കോടതിയിൽ വച്ച് സഹതടവുകാരനെ കൊലപ്പെടുത്താൻ ശ്രമം... അമ്പലമുക്ക് കൃഷ്ണകുമാറിനെതിരെ ഡിസംബർ 2 ന് വിചാരണ തുടങ്ങും, കഴുത്തിൽ ബ്ളേഡ് ഉപയോഗിച്ച് മുറിവേല്പിച്ചു രണ്ടുപേരും കൊലക്കേസ് പ്രതികൾ

കോടതിയിൽ വിചാരണയ്ക്കെത്തിച്ച സഹതടവുകാരനെ കോടതി വളപ്പിൽ ബ്ളേഡ് ഉപയോഗിച്ച് കൊലപ്പെടുത്താൻ ശ്രമിച്ച കേസിൽ കൊടുംകുറ്റവാളി അമ്പലമുക്ക് കൃഷ്ണകുമാറിനെതിരെ ഡിസംബർ 2 ന് വിചാരണ തുടങ്ങും. മണ്ണന്തല രഞ്ജിത് കൊലക്കേസിൽ വിധി പറയുന്ന തിരുവനന്തപുരം നാലാം അഡീ. ജില്ലാ സെഷൻസ് ജഡ്ജി ആർ. സുധാ കാന്താണ് പ്രതിയെ വിചാരണ ചെയ്യുന്നത്. ഡിസംബർ 2 മുതൽ 9 വരെയായി ഔദ്യോഗിക സ്വതന്ത്ര സാക്ഷികളടക്കം 25 പേരെ വിസ്തരിക്കാൻ കോടതി ഉത്തരവിട്ടു.
അഞ്ചുതെങ്ങ് റിക്സൺ വധക്കേസിൽ ജീവപര്യന്തം കഠിനതടവ് അനുഭവിക്കുന്ന പ്രതി റോയിയെയാണ് അപ്രാണി കൃഷ്ണകുമാർ വധക്കേസിലും കണ്ണാടി ഷാജി വധക്കേസിലും ജീവപര്യന്തം കഠിനതടവിന് ശിക്ഷ അനുഭവിക്കുന്ന പ്രതിയും മണ്ണന്തല രഞ്ജിത് വധക്കേസിലെ മുഖ്യ പ്രതിയുമായ അമ്പലമുക്ക് കൃഷ്ണകുമാർ കൊലപ്പെടുത്താൻ ശ്രമിച്ചത്. 2024 ഫെബ്രുവരി 19 രാവിലെ 11ന് വഞ്ചിയൂർ നാലാം അഡിഷണൽ ജില്ലാ സെഷൻസ് കോടതി വളപ്പിലായിരുന്നു സംഭവം. ഇരുവരെയും പൂജപ്പുര ജയിലിൽ നിന്ന് ഒരു വാഹനത്തിലാണ് വിചാരണയ്ക്കെത്തിച്ചത്. എന്നാൽ വാഹനത്തിലിരുന്ന് ഇവർ തമ്മിൽ വാക്കേറ്റമുണ്ടായി. തുടർന്ന് വാഹനത്തിൽ നിന്നിറക്കി കോടതി നടപടികൾ പൂർത്തിയാക്കിയശേഷം പ്രതികളെ തിരിച്ച് ജയിലിലേക്ക് കൊണ്ടുപോകാൻ വാഹനത്തിൽ കയറ്റുമ്പോഴാണ് കൃഷ്ണകുമാർ കൈയിലുണ്ടായിരുന്ന ബ്ളേഡ് കഷ്ണം ഉപയോഗിച്ച് റോയിയുടെ കഴുത്തിന്റെ ഇടതുഭാഗത്ത് മുറിവേല്പിച്ചത്. തുടർന്ന് പൊലീസുകാരെത്തി റോയിയെ ജനറൽ ആശുപത്രിയിലും കൃഷ്ണകുമാറിനെ വാഹനത്തിലും കയറ്റി. ഒരു മണിക്കൂറിനു ശേഷം ഇയാളെയും ജയിലിലെത്തിച്ചു. സംഭവത്തിൽ വഞ്ചിയൂർ പൊലീസ് കേസെടുത്തിരുന്നു. ഇവർ തമ്മിൽ ജയിലിൽ വച്ച് മുമ്പും സംഘർഷമുണ്ടായിട്ടുണ്ടെന്ന് പൊലീസ് കുറ്റപത്രത്തിൽ വ്യക്തമാക്കി. ഇതിൽ പൂജപ്പുര പൊലീസ് കേസും രജിസ്റ്റർ ചെയ്തിട്ടുണ്ട്. ഇതിന്റെ തുടർച്ചയായാണ് കൊലപാതക ശ്രമം. റോയിയെ പാർപ്പിച്ചിരുന്ന മുറിയിൽ നിന്ന് ജയിൽ ചാട്ടത്തിന് ഉപയോഗിക്കാൻ പാകമായ ചെറിയ കമ്പിക്കഷ്ണങ്ങൾ കണ്ടെത്തിയതിന് ജയിൽ അധികൃതരുടെ പരാതിയിൽ പൂജപ്പുര പൊലീസ് നേരത്തെ കേസെടുത്തിരുന്നു. ഈ കേസിന്റെ വിചാരണയ്ക്കാണ് റോയിയെ അഡീഷണൽ ചീഫ് ജുഡിഷ്യൽ മജിസ്ട്രേറ്റ് കോടതിയിൽ കൊണ്ടുവന്നത്.
"https://www.facebook.com/Malayalivartha
























