തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പില്‍ തിരുവനന്തപുരം കോര്‍പ്പറേഷനില്‍ ചരിത്രപരമായ പ്രകടനം കാഴ്ചവച്ച് ബിജെപി ഭരണം പിടിച്ച പ്രവര്‍ത്തകരെയും തിരുവനന്തപുരം മേയര്‍ വി.വി രാജേഷിനെയും ഡെപ്യൂട്ടി മേയര്‍ ആശാ നാഥിനെയും അഭിനന്ദിച്ച് കത്തയച്ചു പ്രധാനമന്ത്രി നരേന്ദ്ര മോദി.

തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പില്‍ ചരിത്രപരമായ പ്രകടനം കാഴ്ചവച്ച നമ്മുടെ പാര്‍ട്ടിയുടെ പുതുതായി തിരഞ്ഞെടുക്കപ്പെട്ട എല്ലാ കൗണ്‍സിലര്‍മാരെയും കാര്യകര്‍ത്താക്കളെയും അഭിനന്ദിക്കുന്നു: മോദി മേയര്‍ക്കയച്ച കത്തില്‍ പറയുന്നു. മേയര്‍ വി.വി രാജേഷ് തന്റെ ഫേസ്ബുക്കിലൂടെ ഈ കത്ത് പങ്കുവെച്ചത്.

തങ്ങളുടെ പാര്‍ട്ടിയോട് കാണിച്ച ഊഷ്മളതയ്ക്ക് ഈ നഗരത്തിലെ ജനങ്ങളോട് നന്ദി പറയുന്നെന്നും തിരുവനന്തപുരം നഗരത്തിന്റെ വികസനമെന്ന തങ്ങളുടെ കാഴ്ചപ്പാട് സമൂഹത്തിലെ എല്ലാ വിഭാഗങ്ങളില്‍ നിന്നുമുള്ള ആളുകളുമായി ബന്ധപ്പെട്ടുകിടക്കുന്നതാണെന്നും മോദി കുറിച്ചു.

മോദി നല്‍കിയ ഈ വാഗ്ദാനം കേരളത്തിന്റെ വികസന മുന്നേറ്റത്തിന് വലിയ പ്രതീക്ഷയാണ് കൈവന്നിട്ടുള്ളതെന്നും കഴിഞ്ഞ നീണ്ട നാളുകളായുള്ള കേരളത്തിലെ ബിജെപി പ്രവര്‍ത്തകരുടെ കഠിനാധ്വാനത്തിന് നമ്മുടെ പ്രധാനമന്ത്രി തിരിച്ചു നല്‍കുന്ന സ്‌നേഹവും കരുതലും ഈ സംസ്ഥാനത്തിനുള്ള അംഗീകാരം കൂടിയാണെന്നും രാജേഷ് ചൂണ്ടിക്കാട്ടി.