പാല് തലയില് ഒഴിച്ചുള്ള യുവാവിന്റെ പ്രതിഷേധം; യുവാവിന്റെ വാദങ്ങള് തള്ളിക്കളഞ്ഞ് ക്ഷീരകര്ഷകര് ഒന്നടങ്കം രംഗത്ത്
താന് കൊണ്ട് വരുന്ന പാല് സ്വീകരിക്കുന്നില്ലെന്ന് ആരോപിച്ച് സൊസൈറ്റിക്ക് മുന്പില് പ്രതിഷേധിച്ച യുവാവിനെതിരെ പ്രദേശത്തെ മറ്റ് ക്ഷീരകര്ഷകര് രംഗത്ത്. കൊല്ലം പരവൂരിലെ കൂനയില് ക്ഷീരോല്പ്പാദക സംഘത്തിന്റെ മുന്നിലാണ് യുവാവ് പ്രതിഷേധിച്ചത്. പാല് പിരിഞ്ഞുപോകുന്നുവെന്ന വിചിത്ര വാദം ഉന്നയിച്ച് തന്റെ പശുക്കളുടെ പാല് മാത്രം സൊസൈറ്റി അധികൃതര് സ്വീകരിക്കുന്നില്ലെന്നാണ് യുവാവ് ആരോപിച്ചത്. താന് കൊണ്ടുവന്ന പാല് തലയിലൂടെ ഒഴിച്ചാണ് സൊസൈറ്റിക്ക് മുന്നില് യുവാവ് പ്രതിഷേധിച്ചത്. സംഭവത്തിന്റെ ദൃശ്യങ്ങള് സോഷ്യല് മീഡിയയില് പ്രചരിക്കുന്നുണ്ട്.
എന്നാല്, ഇപ്പോള് യുവാവിന്റെ വാദങ്ങള് തള്ളിക്കളഞ്ഞുകൊണ്ട് രംഗത്തെത്തിയിരിക്കുകയാണ് പ്രദേശത്തെ മറ്റ് ക്ഷീരകര്ഷകര്. പരവൂര് സ്വദേശിയായ വിഷ്ണു എന്ന യുവാവാണ് പ്രതിഷേധം നടത്തിയത്. ഇയാള് ക്ഷീരകര്ഷകനല്ലെന്നും മറിച്ച് പശുക്കച്ചവടമാണ് ഇയാളുടെ തൊഴിലെന്നുമാണ് പ്രദേശവാസികള് പറയുന്നത്.
'കച്ചവടത്തിനായി തമിഴ്നാട്ടില് നിന്നും മറ്റുമാണ് ഇയാള് പശുക്കളെ എത്തിക്കുന്നത്. ദിവസങ്ങളോളം കറക്കാതെ നില്ക്കുന്ന പശുക്കളാണതെല്ലാം. ആ പശുക്കളുടെ പാല് പെട്ടെന്ന് പിരിയും. അത് സൊസൈറ്റിയില് സ്വീകരിക്കുമ്പോള് അവിടെയുള്ള ബാക്കി പാല് കൂടി പിരിഞ്ഞ് പോകുന്നു. ഏകദേശം അറുപതോളം കര്ഷകര് സൊസൈറ്റിയില് പാല് നല്കുന്നുണ്ട്. ഒരു കാനിനുള്ളില് 40 ലിറ്റര് പാലാണ് ഉള്ക്കൊള്ളുന്നത്. ഒന്നില് കൂടുതല് കര്ഷകര് കൊണ്ടുവരുന്ന പാല് ഒഴിക്കുമ്പോഴാണ് ഒരു കാന് നിറയുന്നത്. അങ്ങനെയാകുമ്പോള് ഒരാള് കൊണ്ട് വരുന്നത് മോശം പാലാണെങ്കില് ബാക്കിയുള്ളത് മുഴുവന് കേടാകുന്നു. ഇത് കണ്ടെത്തിയപ്പോള് യുവാവിന് പ്രത്യേകം കാന് നല്കിയിരുന്നു. അതിലുള്ള പാലും കേടായതോടെയാണ് പൊതുയോഗം കൂടി ഇനിമുതല് ആ വ്യക്തിയുടെ പാല് എടുക്കേണ്ടെന്ന് തീരുമാനിച്ചത്. അല്ലാതെ ആ തീരുമാനം സൊസൈറ്റി അധികൃതരുടേത് മാത്രമല്ല' മറ്റ് ക്ഷീരകര്ഷകര് പറയുന്നു.
പശുക്കള് പ്രസവിച്ച് തൊട്ടടുത്ത ദിവസങ്ങളിലെ പാല് ഉപയോഗിക്കാറില്ല. ഇത്തരം പാലും യുവാവ് സൊസൈറ്റിയില് എത്തിക്കാറുണ്ടെന്ന് കര്ഷകര് പറയുന്നു. യുവാവിന്റെ പശുക്കളുടെ പാല് സൊസൈറ്റിയില് സ്വീകരിച്ചാല് തങ്ങളുടെ പശുക്കളുടെ പാല് അവിടെ നല്കില്ലെന്നുള്ള നിലപാടിലാണ് മറ്റ് കര്ഷകര്.
സിപിഎംകാരനായ കര്ഷകന് പറഞ്ഞിട്ടാണ് സൊസൈറ്റി അധികൃതര് തന്റെ പശുക്കളുടെ പാല് സ്വീകരിക്കാത്തതെന്നും യുവാവ് ആരോപണം ഉന്നയിച്ചിരുന്നു. എന്നാല് തങ്ങളില് പലരും വിവിധ രാഷ്ട്രീയ പാര്ട്ടികളില് അംഗമാണെന്നും ജാതിമതരാഷ്ട്രീയ ഭേദമില്ലാതെയാണ് ഇവിടെ പാല് സ്വീകരിക്കുന്നതെന്നും കര്ഷകര് പറഞ്ഞു.
https://www.facebook.com/Malayalivartha
