അടൂര് പ്രകാശിന്റെ ആരോപണം വസ്തുതാവിരുദ്ധമെന്ന് മുഖ്യമന്ത്രിയുടെ ഓഫീസ്
ശബരിമല സ്വര്ണപ്പാളി കേസില് എസ്.ഐ.ടി ചോദ്യം ചെയ്യാന് വിളിപ്പിക്കുമെന്ന വാര്ത്തയ്ക്ക് പിന്നില് മുഖ്യമന്ത്രിയുടെ ഓഫീസാണെന്ന അടൂര് പ്രകാശ് എം.പിയുടെ ആരോപണം വസ്തുതാവിരുദ്ധമെന്ന് വ്യക്തമാക്കി സര്ക്കാര്. വാര്ത്തയ്ക്ക് പിന്നില് മുഖ്യമന്ത്രിയുടെ ഓഫീസും മുഖ്യമന്ത്രിയുടെ പൊളിറ്റിക്കല് സെക്രട്ടറി ഉണ്ടാക്കിയ കഥയും ആണെന്ന അടൂര് പ്രകാശിന്റെ പ്രസ്താവന വാസ്തവ വിരുദ്ധമാണെന്ന് മുഖ്യമന്ത്രിയുടെ ഓഫീസ് വാര്ത്താക്കുറിപ്പില് അറിയിച്ചു.
കേസ് അന്വേഷിക്കാന് പ്രത്യേക അന്വേഷണ സംഘത്തെ നിയോഗിച്ചത് ഹൈക്കോടതിയാണ്. ഹൈക്കോടതിയുടെ ഡിവിഷന് ബെഞ്ചിന്റെ മേല്നോട്ടത്തില് നടക്കുന്ന എസ്,ഐ,ടി അന്വേഷണ റിപ്പോര്ട്ട് സമര്പ്പിക്കുന്നതും ഹൈക്കോടതി മുമ്പാകെയാണ്. അതിന്റെ വിവരങ്ങള് പുറത്തേക്ക് പോകരുതെന്നും കര്ക്കശമായ കോടതി നിര്ദ്ദേശമുണ്ട്. മുഖ്യമന്ത്രിയുടെ ഓഫീസിനോ പൊളിറ്റിക്കല് സെക്രട്ടറിക്കോ ഇതില് പങ്കാളിത്തമില്ല. തീര്ത്തും അടിസ്ഥാന രഹിതമായ വ്യാജപ്രചാരണമാണ് അടൂര് പ്രകാശിന്റേതെന്നും വാര്ത്താക്കുറിപ്പില് പറയുന്നു.
അടൂര് പ്രകാശിന്റെ ആരോപണം നേരത്തെ മുഖ്യമന്ത്രി പിണറായി വിജയനും വാര്ത്താസമ്മേളനത്തില് നിഷേധിച്ചിരുന്നു. ചോദ്യങ്ങള്ക്ക് മറുപടി പറയാന് കഴിയാതെ വരുമ്പോള് ആവശ്യമില്ലാതെ ആക്ഷേപങ്ങള് ഉന്നയിക്കുകയാണ് അടൂര് പ്രകാശ് എന്ന് മുഖ്യമന്ത്രി പറഞ്ഞു. ആക്ഷേപം ഉന്നയിക്കുക എന്നത് ഒരു സ്വഭാവമാക്കിയിട്ടുള്ളവരുടെ പ്രതികരണങ്ങളക്കുറിച്ച് മറുപടി പറയുന്നതുകൊണ്ടു മാത്രം അത് അവസാനിക്കില്ലെന്നും മുഖ്യമന്ത്രി വ്യക്തമാക്കി.
https://www.facebook.com/Malayalivartha
