എം.ആര്‍.അജിത്കുമാറിന്റെ ശബരിമല യാത്ര വിവാദത്തില്‍
എഡിജിപി എം.ആര്‍.അജിത്കുമാറിന്റെ ശബരിമല സന്ദര്‍ശനം വിവാദത്തില്‍. എഡിജിപി ശബരിമലയിലേക്ക് നിയമവിരുദ്ധമായി ട്രാക്ടറില്‍ യാത്ര ചെയ്‌തെന്നാണ് ആരോപണം. ചരക്കു നീക്കത്തിനു മാത്രമേ ട്രാക്ടര്‍ ഉപയോഗിക്കാവൂ എന്നും ആളുകള്‍ കയറരുതെന്നും കര്‍ശന ഹൈക്കോടതി നിര്‍ദേശം നിലവിലുണ്ട്. എന്നാല്‍ അജിത്കുമാര്‍ ഇതു ലംഘിച്ചെന്നാണ് ആക്ഷേപം.
ഇതു സംബന്ധിച്ച് രഹസ്യാന്വേഷണ വിഭാഗം റിപ്പോര്‍ട്ട് കൈമാറിയെന്നാണു സൂചന. ട്രാക്ടര്‍ യാത്രയെക്കുറിച്ച് ശബരിമല സ്‌പെഷല്‍ കമ്മിഷണര്‍ ദേവസ്വം വിജിലന്‍സിനോട് റിപ്പോര്‍ട്ട് തേടി. ശനിയാഴ്ച രാത്രി പമ്പയില്‍നിന്ന് സന്നിധാനത്തേക്കും തിരിച്ചും ട്രാക്ടറില്‍ യാത്ര ചെയ്തു എന്നാണ് സൂചന. ക്യാമറകള്‍ ഇല്ലാത്ത ഭാഗത്ത് നിന്നാണ് ട്രാക്ടറില്‍ കയറിയത്. റിപ്പോര്‍ട്ട് കിട്ടിയ ശേഷം സ്‌പെഷല്‍ കമ്മിഷണര്‍ ഹൈക്കോടതിയെ വിവരമറിയിക്കും.
മാളികപ്പുറത്തെ നവഗ്രഹ ക്ഷേത്ര പ്രതിഷ്ഠയുടെ ഭാഗമായി വെള്ളി മുതല്‍ ഞായര്‍ വരെയാണു ശബരിമല നട തുറന്നത്. ഇതിനിടെയാണ് ദര്‍ശനത്തിനായി എഡിജിപി ശബരിമലയിലെത്തിയത്.
https://www.facebook.com/Malayalivartha
