വീടിനു മുന്നില്‍ നിര്‍ത്തിയിട്ടിരുന്ന കാറിന് തീപിടിച്ച് മൂന്നു കുട്ടികള്‍ക്കും അമ്മയ്ക്കും കുട്ടികളുടെ മുത്തശ്ശിക്കും ഗുരുതരമായി പൊള്ളലേറ്റു. പാലക്കാട് പൊല്‍പ്പുളി അത്തിക്കോട് പുളക്കാട് പരേതനായ മാര്‍ട്ടിന്റെ ഭാര്യ എല്‍സി മാര്‍ട്ടിന്‍ (37) മുത്തശ്ശി ഡെയ്‌സി (65), മക്കളായ അലീന (10), ആല്‍ഫിന്‍ (6), എമി (4) എന്നിവര്‍ക്കാണ് പൊള്ളലേറ്റത്. വൈകിട്ട് 5 മണിയോടെയായിരുന്നു അപകടം.

പാലക്കാട് സ്വകാര്യ ആശുപത്രിയിലെ നഴ്‌സായ എല്‍സി ജോലികഴിഞ്ഞ് തിരിച്ചെത്തിയ സമയത്തായിരുന്നു സംഭവം. കുട്ടികളുമായി പുറത്തേക്ക് പോകാന്‍ എല്‍സി കാര്‍ സ്റ്റാര്‍ട്ട് ചെയ്തതോടെ തീ പടരുകയായിരുന്നു. എല്‍സിയും മൂത്ത കുട്ടിയും ആയിരുന്നു മുന്‍ സീറ്റില്‍.

രണ്ട് കുട്ടികള്‍ പുറകിലെ സീറ്റിലും. തീപടര്‍ന്നതോടെ ഇവര്‍ കാറിനകത്ത് കുടുങ്ങുകയായിരുന്നു. എല്‍സിക്കും കുട്ടികളെ രക്ഷിക്കാന്‍ ശ്രമിക്കുന്നതിനിടെ മുത്തശ്ശിക്കും പൊള്ളലേറ്റിട്ടുണ്ട്. ഷോര്‍ട്ട് സര്‍ക്യൂട്ട് കാരണം തീപിടിച്ചതാകാനാണ് സാധ്യതയെന്നാണു പ്രാഥമിക നിഗമനം.