പാര്‍ലമെന്റ്റ് വര്‍ഷകാല സമ്മേളനത്തിന് തിരശ്ശീല വീണു
പാര്‍ലമെന്റിന്റെ വര്‍ഷകാല സമ്മേളനത്തിന് തിരശ്ശീല വീണു. 'പ്രമോഷന്‍ ആന്‍ഡ് റെഗുലേഷന്‍ ഓഫ് ഓണ്‍ലൈന്‍ ഗെയിമിങ് ബില്‍ 2025' പാര്‍ലമെന്റില്‍ പാസായി. ഓണ്‍ലൈന്‍ ഗെയിമിങ് പ്ലാറ്റ്‌ഫോമുകളെ നിയമത്തിനുകീഴില്‍ കൊണ്ടുവരാനും ഡിജിറ്റല്‍ ആപ്പുകള്‍ വഴിയുള്ള അനധികൃത ചൂതാട്ടത്തിന് നിയന്ത്രണം ഏര്‍പ്പെടുത്താനും ലക്ഷ്യമിട്ടുള്ള ബില്ലാണിത്. ബിഹാര്‍ വോട്ടര്‍പട്ടിക പരിഷ്!കരണത്തില്‍ ചര്‍ച്ച ആവശ്യപ്പെട്ടുള്ള പ്രതിപക്ഷ പ്രതിഷേധത്തിനിടെയാണ് ബില്‍ ചര്‍ച്ചയില്ലാതെ ശബ്ദവോട്ടോടെ രാജ്യസഭയില്‍ പാസാക്കിയത്. കഴിഞ്ഞ ദിവസം ഇതേ ബില്‍ ലോക്‌സഭയും പാസാക്കിയിരുന്നു. രാഷ്ട്രപതി ഒപ്പിടുന്നതോടെ ബില്‍ നിയമമാകും.
പണം നിക്ഷേപിച്ച് കൂടുതല്‍ പണം തിരികെ ലഭിക്കുന്ന ഗെയിമുകളെയാണ് ഓണ്‍ലൈന്‍ മണി ഗെയിമുകളുടെ പരിധിയില്‍ കൊണ്ടുവന്നിരിക്കുന്നത്. രാജ്യത്തിനു പുറത്തുനിന്ന് നിയന്ത്രിക്കുന്ന ഓണ്‍ലൈന്‍ മണി ഗെയിമുകള്‍ക്കും പുതിയ നിയമം ബാധകമാണ്. ഇത്തരം പ്ലാറ്റുഫോമുകളെ നിയന്ത്രിക്കുന്നതിന് അതോറിറ്റി രൂപവത്കരിക്കും. പണം ഉള്‍പ്പെട്ട ഗെയിമുകളുമായി ബന്ധപ്പെട്ട പരാതികളില്‍ അതോറിറ്റിയുടെ നേതൃത്വത്തില്‍ പരിശോധിച്ച് നടപടി സ്വീകരിക്കും.ബില്‍ നിയമമാകുന്നതോടെ ഓണ്‍ലൈന്‍ മണി ഗെയിമുകള്‍ പ്രചരിപ്പിക്കാനോ പ്രോത്സാഹിപ്പിക്കാനോ സാധിക്കില്ല. പ്രചരിപ്പിച്ചാല്‍ മൂന്നു വര്‍ഷം തടവോ ഒരു കോടി രൂപയോ പിഴ ശിക്ഷയോ രണ്ടും ഒരുമിച്ചോ അനുഭവിക്കേണ്ടിവരും. ഇത്തരം ഗെയിമുകള്‍ പ്രോത്സാഹിപ്പിക്കുന്ന തരത്തിലുള്ള പരസ്യങ്ങള്‍ ഏതെങ്കിലും മാധ്യമത്തിലൂടെ പ്രചരിപ്പിച്ചാല്‍ രണ്ടു വര്‍ഷം തടവും 50 ലക്ഷം പിഴയും ശിക്ഷയായി ലഭിക്കും. ബാങ്കുകള്‍ക്കോ ധനകാര്യ സ്ഥാപനങ്ങള്‍ക്കോ ഇത്തരം ഗെയിമുകളുമായി ബന്ധപ്പെട്ട പണമിടപാട് സേവനം നല്‍കാനുള്ള അനുമതി ലഭിക്കില്ല.
പണമിടപാട് സേവനം നല്‍കുന്ന സ്ഥാപനങ്ങള്‍ക്ക് മൂന്നു വര്‍ഷം തടവും ഒരു കോടി രൂപ പിഴയുമാണ് ശിക്ഷ.ബില്ലില്‍ ഇസ്‌പോര്‍ട്‌സ് പ്രോത്സാകഹിപ്പിക്കാനും ലക്ഷ്യമിടുന്നു. ഇസ്‌പോര്‍ട്‌സിന്റെ പുരോഗതിക്കായി പരിശീലന അക്കാദമികള്‍, ഗവേഷണ കേന്ദ്രങ്ങള്‍, സാങ്കേതിക പ്ലാറ്റ്‌ഫോമുകള്‍ എന്നിവ സ്ഥാപിക്കും. സ്‌പോര്‍ട്‌സ് ഇവന്റുകള്‍ നടത്തുന്നതിനുള്ള മാര്‍ഗനിര്‍ദേശങ്ങളും മാനദണ്ഡങ്ങളും കായിക മന്ത്രാലയം രൂപവത്കരിക്കും.
ഓണ്‍ലൈന്‍ റിയല്‍ മണി ഗെയിമുകളില്‍ പ്രതിവര്‍ഷം 45 കോടി ആളുകള്‍ക്ക് 20,000 കോടി രൂപയോളം നഷ്ടപ്പെടുന്നതായി സര്‍ക്കാര്‍ കണക്കാക്കുന്നുവെന്ന് ഔദ്യോഗിക വൃത്തങ്ങള്‍ അറിയിച്ചു. ഓണ്‍ലൈന്‍ റിയല്‍ മണി ഗെയിമിങ് പ്രധാന പ്രശ്‌നമാണെന്ന് സര്‍ക്കാര്‍ മനസിലാക്കിയിട്ടുണ്ടെന്നും ജനങ്ങളുടെ ക്ഷേമത്തിന് മുന്‍ഗണന നല്‍കി വരുമാന നഷ്ടം ഉപേക്ഷിക്കാന്‍ തീരുമാനിച്ചതായും ഔദ്യോഗിക വൃത്തങ്ങള്‍ പറയുന്നു. ഓരോ വര്‍ഷവും 45 കോടി ആളുകള്‍ക്ക് പണം നഷ്ടപ്പെടുന്നുണ്ടെന്നാണ് ഏകദേശ കണക്ക്. നഷ്ടത്തിന്റെ ആകെ ആഘാതം താല്‍ക്കാലികമായി ഏകദേശം 20,000 കോടി രൂപയായിരിക്കുമെന്ന് കണക്കാക്കപ്പെടുന്നു.
https://www.facebook.com/Malayalivartha
