സങ്കടക്കാഴ്ചയായി... കാസർകോട് ഉപ്പള സ്വദേശി അബുദാബിയിൽ മരിച്ചു. ഖലീഫ സിറ്റിയിൽ എയർപോർട്ട് റോഡരികിലെ സൂപ്പർ മാർക്കറ്റിൽ ജോലി ചെയ്യുന്ന ഉപ്പള ഹിദായത്ത് നഗറിലെ മുഹമ്മദ് റഫീക്കാണ് (28)മരണപ്പെട്ടത്.

താമസ സ്ഥലത്ത് അവശ നിലയിൽ കാണപ്പെട്ട റഫീക്കിനെ എൻഎംസി ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. മഞ്ചേശ്വരം എംഎൽഎ; എ.കെ.എം അഷറഫിന്റെ ഇളയുപ്പ മോനുവെന്ന അബ്ദുറഹിമാന്റെയും നഫീസയുടെയും മകനാണ് റഫീക്.

തഫ്‌സീറ, തസ്‌കീന, അഫ്‌സാന എന്നിവർ സഹോദരിമാരാണ്. മൃതദേഹം നാട്ടിൽ കൊണ്ട് പോകാനുള്ള ശ്രമം നടത്തി വരുന്നുണ്ട്. ആറ് വർഷത്തോളമായി സൂപ്പർ മാർക്കറ്റിൽ ജോലി ചെയ്യുന്ന റഫീക് നാട്ടിൽ നിന്നും നാല്മാസം മുമ്പാണ് അവധി കഴിഞ്ഞ് തിരിച്ചെത്തിയത്. ഏക മകന്റെ മരണം മാതാപിതാക്കളെയും കുടുംബക്കാരെയും നാട്ടുകാരെയും കണ്ണീരിലാഴ്ത്തി.