സ്വന്തം ജീവൻ പകുത്തു നൽകി ഒരു പിഞ്ചു കുഞ്ഞിനെ ജീവിതത്തിലേക്ക് മടക്കിക്കൊണ്ടുവന്ന ശ്രീരഞ്ജിനി. പക്ഷെ ഇന്ന് അവർക്ക് കൂട്ട് പ്രാരാബ്ദങ്ങൾ മാത്രം. 2016ലാണ് ശ്രീരഞ്ജിനി ആ പുണ്യപ്രവർത്തിക്ക് വേണ്ടി മുൻകൈ എടുത്തത്. ഭർത്താവും സ​ഹോദരങ്ങളും മക്കളുമെല്ലാം ശ്രീരഞ്ജിനിയുടെ തീരുമാനങ്ങൾക്ക് എതിരായിരുന്നു. എന്നാൽ ആ കുഞ്ഞിന്റെ കരച്ചിൽ നിസ്സഹായത ഇതെല്ലാം കണ്ടതോടെ സ്വന്തം തീരുമാനത്തിൽ ഉറച്ച് നിൽക്കാനായിരുന്നു അവരുടെ തീരുമാനം.

കരൾ പകുത്ത് നൽകിയാൽ‍ അത് ഒരു പക്ഷേ പിന്നീട് അങ്ങോട്ടുള്ള ജീവിതത്തിന് ആരോ​ഗ്യപ്രശ്നങ്ങളായി വന്നേക്കാമെന്ന് പറഞ്ഞ് നിരവധി പേർ വന്നെങ്കിലും ആ കുഞ്ഞിനൊരു ആശ്വാസമാകാനായിരുന്നു ശ്രീരഞ്ജിനിയുടെ തീരുമാനം. ഒരു രൂപപോലും പ്രതിഫലം വാങ്ങാതെ അങ്ങനെ ഓപ്പറേഷൻ കഴിഞ്ഞു. ഓപ്പറേഷൻ കഴിഞ്ഞ് ആ കുഞ്ഞിനെ തന്റെ കൈയ്യിലേക്ക് വച്ച് തരുമ്പോൾ ഞാൻ തന്നെ പ്രസവിച്ച കുഞ്ഞിനെ ഏറ്റുവാങ്ങുന്ന സന്തോഷമായിരുന്നു തനിക്കുണ്ടായതെന്നാണ് അവർ കണ്ണ് നിറഞ്ഞ് കൊണ്ട് പറഞ്ഞത്. ആ കുഞ്ഞിന്റെ സ്വകാര്യത മാനിച്ച് ശ്രീരഞ്ജിനി പിന്നീടൊരിക്കലും ആ കുഞ്ഞിനരികിലേക്ക് പോയിട്ടില്ല.

പലപ്പോഴും ഒരു നോക്ക് കാണാൻ കൊതിച്ചിട്ടുണ്ട്. പക്ഷേ അതിന് പറ്റിയിട്ടില്ല. അങ്ങനെ ഓരോ ദിവസവും തള്ളിനീക്കുന്ന അവരുടെ അവസ്ഥ ഇപ്പോൾ വളരെ ദയനീയമാണ്. ശരീരമാസകലം വേദന നിറഞ്ഞിട്ടും സാമ്പത്തിക ബുദ്ധിമുട്ട് കൊണ്ട് അവർ ഇന്നും ജോലിക്ക് പോകുന്നുണ്ട്. ആരോ​ഗ്യകരമായ വിശ്രമം വേണ്ട സമയമാണെങ്കിലും ഇന്നതിന് അവരെ കൊണ്ട് സാധിക്കുന്നില്ല എന്നതും കയറിക്കിടക്കാനൊരിടമില്ലെന്നതുമാണ് ഏറെ വേദന..