രാഷ്ട്രപതി തിരിച്ചയച്ച ബില്ലുകള് ഭേദഗതികളോടെ വീണ്ടും നിയമസഭയില് കൊണ്ടുവരുന്നത് സര്ക്കാര് പരിഗണനയില്...
രാഷ്ട്രപതി തിരിച്ചയച്ച ബില്ലുകള് ഭേദഗതികളോടെ വീണ്ടും നിയമസഭയില് കൊണ്ടുവരുന്നത് സര്ക്കാര് പരിഗണനയില്. സര്വകലാശാലകളുടെ ചാന്സലര് പദവിയില് നിന്ന് ഗവര്ണറെ നീക്കി പകരം വിദ്യാഭ്യാസ വിചക്ഷണരെ ചാന്സലറാക്കാനായി വ്യവസ്ഥ ചെയ്യുന്ന 2022ലെ സര്വകലാശാല നിയമഭേദഗതി ബില്, വി.സി നിയമനത്തിനുള്ള സെര്ച് കമ്മിറ്റിയുടെ ഘടനയില് മാറ്റം വ്യവസ്ഥ ചെയ്യുന്ന 2022ലെ സര്വകലാശാല നിയമ ഭേദഗതി ബില് എന്നിവയാണ് നേരിയ ഭേദഗതികളോടെ വീണ്ടും സഭയില് കൊണ്ടുവരാനായി സര്ക്കാര്തലത്തില് ആലോചന നടക്കുന്നത്.
ബില് വീണ്ടും കൊണ്ടു വരുന്നതിന്റെ നിയമപരമായ സാധ്യതകള് കൂടി പരിശോധിച്ചായിരിക്കും തീരുമാനം. രണ്ട് ബില്ലുകളും നിയമസഭ പാസാക്കുകയും ഗവര്ണറുടെ അംഗീകാരത്തിനായി അയക്കുകയും ചെയ്തിട്ടുണ്ടായിരുന്നു. ഗവര്ണര് ആരിഫ് മുഹമ്മദ് ഖാന് ഏറെക്കാലം ബില്ലില് ഒപ്പിടാതെ തടഞ്ഞുവെച്ചു. അതിനെതിരെ സംസ്ഥാന സര്ക്കാര് സുപ്രീംകോടതിയെ സമീപിച്ചതോടെ ഗവര്ണര് ഇവ രാഷ്ട്രപതിക്ക് റഫര് ചെയ്തു.
രണ്ട് ബില്ലുകളും രാഷ്ട്രപതി അംഗീകാരം നല്കാതെ തിരിച്ചയക്കുകയും ചെയ്തു. സര്വകലാശാല അപ്പലേറ്റ് ട്രൈബ്യൂണലിന്റെ നിയമനത്തില് ചാന്സലര്ക്കുണ്ടായിരുന്ന അധികാരം എടുത്തുമാറ്റാനുള്ള ബില്ലും സഭ പാസാക്കിയെങ്കിലും ഇതും രാഷ്ട്രപതിക്കയക്കുകയും തിരിച്ചയക്കുകയും ചെയ്തിരുന്നു.അതേസമയം ബില്ലുകളില് തീരുമാനമെടുക്കുന്നതില് വ്യക്തത വരാനായി ഇനി ഭരണഘടന ബെഞ്ചിന്റെ വിധി വരെ കാത്തിരിക്കേണ്ടിവരും. ഈ സാഹചര്യത്തില് കൂടിയാണ് തിരിച്ചയച്ച ബില്ലുകളില് നേരിയ ഭേദഗതികളോടെ വീണ്ടും സഭയില് കൊണ്ടുവരാനായി സര്ക്കാര് ആലോചനയുള്ളത്.
https://www.facebook.com/Malayalivartha
