കപ്പലപകടത്തിന് ശേഷം തീരത്ത് ഡോള്‍ഫിനുകളുടേയും തിമിംഗലങ്ങളുടെയും ജഡമടിയുന്നു. അമ്പലപ്പുഴ പുന്നപ്രയില്‍ ഡോള്‍ഫിന്റെ ജഡമടിഞ്ഞു. പുന്നപ്ര ഫിഷ് ലാന്റിംഗ് സെന്ററിന് സമീപമാണ് ജഡമടിഞ്ഞത്. തലക്ക് മുറിവേറ്റ നിലയിലായിരുന്നു ഡോള്‍ഫിന്റെ ജഡം. മത്സ്യത്തൊഴിലാളികള്‍ വിവരമറിയിച്ചതിനെത്തുടര്‍ന്ന് ജനപ്രതിനിധികളും വനം വകുപ്പ് ഉദ്യോഗസ്ഥരും സ്ഥലത്ത് എത്തി.

സീനിയര്‍ വെറ്ററിനറി സര്‍ജന്റെ നേതൃത്വത്തില്‍ സംഭവസ്ഥലത്തു വെച്ചു തന്നെ പോസ്റ്റുമോര്‍ട്ടം നടത്തി. മരണ കാരണമറിയാന്‍ ജഡത്തില്‍ നിന്ന് സാമ്പിളുകള്‍ ശേഖരിച്ചശേഷം ഫിഷ് ലാന്റിംഗ് സെന്ററിന് സമീപത്ത് മറവു ചെയ്തു. കപ്പലപകടത്തിന് ശേഷം തീരത്ത് ഡോള്‍ഫിനുകളുടേയും തിമിംഗലങ്ങളുടെയും ജഡമടിയുന്നത് മത്സ്യത്തൊഴിലാളികളെയും തീരദേശവാസികളെയും ആശങ്കയിലാക്കിയിട്ടുണ്ട്.

ഫിഷറീസ് വകുപ്പുദ്യോഗസ്ഥരും തോട്ടപ്പള്ളി തീരദേശ പൊലീസും സ്ഥലത്തെത്തിയിരുന്നു. രണ്ടാഴ്ചക്കിടെ ഇത് മൂന്നാം തവണയാണ് കടലില്‍ നിന്നുള്ള വലിയ ജീവിയുടെ ജഡം തീരത്തടിയുന്നത്. നേരത്തെ തറയില്‍ക്കടവ് ഭാഗത്ത് ഡോള്‍ഫിന്റെ ജഡവും പുറക്കാട് രണ്ട് ഭീമന്‍ തിമിംഗലങ്ങളുടെ ജഡവുമടിഞ്ഞിരുന്നു.