വെര്‍ച്വല്‍ അറസ്റ്റിലായിരുന്ന മുന്‍ സര്‍ക്കാര്‍ ഉദ്യോഗസ്ഥനായ 74 കാരനെ സൈബര്‍ പൊലിസ് രക്ഷിച്ചത് ബാങ്ക് മാനേജര്‍ക്ക് തോന്നിയ സംശയം. തട്ടിപ്പ് സംഘത്തിന് 10 ലക്ഷം കൈമാറാന്‍ ബാങ്കിലെത്തിയപ്പോള്‍ മാനേജര്‍ക്കുണ്ടായ സംശയമാണ് 74 കാരന്റെ ജീവനും സമ്പാദ്യവും സംരക്ഷിക്കാന്‍ ഇടയായത്. പണം കൈമാറിയ ശേഷം ജീവന്‍ അവസാനിപ്പിക്കാന്‍ തീരുമാനിച്ചിരുന്നതായി തട്ടിപ്പില്‍ അകപ്പെട്ടയാള്‍ പറഞ്ഞു.

അഞ്ചു ദിവസമാണ് മുന്‍ സര്‍ക്കാര്‍ ഉദ്യോഗസ്ഥനെ വെര്‍ച്വല്‍ അറസ്റ്റ് ചെയ്ത് വീട്ടിനുള്ളില്‍ വച്ചിരുന്നത്. മുംബൈ പൊലീസെന്ന് പരിചയപ്പെടുത്തിയാണ് വാട്‌സ് ആപ്പ് വീഡിയോ കോള്‍ വന്നത്. സാമ്പത്തിക തട്ടിപ്പ് കേസില്‍ പ്രതിയായതിനാല്‍ അറസ്റ്റിലാണെന്നും മറ്റാരോടും വിവരം പറയരുതെന്നും തട്ടിപ്പ് സംഘം പറഞ്ഞു. ഭാര്യയോടും പോലും വിവരം പറയാതെ ഒടുവില്‍ സ്ഥിര നിക്ഷേപമായി മാറ്റി വച്ചിരുന്ന 10 ലക്ഷം തട്ടിപ്പ് സംഘത്തിന് കൈമാറാന്‍ തീരുമാനിച്ചു. ബാങ്കിലെത്തി സ്ഥിര നിക്ഷേപമെടുത്ത് മറ്റൊരു അക്കൗണ്ടിലേക്ക് മാറ്റി. ഓണ്‍ ലൈന്‍ വഴി മുംബൈയിലെ ഒരു കമ്പനിയുടെ അക്കൗണ്ടിലേക്ക് മാറ്റാന്‍ നീക്കം നടത്തിയപ്പോഴാണ് ബാങ്ക് മാനേജര്‍ക്ക് സംശയം തോന്നിയത്. വിവരം സൈബര്‍ പൊലിസിനെ അറിയിച്ചു.

ബാങ്കില്‍ നിന്നും 74കാരനെ കൂട്ടികൊണ്ടുവന്ന് മൊബൈല്‍ ഫോണ്‍ പരിശോധിച്ചു. അപ്പോഴും തട്ടിപ്പു സംഘം വിളിച്ചുകൊണ്ടിരുന്നു. ഫോണ്‍ പൊലീസെടുത്തതോടെ സംഘം പിന്‍മാറുകയായിരുന്നു.