ചലച്ചിത്ര അക്കാഡമിയില്‍ പുതിയ ഭരണ സമിതി
ചലച്ചിത്ര അക്കാഡമി ചെയര്‍മാനായി ഓസ്‌കാര്‍ അവാര്‍ഡ് ജേതാവും സൗണ്ട് ഡിസൈനറുമായ റസൂല്‍ പൂക്കുട്ടിയെ നിയമിച്ചു. കുക്കു പരമേശ്വരനെ വൈസ് ചെയര്‍പേഴ്‌സണായും നിയമിച്ചിട്ടുണ്ട്. അക്കാഡമിയില്‍ സംസ്ഥാന ചലച്ചിത്ര പുരസ്‌കാരങ്ങള്‍ തിങ്കളാഴ്ച പ്രഖ്യാപിക്കാനിരിക്കെയാണ് പുതിയ ഭരണസമിതി പ്രഖ്യാപനം. സംവിധായകന്‍ രഞ്ജിത്ത് രാജി വച്ച ഒഴിവിലാണ് റസൂല്‍ പൂക്കുട്ടിയുടെ നിയമനം. വൈസ് ചെയര്‍മാനായിരുന്ന പ്രേംകുമാര്‍ ചെയര്‍മാന്റെ താത്കാലിക ചുമതല വഹിച്ചു വരികയായിരുന്നു.
നിലവിലെ ഭരണസമിതിയെ മാറ്റിക്കൊണ്ടാണ് പുതിയ ഭരണ സമിതി നിലവില്‍ വരുന്നത്. ഭരണസമിതിയുടെ കാലാവധി തീര്‍ന്നെന്നാണ് സര്‍ക്കാരിന്റെ വിശദീകരണം. അമല്‍ നീരദ്, ശ്യാം പുഷ്‌കരന്‍, നിഖില വിമല്‍, സിതാര കൃഷ്ണ കുമാര്‍, സുധീര്‍ കരമന, ബി. രാഗേഷ് അടക്കം 26 അംഗങ്ങളാണ് പുതിയ ഭരണ സമിതിയില്‍ ഉള്‍പ്പെട്ടിരിക്കുന്നത്.
സംസ്ഥാന ചലച്ചിത്ര അവാര്‍ഡ് പ്രഖ്യാപനം തിങ്കളാഴ്ചയാണ് നടക്കുക. സിനിമകളുടെ സ്‌ക്രീനിംഗ് തീരാത്തതും നാളെ പ്രത്യേക നിയമസഭ സമ്മേളനം നടക്കുന്നതിനാലും അവാര്‍ഡ് പ്രഖ്യാപനം തിങ്കളാഴ്ചത്തേക്ക് മാറ്റുകയായിരുന്നു. ജൂറി ചെയര്‍മാനായ പ്രകാശ് രാജിന് നാളെ അടിയന്തരമായി ബെംഗളൂരുവിലേക്ക് പോകേണ്ടതും കാരണമായി.
https://www.facebook.com/Malayalivartha
