ജനുവരി ആദ്യം ലിറ്ററിന് 200 രൂപയ്ക്ക് താഴെ നിന്നിരുന്ന വെളിച്ചെണ്ണ വില ഇന്ന് 450-ഉം കടന്നു. പൊതിച്ച തേങ്ങയ്ക്ക് കിലോ 75-90 രൂപയിലുമെത്തി. കേരളത്തിലും തമിഴ്നാട് ഉൾപ്പെടെയുള്ള അയൽ സംസ്ഥാനങ്ങളിലും നിന്നുള്ള കൊപ്ര വരവ് കുറഞ്ഞതാണ് വെളിച്ചെണ്ണ വില ഉയരാൻ പ്രധാന കാരണമായി വ്യാപാരികൾ പറയുന്നത്. കൊപ്ര കിട്ടാനില്ലാതെ വന്നതോടെ ചെറുകിട ആട്ടുമില്ലുകളുടെ പ്രവർത്തനം മന്ദീഭവിച്ചു.നാളികേര ലഭ്യതയിൽ 35 ശതമാനം കുറവുണ്ടായതായി.

ഇതിനു പിന്നാലെ ട്രോളുകളും ഇറങ്ങിയിരുന്നു. വെളിച്ചെണ്ണ മോഷ്ടിക്കുന്ന കള്ളന്മാരെ പറ്റി. ഇപ്പോൾ ഇതാ ട്രോളുകൾ സത്യമാക്കി കൊണ്ട് ആലുവയിലെ പലചരക്ക് കടയിൽ നിന്നും 30 കുപ്പി വെളിച്ചെണ്ണ മോഷണം പോയി. ലിറ്ററിന് 600 രൂപ വിലയുള്ള മുന്തിയ ഇനം വെളിച്ചെണ്ണയാണ് കവർന്നത്. തോട്ടുമുഖം പാലത്തിനു സമീപം പുത്തൻപുരയിൽ അയൂബ് നടത്തുന്ന ‘ഷാ വെജിറ്റബിൾസ് ആൻഡ് ഫ്രൂട്സ്’ കടയിലായിരുന്നു മോഷണം.

വെളിച്ചെണ്ണയ്‌ക്കൊപ്പം പത്ത് പാക്കറ്റ് പാലും ഒരുപെട്ടി ആപ്പിളും ഇയാൾ കവ‍ർന്നു. ഒടുവിൽ ഫ്രിജിൽ നിന്ന് സോഫ്റ്റ് ഡ്രിങ്ക് കുടിച്ച് ക്ഷീണമകറ്റിയശേഷമാണ് കള്ളൻ സ്ഥലം വിട്ടത്. പോകുന്ന വഴിയിൽ സിസിടിവി ശ്രദ്ധയിൽപ്പെട്ടതോടെ അതിന്റെ ​കേബിൾ അറുത്ത് മാറ്റിയ ശേഷമാണ് കള്ളൻ പോയത്. എന്നാൽ ഇയാൾ കടയുടെ പൂട്ട് തല്ലിപ്പൊളിച്ച് അകത്തു കയറുന്ന ദൃശ്യങ്ങൾ സിസിടിവിൽ പതിഞ്ഞിട്ടുണ്ട്.