാല്‍ ഗോശാലയില്‍ നിന്ന് ലഭിക്കാറുണ്ട്.

എന്നാല്‍ അതില്‍ കുറവ് വരുന്നതായി കണ്ടെത്തി. കടത്തില്‍ സംശയം തോന്നിയ അടിസ്ഥാനത്തില്‍ വെള്ളിയാഴ്ച രാവിലെ ക്ഷേത്രം വിജിലന്‍സ് നടത്തിയ പരിശോധനയിലാണ് അസിസ്റ്റന്റ് സ്റ്റോര്‍ കീപ്പര്‍ തസ്തികയിലുള്ള ഒരു ജീവനക്കാരന്‍ പാല്‍ പുറത്തേക്ക് കടത്താന്‍ മാറ്റിവച്ചതായി കണ്ടെത്തിയത്.

സി.സി ടിവി ഉള്‍പ്പടെ പരിശോധിച്ചാണ് സ്ഥിരീകരണം. സംഭവത്തില്‍ ജീവനക്കാരനെതിരെ ഉടന്‍ നടപടിയെടുക്കുന്നതാണ്. പരിശോധന നടന്ന വെള്ളിയാഴ്ച കടത്താനായി മാറ്റിയ 20 ലിറ്ററോളം പാല്‍ പിന്നീട് ക്ഷേത്രാവശ്യത്തിനായി ഉപയോഗിച്ചതായി കണ്ടെത്തി. ഇതുസംബന്ധിച്ച് അന്വേഷണം നടത്തുന്നതായും ക്ഷേത്രം വിജിലന്‍സ് വിഭാഗം അറിയിച്ചു.

ക്ഷേത്ര ഗോശാലയില്‍ നിന്ന് കറക്കുന്ന പാല്‍ കവറുകളിലാക്കിയാണ് ക്ഷേത്ര ആവശ്യങ്ങള്‍ക്കായി എത്തിക്കുന്നത്. 19പശുക്കളുണ്ട്.ഇതില്‍ ഒന്‍പതെണ്ണം കറവയുള്ളതും 10 എണ്ണം കിടാക്കളുമാണ്.പുലര്‍ച്ചെ 12.30നാണ് പാല്‍ കറക്കുന്നത്. മൂന്ന് മണിക്കുള്ള അഭിഷേകത്തിന് ശേഷം രാവിലെ മറ്റ് ആവശ്യങ്ങള്‍ക്കായി 9.30ന് വീണ്ടും പാല്‍ കറക്കും. സംഭവത്തില്‍ നിലവില്‍ പൊലീസില്‍ പരാതി നല്‍കിയിട്ടില്ല. ക്ഷേത്രത്തിലെ ആഭ്യന്തരതലത്തിലുള്ള അന്വേഷണമാണ് നടക്കുന്നത്‌