കിണറ്റില്‍ വീണ വീട്ടമ്മയെ ഫയര്‍ഫോഴ്‌സ് രക്ഷപ്പെടുത്തി. വിഴിഞ്ഞം മുല്ലൂര്‍ മേലേ കണ്ണാംവിളാകത്ത് വീട്ടില്‍ രാജേഷിന്റെ ഭാര്യ ശാലിനി(36) ആണ് ഇന്നലെ കാല്‍വഴുതി വീട്ടുമുറ്റത്തെ 35 അടി താഴ്ചയുള്ള കിണറിനുള്ളില്‍ വീണത്.

കയറില്‍ കുരുങ്ങി കിടന്ന യുവതിയെ നാട്ടുകാര്‍ രക്ഷപ്പെടുത്താനായി ശ്രമിച്ചുവെങ്കിലും കഴിയാത്തതിനാല്‍ വിഴിഞ്ഞം ഫയര്‍ ഫോഴ്‌സിനെ വിവരമറിയിച്ചു. സ്റ്റേഷന്‍ ഓഫിസര്‍ പ്രമോദ് കുമാറിന്റെ നേതൃത്വത്തില്‍ ഫയര്‍ ആന്‍ഡ് റസ്‌ക്യൂ ഓഫിസര്‍ ബിനുകുമാര്‍ കിണറ്റിലിറങ്ങി വലയുടെ സഹായത്താല്‍ വീട്ടമ്മയെ കരയിലെത്തിച്ചു. കൈക്ക് പൊട്ടലുണ്ടായ യുവതിയെ പിന്നാലെ ആശുപത്രിയിലെത്തിക്കുകയായിരുന്നു.