താമരശ്ശേരി താലൂക്ക് ആശുപത്രിയില്‍വച്ച് ആക്രമണത്തിന് ഇരയായ ഡോക്ടര്‍ ആശുപത്രി വിട്ടു. കഴിഞ്ഞ ബുധനാഴ്ച ഉച്ചയ്ക്ക് 1.45നാണ് ഡോക്ടര്‍ക്ക് വെട്ടേറ്റത്. താമരശ്ശേരി കോരങ്ങാട് ആനപ്പാറപ്പൊയില്‍ വീട്ടില്‍ സനൂപാണ് (സുനൂപ് 40) ആക്രമിച്ചത്. ഡോ. വിപിനായിരുന്നില്ല സനൂപിന്റെ മകളെ ചികിത്സിച്ചിരുന്നത്. കഴിഞ്ഞ ഓഗസ്റ്റിലാണ് കുട്ടി മരിച്ചത്. ഡോക്ടര്‍മാര്‍ കൃത്യമായ ചികിത്സ നല്‍കിയില്ലെന്ന് ആരോപിച്ചാണ് പ്രതി വിപിനെ വെട്ടിയത്.

സൂപ്രണ്ടിനെ ആക്രമിക്കാനാണ് ബാഗില്‍ ഒളിപ്പിച്ച കൊടുവാളുമായി സനൂപ് വന്നത്. സൂപ്രണ്ട് മീറ്റിംഗിലായിരുന്നു. അതേ മീറ്റിംഗില്‍ നിന്ന് രോഗിയുടെ ലാബ് റിപ്പോര്‍ട്ട് പരിശോധിക്കാന്‍ ഇറങ്ങി വന്നതായിരുന്നു വിപിന്‍. സൂപ്രണ്ടിന്റെ ഓഫീസില്‍ കയറി ലാബ് റിപ്പോര്‍ട്ട് പരിശോധിക്കുന്നതിനിടെ കൊടുവാള്‍ കൊണ്ട് വെട്ടുകയായിരുന്നു പ്രതിയായ സനൂപ്. ഡോക്ടര്‍ തന്നെ അക്രമിയെ തടഞ്ഞു. മറ്റുമുള്ളവര്‍ ഓടിയെത്തി ഇയാളെ കീഴടക്കി പൊലീസില്‍ ഏല്‍പ്പിക്കുകയായിരുന്നു. വിപിന്റെ തലയോട്ടിക്ക് പൊട്ടലുള്ളതിനാല്‍ നേരത്തെ ശസ്ത്രക്രിയയ്ക്ക് വിധേയനാക്കിയിരുന്നു. തലശേരി സ്വദേശിയാണ് ഡോക്ടര്‍ വിപിന്‍.