ചാലക്കുടിയിലെ ബ്യൂട്ടിപാര്‍ലര്‍ ഉടമ ഷീല സണ്ണിയെ വ്യാജ ലഹരി കേസില്‍ കുടുക്കിയ കേസിലെ ഒന്നാം പ്രതി നാരായണ ദാസിന് ജാമ്യം. 104 ദിവസമായി റിമാന്‍ഡിലായിരുന്നു നാരായണ ദാസ്. അറസ്റ്റ് രേഖപ്പെടുത്തിയപ്പോള്‍ കാരണം ബോധിപ്പിക്കാത്തതിനാല്‍ പൊലീസ് നടപടി നിയമവിരുദ്ധമാണെന്ന് ചൂണ്ടിക്കാട്ടിയാണ് ഹൈക്കോടതി ജാമ്യം അനുവദിച്ചത്. പ്രതിയുടെ അറസ്റ്റ് മെമ്മോ പരിശോധിച്ച കോടതി, നിയമത്തിലെ വ്യവസ്ഥകള്‍ മാത്രമാണ് രേഖപ്പെടുത്തിയിരിക്കുന്നതെന്നും അറസ്റ്റിനുള്ള കാരണങ്ങള്‍ വ്യക്തമായി രേഖപ്പെടുത്തിയിട്ടില്ലെന്നും നിരീക്ഷിച്ചു. പ്രതിയുടെ പിതാവിന് നല്‍കിയ അറസ്റ്റ് നോട്ടിസിലും സമാനമാണ് സ്ഥിതി. അതിനാല്‍ നാരായണ ദാസിന്റെ അറസ്റ്റ് നിയമവിരുദ്ധമാണെന്ന് കോടതി വ്യക്തമാക്കി.

ഷീല സണ്ണിയുടെ മരുമകളുടെ സഹോദരിയായ ലിവിയയ്ക്ക് വേണ്ടിയാണ് തൃപ്പൂണിത്തുറ എരൂര്‍ സ്വദേശിയായ നാരായണ ദാസ് ഇടപെട്ടത് എന്നാണ് പൊലീസ് കണ്ടെത്തല്‍. ഷീലയുടെ സ്‌കൂട്ടറില്‍ എല്‍.എസ്.ഡി സ്റ്റാമ്പിനോട് സാമ്യമുള്ള ചില വസ്തുക്കള്‍ വയ്ക്കുകയും പിന്നീട് എക്‌സൈസ് ഉദ്യോഗസ്ഥര്‍ക്ക് വിവരം നല്‍കുകയുമായിരുന്നു. നാരായണ ദാസാണ് വ്യാജ ലഹരി മരുന്ന് സംഘടിപ്പിക്കാന്‍ സഹായിച്ചതെന്നും ഇക്കാര്യം എക്‌സൈസ് ഉദ്യോഗസ്ഥരെ അറിയിച്ചത് എന്നുമാണ് പൊലീസ് കണ്ടെത്തല്‍. വിദേശത്തായിരുന്ന ലിവിയയെ നേരത്തെ നാട്ടിലെത്തിച്ച് അറസ്റ്റ് ചെയ്തിരുന്നു. കേസില്‍ അറസ്റ്റിലായ ഷീല സണ്ണിക്ക് 72 ദിവസത്തിന് ശേഷമാണ് ജാമ്യം ലഭിച്ചത്.