കുടുംബത്തിലെ കഴിഞ്ഞ കാര്യങ്ങള്‍ പറഞ്ഞ് വിശ്വാസിപ്പിച്ച് ഭര്‍ത്താവിനും മരുമക്കള്‍ക്കും അപകടം വരുമെന്ന് പറഞ്ഞ് ഭയപ്പെടുത്തി വേളാങ്കണ്ണി മാതാവിന്റെ പ്രതിരൂപമാണ് താനെന്ന് പറഞ്ഞ് വീട്ടമ്മയെ വിശ്വസിപ്പിച്ച് സ്വര്‍ണവും പണവും തട്ടിയ സ്ത്രീ പിടിയില്‍. പള്ളിക്കല്‍ ആനയടി സ്വദേശിനിയായ തുളസി (57)യെ ആണ് പൊലീസ് അറസ്റ്റ് ചെയ്തത്. ഏനാത്ത് കടമ്പനാട് വടക്ക് സ്വദേശിനി ലീലാമ്മ (74) ആണ് തട്ടിപ്പിനിരയായത്.

ഭര്‍ത്താവിനും മരുമക്കള്‍ക്കും അപകടം വരുമെന്ന് പറഞ്ഞ് ഭയപ്പെടുത്തി വീട്ടമ്മയുടെ സ്വര്‍ണവും പണവും കവരുകയായിരുന്നു.ഓഗസ്റ്റ് 10ന് രാവിലെ 9.30ഓടെ ലീലാമ്മയുടെ വീട്ടിലെത്തിയ പ്രതി, വീട്ടിലെ പഴയ കാര്യങ്ങള്‍ പറഞ്ഞ് അവരെ വിശ്വസിപ്പിച്ചു. താന്‍ വേളാങ്കണ്ണി മാതാവിന്റെ പ്രതിരൂപമാണെന്ന് പറഞ്ഞ ഇവര്‍, ലീലാമ്മയുടെ ഭര്‍ത്താവിനും മരുമക്കള്‍ക്കും ആപത്ത് സംഭവിക്കുമെന്നും അത് ഒഴിവാക്കാന്‍ വഴിപാടുകള്‍ നടത്തണമെന്നും പറഞ്ഞ് ഭയപ്പെടുത്തി. ആപത്ത് ഒഴിവാക്കാന്‍ 51 പേര്‍ക്ക് ഊണ് നല്‍കണമെന്ന് പറഞ്ഞ് ആദ്യം 5,000 രൂപ വാങ്ങി. പണം അലമാരയില്‍ ഉണ്ടെന്ന് 'ദീര്‍ഘദൃഷ്ടി'യിലൂടെ കണ്ടെന്ന് പറഞ്ഞ് ലീലാമ്മയെ അത്ഭുതപ്പെടുത്തി.

തുടര്‍ന്ന്, ഈ തുകകൊണ്ട് ആപത്ത് മാറില്ലെന്ന് പറഞ്ഞ്, കൊന്ത ഉയര്‍ത്തി പ്രാര്‍ത്ഥനകള്‍ നടത്തി ലീലാമ്മയെ ഭയപ്പെടുത്തി. ശേഷം, കൈയ്യിലുണ്ടായിരുന്ന 1.25 പവന്‍ സ്വര്‍ണ്ണവള, അര പവന്‍ വീതമുള്ള 3 സ്വര്‍ണ്ണമോതിരങ്ങള്‍, 2 ഗ്രാം സ്വര്‍ണ്ണ കോയിന്‍ എന്നിവയുള്‍പ്പെടെ ആകെ 3 പവന്‍ സ്വര്‍ണ്ണാഭരണങ്ങള്‍ പ്രതിക്ക് കൈമാറാന്‍ ആവശ്യപ്പെട്ടു. പ്രാര്‍ത്ഥിച്ച് തിങ്കളാഴ്ച തിരികെ നല്‍കാമെന്ന് പറഞ്ഞ് പ്രതി സ്വര്‍ണ്ണവുമായി കടന്നുകളഞ്ഞു.സംഭവം നടന്ന വൈകുന്നേരം തന്നെ ലീലാമ്മ ഏനാത്ത് പൊലീസില്‍ പരാതി നല്‍കുകയായിരുന്നു.

മൊഴി രേഖപ്പെടുത്തി കേസെടുത്ത പോലീസ് സിസിടിവി ദൃശ്യങ്ങള്‍ പരിശോധിച്ച് പ്രതിയെ മണിക്കൂറുകള്‍ക്കകം വീട്ടില്‍ നിന്ന് കസ്റ്റഡിയിലെടുത്തു. ഏകദേശം 2,15,000 രൂപയുടെ നഷ്ടമാണ് ലീലാമ്മയ്ക്ക് ഉണ്ടായത്. തുളസിയുടെ കൈവശം ഉണ്ടായിരുന്ന സ്വര്‍ണം പൊലീസ് കണ്ടെത്തുകയും ബാങ്ക് അപ്രൈസറെ കൊണ്ട് പരിശോധിപ്പിച്ച് ഉറപ്പുവരുത്തുകയും ചെയ്തു. വിശദമായ ചോദ്യം ചെയ്യലില്‍ പ്രതി കുറ്റം സമ്മതിച്ചു. തുടര്‍ന്ന് അറസ്റ്റ് രേഖപ്പെടുത്തി കോടതിയില്‍ ഹാജരാക്കി റിമാന്‍ഡ് ചെയ്തു.